ၶွင်ႇသီႇသိုၵ်းမၢၼ်ႈ ယိုတ်းမိူင်း ဢဝ်ႁႅင်းသိုၵ်းၼပ်ႉႁူဝ်ပၢၵ်ႇ ၸွမ်းသွၵ်ႈတဝ် ၸုမ်း PDF တၢင်းၸဵင်ႇႁွင်ႇ ဝၼ်းတူၵ်း ဝဵင်းၼွင်ၶဵဝ် ႁၢဝ်ႈႁႅင်းလႄႈ ႁဵတ်းႁႂ်ႈၵူၼ်းပိုၼ်ႉတီႈ မႆႈၸႂ် ၵူဝ်ပဵၼ်ပၢင်တိုၵ်းထႅင်ႈ။
ႁၢင်လိူၼ်သႅပ်ႊထႅမ်ႊပိူဝ်ႊ 2022 ၼႆႉ သိုၵ်းမၢၼ်ႈ ဢဝ်ႁႅင်းသိုၵ်း ဢမ်ႇယွမ်း 300 ၶဝ်ႈသွၵ်ႈတဝ်တူင်ႉၼိုင်လမ်းလိုပ်ႈ ၸုမ်းၵႅတ်ႇၶႄ ၵူၼ်းမိူင်း PDF ၼႂ်းဢိူင်ႇၶိူဝ်းၼိမ်း၊ ဢိူင်ႇႁူဝ်ၶူဝ်၊ ဢိူင်ႇၵလၵွႆး၊ ဢိူင်ႇပၢင်တီး၊ ဢိူင်ႇသီႇၵူႇ၊ ဢိူင်ႇႁူဝ်ၼွင်လႄႈ ဢိူင်ႇၵိဝ်ႇ ဢၢင်း ၼႂ်းၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ႁၢဝ်ႈႁႅင်း ။
ၵူၼ်းဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်သိုၵ်းမၢၼ်ႈ မႃးတူင်ႉၼိုင်ႁႅင်းၼႆႉ မီးမွၵ်ႈ 4 ဝၼ်းယဝ်ႉ။ လႆႈႁၼ်ၵူၼ်း သိုၵ်းၶဝ် မႃးတူင်ႉၼိုင် ၼႂ်းဢိူင်ႇၶိူဝ်းၼိမ်း၊ ဢိူင်ႇႁူဝ်ၶူဝ်လႄႈ ၵလၵွႆးၼႆႉ ဢမ်ႇယွမ်း 300 ၵေႃႉ။ လိူဝ်ၼၼ်ႉတၢင်ႇဢိူင်ႇၵေႃႈ တူင်ႉၼိုင်ႁႅင်းၶႃႈဢေႃႈ။ ၵမ်ႈၼမ် ဢၼ်ၶဝ်တူင်ႉၼိုင်ၼႆႉ တေပဵၼ်ၼႂ်းထိူၼ်ႇ ၸွမ်းသွၵ်ႈတဝ် PDF ၼၼ်ႉၶႃႈဢေႃႈ။ ဢၼ် တူင်ႉၼိုင် ယူႇဝႆႉၼႂ်းမူႇဝၢၼ်ႈတႄႉ တေမီး 1 ပုၼ်ႈၵူၺ်း”- ဝႃႈၼႆ။
ထႅင်ႈၾၢႆႇၼိုင်ႈ တၢင်းၾၢႆႇ PDF ၸိူဝ်းၼႆႉၵေႃႈ တူင်ႉၼိုင်ႁႅင်း မိူၼ်ၵၼ် ၵမ်ႈၼမ် တေလုၵ်ႉတၢင်း ဝဵင်းလိူဝ်ႇမႃးတူင်ႉၼိုင် ။
“သိုၵ်းမၢၼ်ႈသမ်ႉ လုၵ်ႉတၢင်းတိူင်းဝဵင်းလိူဝ်ႇ၊ တိူင်းလႃႈသဵဝ်ႈ ၸိူဝ်းၼႆႉ မႃးတူင်ႉၼိုင်ၼမ်။ PDF သမ်ႉ လုၵ်ႉတၢင်းဝဵင်း လိူဝ်ႇမႃး။ မိူဝ်ႈဝႃး ဝၼ်းတီႈ 25 ၼႆႉ သိုၵ်းမၢၼ်ႈ လမ်းတီႉၵႃး PDF လမ်းၼိုင်ႈ တီႈၼႂ်းဢိူင်ႇၵိဝ်ႇဢၢင်း။ ၽိူဝ်ႇၶဝ်လမ်းလႆႈ ၵႃးၼၼ်ႉ တီႉလႆႈၵႃးလၢႆလၢႆၵူၺ်း ဢမ်ႇလႆႈသင်ၼႂ်းၵႃးၼၼ်ႉ”- ၵူၼ်းဝဵင်းၼွင်ၶဵဝ် သိုပ်ႇလၢတ်ႈ ၼႄၼင်ႇၼႆ။
ၵူၼ်းပိုၼ်ႉတီႈ ဢွၼ်ၵၼ်မႆႈၸႂ် ၵူဝ်တၢင်းသွင်ၾၢႆႇ ပဵၼ်ပၢင်တိုၵ်းၵၼ်ႁၢဝ်ႈႁႅင်းထႅင်ႈ ယွၼ်ႉဝႃႈ ယၢမ်းလဵဝ် ပဵၼ်ၶၢဝ်းၵၢၼ်လႄႈ ၵူဝ်ႁၢမ်းၵၢၼ် ၸိူဝ်းၼႆႉ။
ၽူႈၸွႆႈထႅမ် ၵူၼ်းပၢႆႈၽေး ဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ၵူဝ်ၶဝ်ပဵၼ် ပၢင်တိုၵ်းၵၼ်ၶႃႈဢေႃႈ။ ပေႃးပဵၼ်ပၢင် တိုၵ်းမႃး ၵူၼ်းထူပ်းၽေးၵေႃႈ တေၼမ်ၶႃႈ။ ယၢမ်းၼႆႉသမ်ႉ ပဵၼ်ၶၢဝ်းၵၢၼ် ၽွင်းလူဝ်ႇႁဵတ်းလႄႈ မႆႈၸႂ်ၵူဝ်ႁၢမ်းၵၢၼ်ၶႃႈ ဢေႃႈ”- ဝႃႈၼႆ။
ယၢမ်းလဵဝ် ၶွင်ႇသီႇသိုၵ်းမၢၼ်ႈ ယိုတ်းမိူင်း ဢၼ်တူင်ႉၼိုင် တၢင်းၸဵင်ႇႁွင်ႇဝၼ်းတူၵ်းဝဵင်းၼွင်ၶဵဝ်ၼႆႉ တေပဵၼ်တပ်ႉ 114-115 လႄႈ တၢင်းဝဵင်းတိူင်းဝဵင်းလိူဝ်ႇလႄႈ လႃႈသဵဝ်ႈ ၸိူဝ်းၼႆႉ။ ယဝ်ႉၵေႃႈ သိုၵ်းတဢၢင်း TNLA ၸိူဝ်းၼႆႉၵေႃႈ တူင်ႉၼိုင်ႁႅင်း မိူၼ်ၵၼ်။
မိူဝ်ႈဝၼ်းတီႈ 23/9/2022 ယၢမ်းဝၢႆးဝၼ်း ၶွင်ႇသီႇသိုၵ်းမၢၼ်ႈ ယိုတ်းမိူင်း ဢၼ်ပၵ်းတပ်ႉဝႆႉ တီႈဝၢၼ်ႈၶိူဝ်းၼိမ်းၼၼ်ႉ ယိုဝ်း မၢၵ်ႇ လူင်ၵႂႃႇတၢင်း ၾၢႆႇဢွၵ်ႇဝၢၼ်ႈၼမ်ႉသုၶ ၼႂ်းၸႄႈ ဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ဢမ်ႇယွမ်း 4 လုၵ်ႈ။