ၵူတ်းဝၢၼ်ႈ ၼႂ်းၸႄႈဝဵင်းၼွင်ၶဵဝ် ဢၼ်ၵႂႃႇႁႃၶီႈၶင်ႈသေ ယဵပ်ႇၺႃးမၢၵ်ႇတၢႆထင်တီႈၼၼ်ႉ ၽႂ်ဢဝ်တူဝ်တၢႆၵႂႃႇ ၽင်ဝႆႉတီႈလႂ် ဢမ်ႇႁၼ်ၶုမ်ပႃႇႁဵဝ်ႈလႄႈ ပေႃႈမႄႈ လုၵ်ႈလၢင်းၸိူဝ်းၵိုတ်းတၢင်းလင် ဢွၼ်ၵၼ်ၸွမ်းၶႆႈ ႁႃတူဝ်တၢႆ ႁၢၼ်ႉတေႃႇထိုင်ဝၼ်းမိူဝ်ႈၼႆႉ ယင်းပႆႇႁၼ်။

မိူဝ်ႈဝၼ်းတီႈ 13/9/2022 ယၢမ်းၵၢင်ၼႂ် 10 မူင်း ၸၢႆးဢွင်ႇၸဵင်း ဢႃယု 45 ပီ၊ ပႃး လုၵ်ႈၸၢႆး ပၢၼ်ဢႃႇယု ဢႃယု 17 ပီ ၵေႃႉၼိုင်ႈ ၵႂႃႇႁႃၶီႈၶင်ႈၼႂ်းထိူၼ်ႇ။ သမ်ႉၵႂႃႇယဵပ်ႇၺႃးမၢၵ်ႇ ၾၢႆႇႁွင်ႇ ဝၢၼ်ႈပဵင်းဢွႆႈ ယၢၼ် ဝၢၼ်ႈမွၵ်ႈ 6 လၵ်း သေ လႆႈလူႉတၢႆၵႂႃႇထင်တီႈ။ လုၵ်ႈၸၢႆးမၼ်း လႅၼ်ႈမႃးႁႃ ၵူၼ်းဝၢၼ်ႈ ဢၢၼ်းၵႂႃႇၶႆႈတူဝ်တၢႆၶိုၼ်း ၵႂႃႇႁႃဢမ်ႇၺႃးတူဝ်တၢႆ ႁၢၼ်ႉတေႃႇထိုင်ဝၼ်းမိူဝ်ႈၼႆႉ။

ၵူၼ်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၶၢပ်ႈတူဝ်တၢႆမၼ်းၸၢႆးႁၢႆဝႆႉ လႅပ်ႈပဵၼ်ၸုမ်း PDF ဢဝ်ၵႂႃႇၾင်ပႅတ်ႈယဝ်ႉ။ ၵေႃႉပဵၼ်မေးၼၢင်းလႄႈ လုၵ်ႈၸၢႆး ဢိၵ်ႇလူၺ်ႈ ပေႃႈမႄႈပီႈၼွင်ႉ ၸိူဝ်ႉၶိူဝ်းတႄႉ ၶႂ်ႈထူပ်းႁၼ် ၶိုၼ်းၶၢပ်ႈတူဝ်တၢႆ မၼ်းၸၢႆးၶႃႈဢေႃႈ၊ လုၵ်ႈမၼ်း ဢၼ်ၵႂႃႇၸွမ်းမၼ်းၸၢႆးၼၼ်ႉ ဝႃႈ ဢူႈၶဝ် မၢတ်ႇၸဵပ်းႁၢဝ်ႈႁႅင်းသေ လႆႈလူႉတၢႆ ထင်တီႈဝႃႈၼႆဢေႃႈ။ ၽိူဝ်ႇႁဝ်းၶႃႈႁွင်ႉၵၼ်ၵႂႃႇႁႃ သမ်ႉႁႃဢမ်ႇႁၼ်၊ ႁႃၶုမ်ႈပႃႇႁဵဝ်ႈၵေႃႈဢမ်ႇႁၼ်”- ဝႃႈၼႆ။

ၸၢႆးဢွင်ႇၸဵင်းၼႆႉ ပဵၼ်ၵူၼ်းဝၢၼ်ႈပဵင်းဢွႆႈ၊ ယၢမ်းလဵဝ် ၵေႃႉပဵၼ်မေးၼၢင်းလႄႈ ၵေႃႉပဵၼ်လုၵ်ႈၸၢႆးလဵဝ် ပဵၼ်ၼမ်ႉႁူၼမ်ႉတႃ ယွၼ်ႉႁႃတူဝ်တၢႆ ၵေႃႉပဵၼ်ပေႃႈ ၵေႃႈဢမ်ႇႁၼ်။

ၼႂ်းၸႄႈဝဵင်းၼွင်ၶဵဝ်ၼႆႉ မီးၸုမ်းဢူၺ်းလီသိုၵ်းပွတ်းႁွင်ႇ – မိူၼ်ၼင်ႇ – သိုၵ်း SSPP, သိုၵ်းလွႆ TNLA တင်း သိုၵ်းၶၢင်KIA ၵႂႃႇမႃးတူင်ႉၼိုင်ႈ။ မိူဝ်ႈၵူႈပွၵ်ႈမီးပႃးသိုၵ်း RCSS သေတႃႉ ယၢမ်းလဵဝ် သိုၵ်းၵႅတ်ႇၶႄႇ ၵူၼ်းမိူင်း PDF ဢၼ်လုၵ်ႉတၢင်း မိူင်းမၢၼ်ႈ မၼ်းတလေး(ဝဵင်းလိူဝ်ႇ) ငိူင်ႉပၢႆႈ ၸုမ်းသိုၵ်းမၢၼ်ႈ ယိုတ်းဢႃႇၼႃႇ သေ ၶိုၼ်ႈမႃးတူင်ႉၼိုင်ၵေႃႈမီး။ ၵူၼ်းဝၢၼ်ႈတႄႉ ဝႃႈ ပဵၼ်သိုၵ်းၸုမ်းၼႆႉ ယဝ်ႉ ဢဝ် တူဝ်တၢႆ ၸၢႆးဢွင်ႇၸဵင်း ၵႂႃႇၾင်မူၵ်း ပႅတ်ႈဝႃႈၼႆ။