ၸုမ်းၵူၼ်းႁၢႆႉ ၶဝ်ႈသွၵ်ႈတဝ် ႁိူၼ်းယေးၵူၼ်းဝၢၼ်ႈ လင်ၼိုင်ႈ ၼႂ်းဝဵင်းလၢႆးၶႃႈ လႆႈၵႂႃႇငိုၼ်းၶမ်း တင်းၼမ်လၢႆ။

ဝၼ်းတီႈ 24/9/2022 ပူၼ်ႉမႃးၼႆႉ ႁိူၼ်းယေး ၵူၼ်းဝၢၼ်ႈ လင်ၼိုင်ႈ တီႈပွၵ်ႉ 1 ဝဵင်းလၢႆးၶႃႈ ၸႄႈတွၼ်ႈ လွႆလႅမ် ၸိုင်ႈတႆး ပွတ်းၸၢၼ်း ထုၵ်ႇၸုမ်းၵူၼ်းႁၢႆႉ ၶဝ်ႈသွၵ်ႈတဝ် ယႃႉတိူၵ်ႈၶူဝ်း ၼႂ်းႁိူၼ်းယေး ပေႃးမၢၵ်ႇ မိူဝ် လႆႈၵႂႃႇငိုၼ်းၶမ်းတင်းၼမ်  ။

ၵူၼ်းဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ငိုၼ်းၶမ်း ပႃးၵႂႃႇၼမ်ၶႃႈဢေႃႈ ၸဝ်ႈၶွင်ႁိူၼ်း ပေႃးႁႆႈၶႃႈ။ လႆႈႁူႉဝႃႈ ပဵၼ် ငိုၼ်းဢၼ်လုၵ်ႈဢွၼ်ႇၵႂႃႇႁဵတ်းၵၢၼ်မိူင်းထႆးသေသူင်ႇမႃးပၼ်တႃႇၵိၼ်တႃႇယူႇ တႃႇၼိုင်ႈပီ။ ၵူၼ်းထဝ်ႈသမ်ႉ ၵႂႃႇဢဝ်သိလ်ၶႃႈၼေႈ။ လုၵ်ႈဢွၼ်ႇယူႇတၢင်းမိူင်းထႆးသေ သူင်ႇမႃးပၼ်ဝႆႉ ဢမ်ႇတၼ်းလႆႈၸႂ်ႉၸၢႆႇသင်ၼႆၶႃႈ။ မိူဝ်ႈဝၼ်းၼၼ်ႉ ၵူၼ်းထဝ်ႈမႃးဢဝ်သိလ် တီႈၵျွင်းသေ ပွၵ်ႈမိူဝ်း ႁူဝ်ၶမ်ႈၵေႃႈ ၼႂ်းႁိူၼ်းယေးၼၼ်ႉ မၢၵ်ႇမိူဝ်မူတ်းၶႃႈ၊ ၵူၼ်းႁၢႆႉ ၼၼ်ႉ ၶဝ်သွၵ်ႈတဝ်မူတ်း။ တိူၵ်ႈၶူဝ်းၸိူဝ်းၼႆႉ ယႃႉၵွႆသွၵ်ႈမူတ်း ၸဝ်ႈႁိူၼ်းပေႃးႁႆႈၶႃႈဢေႃႈ”- ဝႃႈၼႆ။

ဢိင်ၼိူဝ် လွင်ႈၼႆႉ သုမ်းငိုၼ်းၵႂႃႇၵႃႈႁိုဝ် ၶမ်းၵႃႈႁိုဝ်တႄႉ ပႆႇႁူႉ။ ၵူၼ်းႁၢႆႉ ဢၼ်မႃးသွၵ်ႈတဝ် ဢဝ်ငိုၼ်းၶမ်းၵႂႃႇၼၼ်ႉ ပဵၼ်ၽႂ် ၸုမ်းလႂ် ၵေႃႈပႆႇႁူႉ။ တီႈႁိူၼ်းၼၼ်ႉသမ်ႉ မီးၵူၼ်းထဝ်ႈသွင်ၵေႃႉ ဢႃယုမွၵ်ႈ 60 ပီ ယူႇသဝ်းဝႆႉ ၵူၼ်းဝဵင်းလၢႆးၶႃႈ လၢတ်ႈ။

“ယူတီႈႁဝ်းၶႃႈ ၵူၼ်းမိူင်းႁၼ်ထိုင်တႄႉ သင်ႁႂ်ႈမၼ်းလီၼႆႉ သင်ၶၸဝ်ႈ၊ ၽူႈယႂ်ႇၵူၼ်းလူင်ပွၵ်ႉလႄႈ ၵူၼ်းၼုမ်ႇ ၸိူဝ်းၼႆႉ လီ ႁူမ်ႈၵၼ်သေ ၽွတ်ႇၸုမ်းဝႆႉ တႃႇတေၵႅတ်ႇၶႄ ပွၵ်ႉဝၢၼ်ႈၸဝ်ႈၵဝ်ႇၽႂ် မၼ်းၶိုၼ်းယဝ်ႉ။ သင်ပႂ်ႉပဵၼ်ပိူၼ်ႈမႃးႁဵတ်းပၼ်တႄႉ ဢမ်ႇလႆႈယဝ်ႉ”- ဝႃႈၼႆ။

ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း ပီပၢႆၼႆႉ ၼႂ်းမိူင်းတႆး ဢမ်ႇမီးလွင်ႈႁူမ်ႇလူမ်ႈ ဢုၼ်ႇၸႂ်  ၵမ်ႉရူတ်ႉၵႃး/ ရူတ်ႉၶိူင်ႈႁၢႆ၊ ၶဝ်လၵ်ႉၼႂ်းႁိူၼ်းယေး၊ ၸူၼ်ၵၼ်ၸွမ်းတႃႈၸွမ်းတၢင်း၊ ၶႃႈႁႅမ်ၵၼ် ထိုင်ၼႂ်းႁိူၼ်းယေး ၸိူဝ်းၼႆႉ မႃးၶိူဝ်းယႂ်း။ ပၢင်တေႃႇ လွင်း၊ ယႃႈမဝ်းၵမ် ၸိူဝ်းၼႆႉၵေႃႈ ယိုင်ႈၶႅၼ်းလိူင်ႇၼမ်ႁႅင်းထႅင်ႈ ၼႆယဝ်ႉ။