ၵႄႇသိပ်းႁိူၼ်း (ဆယ်အိမ်မှူး) ဝဵင်းမူႇၸေႊ ၺႃးတီႉ ၵေႃႉၼိုင်ႈ

97

မီးၸုမ်းဢမ်ႇႁူႉၾၢႆႇ တီႉၺွပ်းၵုမ်းတူဝ် ၵႄႇသိပ်းႁိူၼ်း ၵႂႃႇၵေႃႉၼိုင်ႈ တီႈပွၵ်ႉပၢႆးၸၢၵ်ႈ ဝဵင်းမူႇၸေႊ တေႃႇထိုင်ယၢမ်းလဵဝ် ပႆႇ ပွႆႇတူဝ်ၶိုၼ်း။

Photo Tung Huay Li – ဝဵင်းမူႇၸေႊ

ပူၼ်ႉမႃး မိူဝ်ႈဝၼ်းတီႈ 14/9/2022 ၼၼ်ႉ မွင်ႇတႃႇတူး ဢႃယု မွၵ်ႈ 50 ပီ ၵႄႇသိပ်းႁိူၼ်း တီႈပွၵ်ႉပၢႆးၸၢၵ်ႈ ဝဵင်းမူႇၸေႊ ၸိုင်ႈတႆးပွတ်းႁွင်ႇ ထုၵ်ႇၸုမ်းဢမ်ႇႁူႉၾၢႆႇ တီႉၺွပ်းၵုမ်းတူဝ်ၵႂႃႇ ယွၼ်ႉသင်လႄႈတီႉ ဢၼ်ဝႃႈၼၼ်ႉ ပႆႇႁူႉ။  

ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မီးၵူၼ်းဢမ်ႇႁူႉၾၢႆႇ တီႉဢဝ်တူဝ်မၼ်းၸၢႆးၵႂႃႇ။ လႆႈႁူႉဝႃႈ ၸုမ်း ၼၼ်ႉ တေၶဝ်ႈၵႂႃႇတီႉဢဝ်တူဝ်မၼ်းၸၢႆးတီႈႁိူၼ်း မၼ်းၸၢႆးဢမ်ႇယူႇႁိူၼ်းသေ ၶဝ်ၵႂႃႇ ထူပ်းႁၼ်မၼ်းၸၢႆး ၸွမ်းတၢင်းသေ တီႉဢဝ်တူဝ်ၵႂႃႇ။ မၼ်းၸၢႆးၼႆႉ လႆႈႁူႉဝႃႈ ပဵၼ်ၵူၼ်းၵႆႉၶဝ်ႈဢွၵ်ႇ ၸွမ်းပလိၵ်ႈ၊ ၾၢႆႇႁူမ်ႇလူမ်ႈလႄႈ သိုၵ်းမၢၼ်ႈ ၸိူဝ်းၼႆႉ”- ဝႃႈ ၼႆ။

ဢိင်ၼိူဝ် လွင်ႈၼႆႉ ပဵၼ်ၸုမ်းလႂ် ၼမ်ႉမိုဝ်းၽႂ် တီႉၵႂႃႇ ဢၼ်ဝႃႈၼၼ်ႉ ပႆႇႁူႉ။ တေႃႇထိုင် ယၢမ်းလဵဝ် ပႆႇပွႆႇတူဝ်။ မွင်ႇတႃႇတူးၼႆႉ ပဵၼ်ၵႄႇသိပ်းႁိူၼ်း (ၸၢဝ်းမၢၼ်ႈ) မၼ်းၸၢႆး ပိုတ်ႇဝႆႉ ႁၢၼ်ႈမႄးၵႃး တီႈပွၵ်ႉပၢႆးၸၢၵ်ႈ ၼႆယဝ်ႉ။

မိူဝ်ႈဝၼ်းတီႈ 22/8/2022 ၼၼ်ႉ မီးၸုမ်းယိပ်းၵွင်ႈ ဢမ်ႇႁူႉၾၢႆႇၸုမ်းၼိုင်ႈ ၶဝ်ႈတီႉၺွပ်း ၸဝ်ႈၶွင်ႁၢၼ်ႉၶၢႆသိူဝ်ႈၶူဝ်း သွင် ၽူဝ်မေးၵႂႃႇ ႁိမ်းႁူင်းယႃလူင် တီႈပွၵ်ႉၸၢၼ်း ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။

မိူဝ်ႈဝၼ်းတီႈ 21/8/2022 ၼၼ်ႉၵေႃႈ ႁၢၼ်ႉၶၢႆယႃႈယႃ တီႈပွၵ်ႉႁွင်ႇၼႆႉ မီးၸုမ်းယိပ်းၵွင်ႈ ဢမ်ႇႁူႉၾၢႆႇ ၶဝ်ႈတီႉၵႂႃႇၵေႃႉၼိုင်း။ ဝၼ်းတီႈ 8/8/2022 သမ်ႉ ၽူႈမီးၸၼ်ႉ ၾၢႆႇၵဵပ်းၶွၼ်ႈလူင်ပွင်ၸိုင်ႈမၢၼ်ႈ (အကောက်ခွန်အရာရှိ) ထုၵ်ႇၸုမ်း ဢမ်ႇႁူႉၾၢႆႇ တီႉၺွပ်းၵုမ်းတူဝ်ၵႂႃႇ 3 ၵေႃႉ တီႈဝဵင်းမူႇၸေႊ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ