မိူဝ်ႈၼႆႉ ဝၼ်းတီႈ 1/10/2022 ယၢမ်းၵၢင်ၼႂ် ၵႃးလမ်းၼိုင်ႈ လုၵ်ႉတၢင်းၵဵင်းတုင်မႃး ပဵၼ်ၽေးၵိုင်ႉၵၢင်ႉ ပိၼ်ႈတူၵ်းၼႂ်း ၼမ်ႉလဵၼ်း ႁိမ်းဝၢၼ်ႈပၢင်ၶႃးၼွႆႉ ၼိူဝ်သဵၼ်ႈတၢင်းလူင် ၼႂ်းၵႄႈတႃႈလိူဝ်ႇ – ၵဵင်းတုင် ၼႂ်းဝဵင်းတႃႈလိူဝ်ႇ ၸႄႈဝဵင်းတႃႈၶီႈ လဵၵ်း ၸိုင်ႈတႆးပွတ်းဢွၵ်ႇၶူင်း ၵူၼ်းမႃးၸွမ်းၼႂ်းၵႃး လူႉတၢႆ 4 ၵေႃႉ။
ၸုမ်းၸွႆႈထႅမ် ဝဵင်းတႃႈလိူဝ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၵႃးၶဝ်မႃးပိၼ်ႈတူၵ်း ၼႂ်းၼမ်ႉလဵၼ်း ၼႂ်းၵႃးၼၼ်ႉ လုၵ်ႈဢွၼ်ႇဢႃယု 8 ၶူပ်ႇ ၵေႃႉၼိုင်ႈ ၊ ၽူႈၸၢႆး 1 ၵေႃႉၼိုင်ႈလႄႈ ၼၢင်းယိင်း 2 ၵေႃႉ တင်းမူတ်းတၢႆ 4 ၵေႃႉ။ ၵိုတ်းၸဝ်ႈၵႃးလႄႈ ၼၢင်းယိင်း ထႅင်ႈၵေႃႉၼိုင်ႈတႄႉ မၢတ်ႇၸဵပ်းဢေႃႈ”- ဝႃႈၼႆ။
ၵႃးဢၼ် မႃးပဵၼ်ၽေးၵိုင်ႉၵၢင်ႉသေ ပိၼ်ႈတူၵ်း ၼမ်ႉလဵၼ်းၵႂႃႇၼႆႉ ပဵၼ်ၵႃး Vigo ၼႂ်းၵႃးၼၼ်ႉ မႃးၸွမ်း 6 ၵေႃႉ။ ၸူမ်ၼမ်ႉတၢႆၸွမ်းၵႃး 4 ၵေႃႉ။ တၼ်းၸွႆႈလႆႈ လွတ်ႈမႃး 2 ၵေႃႉ ။
ၵူၼ်းပိုၼ်ႉတီႈ ဝဵင်းတႃႈလိူဝ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၵူၼ်းတႃႈၶီႈလဵၵ်း မိူဝ်းလူႇတၢၼ်း တီႈၵဵင်းတုင်သေ ပွၵ်ႈမႃး ပဵၼ်ၽေးၵိုင်ႉၵၢင်ႉ ၵႃးပိၼ်ႈတူၵ်းၼမ်ႉလဵၼ်းၵႂႃႇ ႁိမ်းဝၢၼ်ႈပၢင်ၶႃးၼွႆႉ ၼႆႉၶႃႈဢေႃႈ ။ ပဵၼ်ၵူၼ်းပွၵ်ႉမႄႈၶၢဝ် ဝဵင်းတႃႈၶီႈလဵၵ်း ၶႃႈ”- ဝႃႈၼႆ။
ယၢမ်းလဵဝ် ယူႇတီႈ ၸုမ်းၸွႆႈထႅမ်ပရႁိတ ဝဵင်းတႃႈလိူဝ်ႇ လႆႈၸွႆႈၵၼ် ၵႂႃႇဢဝ်တူဝ်တၢႆ ၵူၼ်းမၢတ်ႇ ၸဵပ်း ၼႂ်းၵႃးၼၼ်ႉ မႃးဝႆႉ တီႈႁူင်းယႃယဝ်ႉ ဝႃႈၼႆ။