ပလိၵ်ႈၵုမ်းရူတ်ႉၵႃး (မေႃႇတေႃႇပီႇၵေႇ) ပႂ်ႉတၢင်းၶဝ်ႈ/ဢွၵ်ႇ ဝဵင်းႁူဝ်ပူင်းသေ ၵူတ်ႇထတ်းရူတ်ႉၵႃး ၵဵပ်းငိုၼ်းတီႈၵူၼ်းမိူင်းၵႂႃႇမႃး ၼမ်မႃးၵူႈမိုဝ်ႉၵူႈဝၼ်း။
ၸုမ်းပလိၵ်ႈၼႆႉ တင်ႈလၢၼ်ႇပႂ်ႉဝႆႉတၢင်းၶဝ်ႈ/ဢွၵ်ႇဝဵင်းႁူဝ်ပူင်းၸဵမ်မိူဝ်ႈလိူၼ်ၵျူႊလၢႆႊပူၼ်ႉမႃး။ ၵူတ်ႇထတ်း ဝႂ်ၶပ်းၶီႇရူတ်ႉ၊ ဝႂ်လၢႆႇၸိၼ်ႊရူတ်ႉသေ ၵဵပ်းငိုၼ်းပေႃးပဵၼ်ရူတ်ႉၵႃး ၼိုင်ႈလမ်း 5 မိုၼ်ႇပျႃး၊ ရူတ်ႉၶိူင်ႈ ၼိုင်ႈလမ်း မိုၼ်ႇႁႃႈ ၵူၼ်းၵႂႃႇတႃႈပႆတၢင်း ယၢပ်ႇၽိုတ်ႇၵိၼ်းၸႂ်လိူဝ်ႁႅင်း။
“ၶဝ်ပႂ်ႉၵဵပ်းငိုၼ်းၵႃးၵူႈလမ်းၼႆႉ လႆႈမွၵ်ႈ 2 လိူၼ်ယဝ်ႉဢေႃႈ။ တလဵဝ်ၼႆ လႆႈဝႃႈ မီးၵူႈဝၼ်းၶႃႈ။ ပေႃးလၢတ်ႈဢမ်ႇပေႃးပွင်ႇၵၼ်ၼႆ ၶဝ်ယိင်ႈၶႅၼ်းၵဝ်းဢေႃႈ။ လႆႈပၼ်ငိုၼ်းၼမ်ႁႅင်းဢေႃႈ။ ပေႃးပဵၼ်ၸဝ်ႈၵႃး ဢၼ်ႁူႉလွင်ႈၶဝ်ၼႆတႄႉ ဢဝ်ငိုၼ်းယဵတ်ႈပၼ်ၶဝ်ဢွၼ်တၢင်းၼႆ ၶဝ်ၵေႃႈဢမ်ႇပေႃးထၢမ်သင်ၼမ်ၶႃႈ။ ပဵၼ်ႁိုဝ်ၵေႃႈ ၵူၼ်းမိူင်းၵူၺ်းယဝ်ႉၶႃႈလႆႈယၢပ်ႇယူႇတိၵ်းတိၵ်း။ ၵုမ်ႇႁႃလဵင်ႉၶဝ်ၵူၺ်းယဝ်ႉၶႃႈ”- ၸဝ်ႈၵႃးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ။
ယၢမ်းလဵဝ် ၶၼ်ၵုၼ်ႇၶိုၼ်ႈၵူႈၸိူဝ်ႉၵူႈဢၼ်။ ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇ ။ ၾၢႆႇၼိုင်ႈပၢင်တိုၵ်းသိုၵ်းသိူဝ်ၵေႃႈလိူင်ႇ၊ ပလိၵ်ႈ /သိုၵ်းမၢၼ်ႈသမ်ႉ ပႂ်ႉထႆၵိၼ်ငိုၼ်းလႄႈ ၵူၼ်းမိူင်းယၢပ်ႇၵိၼ်းၶၢၼ်ၸႂ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ