ၽူႈၼမ်းသိုၵ်းမၢၼ်ႈၵဝ်ႇ ၸွမ်ႁၢၼ်ဢူင်းတုၼ်ႇ (လိုဝ်ႈၵၢၼ်) လႄႈ ၽူႈယၢမ်ႈႁၢပ်ႇၵၢၼ်ပဵၼ်ၽွင်းတၢင်လၢႆလၢႆမိူင်း ၺႃးယိုဝ်းတၢႆ ၽွင်းမၼ်းၸၢႆးယူႇဝႆႉတီႈႁိူၼ်းမၼ်း တီႈၸႄႈဝဵင်းလၢႆႇ ဝဵင်းလူင်တႃႈၵုင်ႈ။

ၸုမ်းသိုၵ်းမုတ်းဝဵင်းလူင် Inya Urban Force ဝဵင်းတႃႈၵုင်ႈ ပိုၼ်ၽၢဝ်ႇပဵၼ်တၢင်းၵၢၼ်ဝႃႈ – ၶဝ်ႈယိုဝ်း ၸွမ်ႁၢၼ်ဢူင်းတုၼ်ႇ တီႈႁိူၼ်းမၼ်းမိူဝ်ႈၼႆႉဝၼ်းတီႈ 24/9/2022 မိူဝ်ႈၼႆႉ ယၢမ်းဝၢႆးဝၼ်း 3 မူင်း။ လုၵ်ႈၶူၺ်မၼ်းၸၢႆးသမ်ႉ ပဵၼ်ၶုၼ်သိုၵ်းလူင် ယႄးတေႇၸ ၊ ၽွင်းသိုၵ်း Inya Urban Force ၶဝ်ႈယိုဝ်းၼၼ်ႉလုၵ်ႈၶူၺ်မၼ်းၶိုၼ်းယိုဝ်းတွပ်ႇၶိုၼ်းလႄႈ လႆႈယိုဝ်းမႅၼ်ႈလူၺ်ႈဢမ်ႇလႆႈတင်ႈၸႂ်။ လုၵ်ႈၶူၺ်မၼ်းၵေႃႈတၢႆထင်တီႈဝႃႈၼႆ။

ၼႂ်းႁိူၼ်းၸွမ်ႁၢၼ်ၵဝ်ႇၼၼ်ႉ မီးၵူၼ်းႁိူၼ်းထႅင်ႈလၢႆလၢႆၵေႃႉယူႇသေတႃႉ ၸုမ်းသိုၵ်းမုတ်းဝဵင်းလူင် Inya Urban Force ဢမ်ႇလႆႈႁဵတ်းႁၢႆႉ တေႃႇပႃးဝႃႈၼႆ။

တီႈၸႄႈဝဵင်းလၢႆႇ ဝဵင်းလူင်တႃႈၵုင်ႈၼႆႉ ၵမ်ႈၼမ် ၽူႈၼမ်းသိုၵ်းမၢၼ်ႈၸၼ်ႉယႂ်ႇၶဝ်ယူႇသဝ်းဝႆႉလႄႈ တင်ႈတႄႇသိုၵ်းမၢၼ်ႈယိုတ်းဢႃႇၼႃႇဝၢၼ်ႈမိူင်းမႃး ပဵၼ်တီႈဢၼ်သိုၵ်းမၢၼ်ႈတမ်းလွင်ႈႁူမ်ႇလူမ်ႈၼႅၼ်ႈၼႃႇဝႆႉ။

လွင်ႈသိုၵ်းၵႅတ်ႇၶႄၵူၼ်းမိူင်းၶဝ်ႈယိုဝ်းပိုၼ်ႉတီႈ ႁူမ်ႇလူမ်ႈၼႅၼ်ႈၼႃၵမ်းၼႆႉလႆႈဝႃႈပဵၼ်ဢၼ်ၶဝ်ႈယိုဝ်းၽူႈၼမ်းသိုၵ်းမၢၼ်ႈၸၼ်ႉသုင်ထိုင်တၢႆလႆႈ ပဵၼ်ပွၵ်ႈဢွၼ်တၢင်းသုတ်းဝႃႈၼႆ။

ၸွမ်ႁၢၼ်ၵဝ်ႇ ဢူင်းတုၼ်ႇၼႆႉပဵၼ်ၵူၼ်းလမ်ႇလွင်ႈၼႂ်းၸုမ်းပွင်ၵၢၼ်သိုၵ်းမၢၼ်ႈၵေႃႉၼိုင်ႈ။ မၼ်းၸၢႆးယၢမ်ႈတႅမ်ႈလိၵ်ႈၸူး ၸွမ်ၸိၵ်းသိုၵ်းမၢၼ်ႈၸူဝ်းဝိၼ်းဝႃႈ – ၸွမ်းၼင်ႇပိူင်ငဝ်ႈပိုင်းမိူင်း 2008 သေ သိုၵ်းမၢၼ်ႈၼႆႉဢမ်ႇတၢပ်ႈယိုတ်းဢႃႇၼႃႇ ၸိုင်ႈမိူင်းၵေႃႈ ၵုမ်းဝၢၼ်ႈမိူင်းလႆႈယူႇဝႃႈၼႆ။

ၸွမ်ႁၢၼ်ၵဝ်ႇ ဢူးဢူင်းတုၼ်ႇၼႆႉ ပဵၼ်လုၵ်ႈႁဵၼ်းၸၼ်ႉၸွမ်သိုၵ်း ၸုပ်ႈ 15 ။  ယၢမ်ႈပဵၼ်ၽွင်းတၢင်လူင်မိူင်းသီလင်းၵႃ၊ မိူင်းပင်းၵလႃးတေႉသ်၊ မိူင်းမေႃႊလၻၢႆႉၾ် လႄႈ မိူင်းဢႅပ်ႉၾရိၵၸၢၼ်းၸိူဝ်းၼႆႉမႃး ၸုမ်းသိုၵ်းမုတ်း Inya Urban Force ပိုၼ်ၽၢဝ်ႇဝႆႉၼင်ႇၼႆ။

ၶေႃႈမုၼ်း- VOA