မိူဝ်ႈၼႆႉဝၼ်းတီႈ 29/9/2022 ယၢမ်းၵၢင်ၶမ်ႈ 6 မူင်း 15 မိၼိတ်ႉၶၢဝ်းယၢမ်းမိူင်းတႆး မၢၵ်ႇတႅၵ်ႇသႂ်ႇရူတ်ႉၵႃးလမ်းၼိုင်ႈ တီႈပွၵ်ႉႁူဝ်ၼွင် ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ၵူၼ်းတၢႆၵိုၵ်းရူတ်ႉၵႃး 1 ၵေႃႉမၢတ်ႇၸဵပ်းႁႅင်း 3 ၵေႃႉ။
ၵူၼ်းၼမ်ႉၶမ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇတႅၵ်ႇသႂ်ႇ ၵႃးလမ်းၼိုင်ႈတီႈ ႁိမ်းသုမ်ႉယၢမ်း ပွၵ်ႉႁူဝ်ၼွင် ၼိူဝ်သဵၼ်ႈတၢင်းၵႂႃႇမိူင်းဝီး။ ၾႆးမႆႈၵူၼ်းတၢႆၵိုၵ်းၵႃးၵေႃႉၼိုင်ႈ ။ မၢတ်ႇၸဵပ်းႁၢဝ်ႈႁႅင်း 3 ၵေႃႉ။ ၶႃပုတ်းၵႂႃႇၵေႃႉၼိုင်ႈ။ ၶႃထႅင်ႈၶွၼ်ႈၼိုင်ႈသမ်ႉ ၾႆးမႆႈဝႆႉသေ သဵၼ်ဢွၵ်ႇရူတ်ႉၵႃးမႃးမီးဝႆႉၼိူဝ်တၢင်း။ ၵူၼ်းမၢတ်ႇၸဵပ်းၼၼ်ႉလၢတ်ႈၵႂၢမ်းမၢၼ်ႈ။ ၶဝ်လႅပ်ႈပဵၼ်သိုၵ်းမၢၼ်ႈတီႈ သၶၼ်းတိတ်ႉၵူင်း ၼၼ်ႉၶႃႈၼေႈ ” – ဝႃႈၼႆ။
ရူတ်ႉၵႃးလမ်းၼၼ်ႉ ဢမ်ႇၸႂ်ႈၵႃးသိုၵ်း ၊ ပဵၼ်ၵႃးၵူၼ်းႁိူၼ်း။ ဝၢႆးလင်မၢၵ်ႇတႅၵ်ႇၼႂ်းၵႃးယဝ်ႉ ၵူၼ်းဝၢၼ်ႈဢွၼ်ၵၼ်မႃးႁူတ်း/ၶႄၾႆး။ ဝၢႆးၼၼ်ႉ သိုၵ်းမၢၼ်ႈမႃးဢဵၼ်ႁႅင်းတင်းၼမ်။ ၵူၼ်းဝၢၼ်ႈၵေႃႈဢမ်ႇႁတ်းၵႂႃႇၸုၵ်းတူၺ်းသေ ဢွၼ်ၵၼ်ပွၵ်ႈၶဝ်ႈႁိူၼ်းၽႂ်မၼ်းၶိုၼ်း။
မၢၵ်ၼႆႉပဵၼ်မၢၵ်ႇၵူၼ်းၼႂ်းၵႃးၵူၺ်းႁိူဝ် ဢမ်ႇၼၼ် ၺႃးမၢၵ်ႇႁၢင်ႈၵၢင်ဝႆႉၵၢင်တၢင်းႁိုဝ်ၼႆတႄႉဢမ်ႇလႆႈႁူႉ။
ၵူၼ်းပိုၼ်ႉတီႈဝႃႈ ဢၼ်ပႃးမႃးၼႂ်းၵႃးၼၼ်ႉလႅပ်ႈပဵၼ်သိုၵ်းမၢၼ်ႈ သၶၢၼ်းတိတ်ႉၵူင်း ဝႃႈၼႆသေတႃႉတေႃႇထိုင်ယၢမ်းလဵဝ်ၵေႃႈ ပႆႇလႆႈၶေႃႈယိုၼ်ယၼ် ဢၼ်တႅတ်ႈတေႃး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ