သိုၵ်းမၢၼ်ႈၽႅၼ်ၵၢၼ်တေသင်ႇၵူၼ်းပၢႆႈၽေးသိုၵ်းတီႈၵျွၵ်ႉမႄး ပွၵ်ႈႁိူၼ်းယေး ဝၢႆးၶၢဝ်းၾူၼ်  

သိုၵ်းမၢၼ်ႈၽႅၼ်ၵၢၼ် တေသင်ႇႁႂ်ႈၵူၼ်းပၢႆႈၽေးသိုၵ်းပွၵ်ႈၶိုၼ်းႁိူၼ်းယေးၽႂ်0.မၼ်း ၊ ၼႂ်းလိူၼ်တေမႃး သဵင်ႈ ႁႂ်ႈယဝ်ႉတူဝ်ႈ၊ ၵူၼ်းပၢႆႈၽေးသိုၵ်းပႆႇမီးလွင်ႈႁူမ်ႇလူမ်ႈလႄႈ မႆႈၸႂ်တႃႇပွၵ်ႈၶိုၼ်းႁိူၼ်းယေး။  

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ၾၢႆႇလူင်ပွင်ၸိုင်ႈၶဝ်ဝႃႈ ၶႂ်ႈႁႂ်ႈမိူဝ်းယဝ်ႉ ပေႃး ဢွၵ်ႇဝႃႇမႃးၼႆႉ။ ၶဝ်ဢမ်ႇၶႂ်ႈႁႂ်ႈမီး  ၵူၼ်းပၢႆႈၽေးသိုၵ်းယဝ်ႉၼႆဝႃႇ။ ၵူၺ်းၵႃႈ မိူဝ်ႈလဵဝ်ၼႆႉ ပႆႇၸၢင်ႈမိူဝ်း သင်ဝႃႈ ပွၵ်ႈမိူဝ်းဢမ်ႇလႆႈ ၵေႃႈ တေလႆႈၶၢႆႉၵႂႃႇယူႇတၢင်ႈတီႈၵူၺ်းယဝ်ႉ”- ဝႃႈၼႆ။

ၾၢႆႇသိုၵ်းမၢၼ်ႈလၢတ်ႈဝႃႈပဵၼ်ၶေႃႈၸီႉသင်ႇ လူင်ပွင်ၸိုင်ႈ (နိုင်ငံတော်ညွန်ကြားချက်)  ၊  လိူၼ် ဢွၵ်ႊထိူဝ်ႊပိူဝ်ႊ ၼႆႉ ႁႂ်ႈၵူၼ်းပၢႆႈၽေးသိုၵ်းပွၵ်ႈမိူဝ်းႁိူၼ်းယေးႁႂ်ႈယဝ်ႉတူဝ်မူတ်း ၼႆယဝ်ႉ။

“သင်ၸိူဝ်ႉဝႃႈ ၵူၼ်းလူင်ပွၵ်ႈမိူဝ်းႁိူၼ်းၶိုၼ်းယဝ်ႉၵေႃႈ လုၵ်ႈဢွၼ်ႇတႄႉ တေၵိုတ်းဝႆႉတီႈၵေႃလိၵ်ႈ လၢႆးသေ တေသိုပ်ႇႁဵၼ်းလိၵ်ႈဝႆႉဢေႃႈ ။  တၢင်းဝၢၼ်ႈတႄႉ တႃႇပၢႆးပၺ်ႇၺႃႇလုၵ်ႈဢွၼ်ႇ   ၵိုင်ႉၵၢင်ႉ ပႆႇပဵၼ်လႆႈလႄႈ မႆႈၸႂ်တႃႇၶဝ်”- ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈ ၼႄ ၼင်ႇၼႆ။

ယၢမ်းလဵဝ် တီႈၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၵျွၵ်ႉမႄးၼႆႉ မီးၵူၼ်းပၢႆႈၽေးသိုၵ်း မႃးသွၼ်ႈယူႇဝႆႉ  54 မုင်ႉႁေႃႁိူၼ်း  ႁူဝ်ၵူၼ်း 180 ပၢႆ  ပဵၼ်ၵူၼ်းဝၢၼ်ႈႁူးသူၼ်၊ ဝၢၼ်ႈတူၼ်ႈႁိူၵ်ႈလႄႈ ဝၢၼ်ႈၼႅမ်းသႆး ၊ ၸိူဝ်းၶဝ်ပၢႆႈမႃးၸမ်ထိုင်ပီယဝ်ႉပႆႇၸၢင်ႈပွၵ်ႈႁိူၼ်း ၶိုၼ်း  ။

  ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈယူႇဝႆႉ တီႈၵေႃလိၵ်ႈလၢႆးမိူင်းငေႃႉလႄႈ ႁိူၼ်းယေး ပီႈၼွင်ႉၽႂ်မၼ်းၸိူဝ်းၼႆႉ တေမီးႁူဝ်ၵူၼ်းမွၵ်ႈ 600။ ပေႃးႁူမ်ႈၵၼ် တင်းဝဵင်းၵျွၵ်ႉမႄး တင်းမူတ်းၸိုင် တေမီးမွၵ်ႈ 5 ႁဵင်ပၢႆ။ ယွၼ်ႉၸုမ်းဢူၺ်းလီ ပွတ်းႁွင်ႇ TNLA, SSPP တင်း RCSS ပဵၼ်ပၢင်တိုၵ်းၵၼ်မႃးႁၢဝ်ႈႁႅင်းသေ ႁဵတ်းႁႂ်ႈၵူၼ်းပိုၼ်ႉတီႈ ဢွၼ်ၵၼ်ပၢႆႈ မီးၼပ်ႉ ႁူဝ်ႁဵင် ပၢႆႈမႃး ၸမ် 1 ပီယဝ်ႉ။

လိူဝ်ၼၼ်ႉ မိူၼ်ၼင်ႇ ၵူၼ်းပၢႆႈၽေးသိုၵ်း တၢင်းၸိုင်ႈတႆးပွတ်းၸၢၼ်းၵေႃႈ သိုၵ်းမၢၼ်ႈ သင်ႇႁႂ်ႈပွၵ်ႈၶိုၼ်းဝၢၼ်ႈဝဵင်း ၸဝ်ႈ ၵဝ်ႇၵၼ်တင်းမူတ်း ပေႃးၼႂ်းလိူၼ်ဢွၵ်ႊထိူဝ်ႊပိူဝ်ႊ တေမႃးၼႆႉ ဝႃႈၼႆ။