မၢၵ်ႇတႅၵ်ႇတိူဝ်ႉ ၽူႈၸၢႆး ဢႃယုမွၵ်ႈ 40 ပီ ၵေႃႉၼိုင်ႈ လူႉတၢႆထင်တီႈ ႁိမ်းလွႆသၢမ်သိပ် ဝဵင်းၵူတ်ႉၶၢႆ။
မိူဝ်ႈဝႃး ဝၼ်းတီႈ 15/9/2022 ယၢမ်းဝၢႆးဝၼ်း 4 မူင်း မီးၽူႈၸၢႆး ဢႃယုမွၵ်ႈ 40 ပီ ၵေႃႉၼိုင်ႈ ႁေႃႈရူတ်ႉၶိူင်ႈ မႃးလမ်းၼိုင်ႈ မႃးၵိုတ်းတီႈႁိမ်းလွႆသၢမ်သိပ်း ၼႂ်းၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်း ႁွင်ႇသေ ပႆၶဝ်ႈၼႂ်းထိူၼ်ႇ ႁိမ်းၼၼ်ႉၵႂႃႇၵမ်းၼိုင်ႈၵေႃႈ မၢၵ်ႇတႅၵ်ႇတိူဝ်ႉသႂ်ႇ လူႉတၢႆထင်တီႈ။
ၵူၼ်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ တူၺ်းတႄႉ မၼ်းၸၢႆး လႅပ်ႈပဵၼ်သိုၵ်းၶၢင်ဢေႃႈ။ လႅပ်ႈမၼ်းဢၢင်ႈမႃးႁၢင်ႈမၢၵ်ႇၼေႈ။ ႁၢင်ႈယဝ်ႉလႅပ်ႈမၼ်းတဵၵ်းၺႃး ရီႊမူတ်ႉမၼ်းႁိုဝ်ၵေႃႈဢမ်ႇႁူႉ၊ ႁဵတ်းၼၼ်ႉသေတႅၵ်ႇသႂ်ႇမၼ်းၶိုၼ်းၶႃႈၵႂႃႈထၢင်ႇတႄႉ ” – ဝႃႈၼႆ။
ၽူႈၸၢႆး ဢႃယု မွၵ်ႈ 40 ပီ ဢၼ်ထုၵ်ႇမၢၵ်ႇတႅၵ်ႇတိူဝ်ႉသႂ်ႇ လူႉတၢႆၼႆႉ မၼ်းၸၢႆး သႂ်ႇၶူဝ်းၵူၼ်းႁိူၼ်း ပႃးထူင် ၶီႇရူတ်ႉ ၶိူင်ႈမႃးၵေႃႉလဵဝ် ဝႃႈၼႆ။
မိူဝ်ႈဝႃး ဝၼ်းတီႈ 6/9/2022 ယၢမ်းၵၢင်ၼႂ် 4:30 မူင်း – 10:30 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် KIA ပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈႁိမ်းၼမ်ႉၽၵ်းၵႃ။ ထိုင်မႃးယၢမ်းၵၢင်ၶမ်ႈ 7:30 မူင်း သွင်ၾၢႆႇပဵၼ်ပၢင်တိုၵ်းၵၼ်ထႅင်ႈ တီႈ ႁိမ်း(လၢၼ်ႇ) တူဝ်းၵဵၵ်ႉၵူတ်ႉၶၢႆ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈမေႃႇႁဵၵ်ႇ 3 ၵေႃႉ ၼႂ်းၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ၼႆယဝ်ႉ။