ၽူႈလၵ်ႉၸၵ်ႉၶုတ်ႈၼမ်လိူင်ႇ  ၵူၼ်းမိူင်းသၢတ်ႇ  လႆႈႁူမ်ႈၵၼ်ဢဝ်ႁူမ်ႇလူမ်ႈႁင်းၵူၺ်း

 ၼႂ်းၸႄႈဝဵင်းမိူင်းသၢတ်ႇ မိူင်းတႆးပွတ်းဢွၵ်ႇၶူင်း ၽူႈလၵ်ႉၸၵ်ႉၶုတ်ႈ ၶီႈယႃႈၶီႈၾိၼ်ႇ လိူင်ႇၼမ် ဢမ်ႇဝဵၼ်ႉ ဝၼ်းဝဵၼ်ႉၶိုၼ်း ဢမ်ႇလိူၵ်ႈႁိူၼ်းလင်လဵၵ်ႉလင်ယႂ်ႇ ၶဝ်ႈလၵ်ႉတိၵ်းတိၵ်းလႄႈ ၵူၼ်းမိူင်းဢမ်ႇၸၢင်ႈၸႂ်ယႂ်ႇၽႂ် လႆႈႁူမ်ႈၵၼ်ၽွတ်ႈၸုမ်းႁူမ်ႇလူမ်ႈဝၢၼ်ႈဢိူင်ႇသေ ယၢမ်းၵၢင်ၶိုၼ်းပၼ်ႇလဵပ်ႈဢဝ်ႁူမ်ႇလူမ်ႈႁင်းၵူၺ်း ။

တင်ႈတႄႈ ဝၼ်းတီႈ 12/9/2022 မႃး ၵူၼ်းမိူင်းသၢတ်ႇ  ၽွတ်ႈၸုမ်းႁူမ်ႇလူမ်ႈသေ ပၼ်ႇလဵပ်ႈၼႂ်းဝၢၼ်ႈၼႂ်းဢိူင်ႇ ဢဝ်ႁူမ်ႇလူမ်ႈပၼ်ၵူၼ်းဝၢၼ်ႈၵူၼ်းဝဵင်း ၼိုင်ႈၶိုၼ်း 3 ၵမ်း ၊ ၽူႈလၵ်ႉၵူၼ်းၸူၼ်ဢမ်ႇပေႃးႁတ်းတူင်ႉၼိုင် ဝႃႈၼႆ။

ၽူႈၶဝ်ႈၸုမ်းဢဝ်လွင်ႈႁူမ်ႇလူမ်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸုမ်းႁဝ်းမီးမွၵ်ႈ 16 ၵေႃႉ၊  ၵူၼ်းၸၢႆးလၢႆလၢႆ ။ ဝၢၼ်ႈလႂ်ဝၢၼ်ႈၼၼ်ႉတႄႉလူဝ်ႇႁဵတ်းၸုမ်းသေပႂ်ႉၽႂ်ပႂ်ႉမၼ်းလီဢေႃႈ ။ ပေႃးထုၵ်ႇလၵ်ႉထုၵ်ႇလိူတ်ႈမႃး တမ်ႉဢမ်ႇမီးၽႂ်မႃးႁေႉမႃးၵင်ႈပၼ်ႁဝ်းၶႃႈၼႃႇ ။ ၼႆႉတႄႉတိူင်ႇပၢင်ႇၽူႈယႂ်ႇၵူၼ်းလူင်ၼႂ်းဝၢၼ်ႈၼႂ်းဝဵင်းသေ ႁဵတ်းၵႂႃႇၼၼ်ႉၼႃႇ။ ပေႃးပႂ်ႉႁဵတ်းၼႆ ၵူၼ်းလၵ်ႉၵေႃႈတေဢမ်ႇပေႃးၵျၢမ်းၼၼ်ႉၼႃႇ ။ ႁဝ်းမႃးၸူႉၵၼ်တီႈလုမ်းၽူႈၵွၼ်းပွၵ်ႉ။  ႁဝ်းပႆသေလဵပ်ႈၸွမ်းၵိဝ်ႇ ၼႂ်းဝၢၼ်ႈ၊ 9 မူင်းၵမ်းၼိုင်ႈ 12ၵမ်းၼိုင်ႈ ၼႃႈမိူင်းၸမ်လႅင်းၵမ်းၼိုင်ႈဢေႃႈ။ ဢၼ်ဢဝ်လွင်ႈႁူမ်ႇလူမ်ႈႁင်းၵူၺ်း တိုၵ်ႉမီး ဝၢၼ်ႈဝဵင်းၵွင်း ဝၢၼ်ႈဝဵင်းၼိူဝ် ဝၢၼ်ႈၵၢင်ၸိူဝ်းၼႆႉ ”  ဝႃႈၼႆ။

ၼႂ်းဝဵင်းမိူင်းသၢတ်ႇၼႆႉ ၶီႈယႃႈၶီႈၾိၼ်ႇၼမ်။ ယူႇၸွမ်းၼႂ်းထဵင်ၼႃး ၸွမ်းၶႅပ်ႇဝဵင်း ၸွမ်းၸွၵ်ႉၸွမ်းၵိဝ်ႇ ၊ ၵွပ်ႈပိူဝ်ႈဢမ်ႇႁဵတ်းၵၢၼ်ႁဵတ်းငၢၼ်းလႄႈ ပေႃးတွင်ႉမႆႈမႃး ဢႅဝ်ႇႁႃယွၼ်းၵိၼ် ၊ ၵမ်ႈၽွင်ႈ ဢမ်ႇယွၼ်းဢမ်ႇလၢတ်ႈသင် ႁၼ်သင်ဢဝ်ၼၼ်ႉ ဢမ်ႇဝႃႈတေႃႇၼႃႈလႄႈလပ်ႉလင် ဢဝ်တိၵ်းတိၵ်း၊ တေၵႂႃႇၵၢတ်ႇၵႂႃႇသႃး ၵႂႃႇၶႅၵ်ႇလီပၢင်ၸႃႉၵူၺ်းၵေႃႈ ဢမ်ႇၸၢင်ႈထၢင်ႇႁၢင်ႈၵႂႃႇမႃးလႆႈ လီလီ ၊ တႄႇဢဝ်ၽႃႁူမ်ႇမေႃႈ တေႃႇထိုင် ၶူဝ်းၶွင်မီးၵႃႈၶၼ် ၊ ငိုၼ်းၶမ်းၸိူဝ်းၼႆႉ လႆႈသင် သၢင်ႇတေႃႇသင် ဢဝ်မူတ်း  ၵူၼ်းမိူင်းသၢတ်ႇလၢတ်ႈၼင်ႇၼႆ။  

“ ပေႃးႁဝ်းႁၼ်ၶီႈယႃႈၸိူဝ်းယူႇၸွမ်းၼႂ်းတူင်ႈၼႂ်းၼႃးၸိူဝ်းၼၼ်ႉတႄႉ ႁဝ်းပၼ်ၾၢင်ႉၶဝ် ႁႂ်ႈပၢႆႈဢေႃႈ ။  ၵွပ်ႈၼႆပေႃးၶဝ်ႁၼ်ႁဝ်းၶဝ်ပၢႆႈဢွၼ်တၢင်းၵေႃႈမီး။  တီႈယူႇၶဝ်ၼၼ်ႉ လႆႈႁၼ်မီး မိတ်ႈဝႃႇ တဝ်ႈယႃႈ ၶီႈၽဝ်ႇလႅၼ်းယႃႈၸိူဝ်းၼႆႉ။ ထႅင်ႈၶမ်ႈၼိုင်ႈသမ်ႉ လႆႈႁၼ်ၵူၼ်းလၵ်ႉၵႆႇ ။ ၵူၺ်းၵႃႈ ဢမ်ႇၺွပ်းလႆႈ မၼ်းၽႃႈၵႆႇမၼ်းသေလႅၼ်ႈပၢႆႈဢေႃႈ။ သင်ႁဝ်းႁၼ်မိူဝ်ႈၶဝ်လၵ်ႉၸိူဝ်းၼၼ်ႉတႄႉ  ႁဝ်းတေပွင်ႇထိုင် ပလိၵ်ႈ ႁႂ်ႈၸတ်းၵၢၼ်ၵမ်းလဵဝ်ယဝ်ႉၶႃႈ” ၽူႈၶဝ်ႈၸုမ်းဢဝ်လွင်ႈႁူမ်ႇလူမ်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈထႅင်ႈၼင်ႇၼႆ။

တီႈမိူင်းသၢတ်ႇၼႆႉ မိူဝ်ႈၵူႈပွၵ်ႈ ၵူၼ်းယူႇၸွမ်းၶၢင်ႈတၢင်း မီးယူႇၼႆသေတႃႉၵေႃႈဢမ်ႇမီးၼမ်ပဵင်းပီၼႆႉ။ ဢၼ်ၶဝ်ႈလၵ်ႉၶူဝ်းၶွင်ၼႂ်းႁိူၼ်းၵေႃႈဢမ်ႇမီးၼမ်   ။ ပီၼႆႉတႄႉ ၵူၼ်းၼွၼ်းၶၢင်ႈတၢင်းၼမ်းလိူဝ်ၵူႈပီ မီးၵူႈပွၵ်ႉၵူႈၵိဝ်ႇ။ တေႃႈၼင်ႇၶႅင်းလဵၵ်းဢၼ်ႁေႉႁွင်ႈၼမ်ႉၼႃႈႁိူၼ်း လဵၵ်းၽိူၵ်ႇဢၼ်ႁေႉၽၵ်းတူ သၢႆၾႆး လွတ်ႇၾႆးၸိူဝ်းၼႆႉယင်းဢမ်ႇဝႆႉ   လၵ်ႉဢဝ်တိၵ်းတိၵ်း ႁၢႆၵူႈဝၼ်း ၵူၼ်းမိူင်းသၢတ်ႇလၢတ်ႈၼင်ႇၼႆ။