ပီႈၼွင်ႉၵူၼ်းဝၢၼ်ႈၼွင်ယူမ်း ဢိူင်ႇမိူင်းၼိမ် ဝဵင်းၵေးသီး ၶႂ်ႈႁႂ်ႈသိုၵ်းမၢၼ်ႈပၼ်တူတ်ႈတၢမ်ႇ ၵူၼ်းသိုၵ်းၵေႃႉဢၼ်လူင်းမိုဝ်းပူၼ်ႉပႅၼ်ၽၼ်းလုင်းသူၺ်ႇထုၼ်း ထိုင်တီႈလႆႈၶဝ်ႈယူတ်းယႃတူဝ်တီႈႁူင်းယႃၼၼ်ႉ ဝႃႈၼႆ။
မိူဝ်ႈဝၼ်းတီႈ 31/8/2022 ယၢမ်းဝၢႆးဝၼ်း 1 မူင်း လုင်းသူၺ်ႇထုၼ်း ဢႃယု 67 ပီ ၵူၼ်းဝၢၼ်ႈၼွင်ယူမ်း ဢိူင်ႇမိူင်းၼိမ် ၸႄႈဝဵင်းၵေးသီး ဢဝ်ဝူဝ်းၵႂႃႇလဵင်ႉၼွၵ်ႈဝၢၼ်ႈ၊ သိုၵ်းမၢၼ်ႈဢၢင်ႈယိုဝ်းဝူဝ်းမၼ်းလႄႈ မၼ်းၸၢႆးၶဝ်ႈႁၢမ်ႈ ထိုင်တီႈၺႃးသိုၵ်းမၢၼ်ႈ ၶလယ 131 – 3 ၵေႃႉ ၽၼ်းၶေႃးမၼ်းၸၢႆးမၢတ်ႇၸဵပ်းႁႅင်းလႆႈၵႂႃႇယူတ်းယႃတူဝ်၊ လႆႈယဵပ်ႉ 40 ႁွႆးပၢႆ။
ၽွင်းလုင်းသူၺ်ႇထုၼ်း မီးတီႈႁူင်းယႃ သိုၵ်းမၢၼ်ႈ မႃးပၼ် ၵႃႈယူတ်းယႃ 1 သႅၼ်ပျႃးၵူၺ်း ၊ လွင်ႈၼႆႉ ပီႈၼွင်ႉ ၊လုၵ်ႈလၢင်းဝႃႈ ဢမ်ႇမီးလွင်ႈၽဵင်ႇပဵင်း ပဵၼ်ထမ်း။
ၵူၼ်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ – “ဢမ်ႇမီးလွင်ႈၽဵင်ႇပဵင်းၶႃႈ လွင်ႈသိုၵ်းမၢၼ်ႈၶဝ်ႁဵတ်းၼႆႉ ႁဵတ်းၵေႃႈ ၶဝ်ႁဵတ်းႁၢႆႉ တေႃႇပိူၼ်ႈ ၵတ်းၵႃႈ ဢမ်ႇတၢႆ ၵွၼ်ႇၶႃႈဢေႃႈ။ ပေႃးထိုင်ဝႃႈ လုင်းသူၺ်ႇထုၼ်းတၢႆၼႆၵေႃႈ တၢႆလၢႆလၢႆ ၵူၺ်းၶႃႈဢေႃႈ။ မၼ်းပဵၼ်လၢႆးတဵၵ်းတဵင်ၵၼ်ၵူၺ်း။ တေဢဝ်ၶူဝ်းၶွင်လၢႆ ၶွင်ၵူၼ်းမိူင်းၵိၼ်ထႅင်ႈလူးၵွၼ်ႇ လၢႆးႁဵတ်းၶဝ်ၼႆႉ”- ဝႃႈၼႆ။
လုင်းသူၺ်ႇထုၼ်းၼႆႉ လႆႈၶဝ်ႈယူတ်းယႃတူဝ်တီႈႁူင်းယႃ 9 ဝၼ်း။ သိုၵ်းမၢၼ်ႈမႃးၸႂ်း 2 ပွၵ်ႈ ၊ ၼိုင်ႈပွၵ်ႈၸွႆႈ 5 မိုၼ်ႇပျႃး။ ၵႃႈယူတ်းယႃတူဝ်ပေႃးၼပ်ႉတႄႉတႄႉၸိုင် တေသဵင်ႈၼပ်ႉႁူဝ်သိပ်းသႅၼ်ပျႃး။ ၵူၺ်းၵႃႈၾၢႆႇပၢႆးယူႇလီ ဢီးလူႁၼ်ၸႂ်သေလႄႈ ဢမ်ႇမၵ်းၶၢၼ်းသင်တီႈလုင်းသူၺ်ႇထုၼ်း။ မၼ်းၸၢႆးသုၵ်ႈမိုဝ်းမေႃယႃၶဝ်မႃး 5 မိုၼ်ႇပျႃးၵူၺ်း – ပီႈၼွင်ႉၸမ်ၸႂ်မၼ်းၸၢႆးလၢတ်ႈထႅင်ႈၼင်ႇၼႆ။
“ၶဝ်ဝႃႈ ၶဝ်ၺွပ်းၵူၼ်းၶဝ် ဢၼ်ႁဵတ်းႁၢႆႉတေႃႇ လုင်းသူၺ်ႇထုၼ်းၼၼ်ႉဝႆႉယဝ်ႉ တေဢဝ်လိူင်ႈ ဝႃႈၸိူင်ႉၼၼ် လွင်ႈၼႆႉ ၶဝ် ၺွပ်းတႄႉႁႃႉ ဢမ်ႇၺွပ်း ဢၼ်ဝႃႈၼၼ်ႉ ၽႂ်ၵေႃႈ ဢမ်ႇလႆႈႁူႉႁၼ်ၸွမ်းလူး။ ႁဝ်းၶႃႈ တုၵ်းယွၼ်း ႁႂ်ႈမၼ်းပဵၼ် လွင်ႈၽဵင်ႇ ပဵင်း ၵူၼ်းသိုၵ်းၶဝ် ဢၼ်ႁဵတ်းႁၢႆႉတေႃႇၵူၼ်းမိူင်းၼၼ်ႉၵေႃႈ ႁႂ်ႈလႆႈႁပ်ႉ တူတ်ႈတၢမ်ႇတၢင်းၽိတ်းၼၵ်းၼၵ်းၼႃၼႃ။ ႁႂ်ႈ ၵူၼ်းမိူင်းလႆႈႁူႉႁၼ်ၸွမ်းၶႃႈဢေႃႈ”- ၵူၼ်းၵေးသီး သိုပ်ႇလၢတ်ႈၼႄၼင်ႇၼႆ။
လုင်းသူၺ်ႇထုၼ်းၼႆႉ ယၢမ်းလဵဝ် ၸိုၼ်ႈၶႅၼ်းယူႇလီယဝ်ႉလႄႈ လႆႈမႃးယူႇႁိူၼ်းၶိုၼ်းယဝ်ႉသေတႃႉ 1 ဝူင်ႈ 1 ပွၵ်ႈ တေလႆႈၵႂႃႇၸူးမေႃယႃသႂ်ႇယႃႈယႃပၼ်လႄႈ တၵ်းတေလႆႈၸႂ်ႉငိုၼ်းတွင်းထႅင်ႈလႄႈပဵၼ်ဢၼ်ယၢပ်ႇၽိုတ်ႇၵိၼ်းၸႂ်ဝႆႉဝႃႈၼႆ။
သိုၵ်းမၢၼ်ႈ 3 ၵေႃႉ ဢၼ်ၽၼ်းလုင်းသူၺ်ႇထုၼ်းၼႆႉ ပဵၼ်လုၵ်ႈတပ်ႉၶလယ 131 ၊ ပဵၼ်တပ်ႉဢၼ်ယူႇပႃႈတႂ်ႈ ငဝ်ႈငုၼ်းၵုမ်းၵမ် ၽႅၼ်ၵၢၼ်ယၼ်ႇ သိုၵ်း ၸၵၶ 2 မိူင်းၼွင် ။ ၵွပ်ႈၼႆထုၵ်ႇလႆႈႁပ်ႉတူတ်ႈတၢမ်ႇၸွမ်းမၢႆမီႈ၊ ႁႂ်ႈလႆႈလွင်ႈၽဵင်ႇပဵင်းပဵၼ်ထမ်း ၵူၼ်းၵေးသီးလၢတ်ႈၼင်ႇၼႆ။
