ၾႆးမႆႈႁိူၼ်းလင်ၼိုင်ႈတီႈ ဝၢၼ်ႈႁူဝ်ၼႃးဢိူင်ႇၾၢင်ႇမိၼ်ႇ ဝဵင်းတႃႈၶီလဵၵ်းမိူင်းတႆးပွတ်းဢွၵ်ႇၶူင်း ၵူၼ်းဝၢၼ်ႈဝႃႈလုၵ်ႉတီႈၾႆးတဵၼ်း သေလၢမ်းမႆႈတင်းလင် ဢမ်ႇတၼ်းလႆႈၶူဝ်းသင်ဝႃႈၼႆ။
ဝၼ်းတီႈ 8.9.2022 ယၢမ်းၵၢင်ၼႂ် 6 မူင်းၼၼ်ႉ ၾႆးမႆႈ ႁိူၼ်းပႅၼ်ႈ လုင်းဢႃးသူႈ ဢၼ်မီးၼႂ်းဢိူင်ႇၾၢင်ႇမိၼ်ႇ ဝၢၼ်ႈႁူဝ်ၼႃး ႁိူၼ်းလူႉသုမ်းတင်းလင် ၵူၼ်းမၢတ်ႇၸဵပ်းလူႉတၢႆတႄႉဢမ်ႇမီး။
ၸုမ်းၶႄၾႆးဝဵင်းတႃႈၶီလဵၵ်းလၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလုင်းဢႃးသူႈ တေၵႂႃႇႁဵတ်းၵၢၼ်တီႈ သူၼ်ယၢင်ရႃႇပႃႇၼၼ်ႉ မၼ်းၸၢႆးလႆႈၸပ်းတဵၼ်းတီႈၼိူဝ်ၶဵင်ႇၽြႃးသေၵႂႃႇ ။ ၾႆးတဵၼ်းလႅပ်ႈတေလူမ်ႉသေ လၢမ်းမႆႈၶဵင်ႇၽြႃးယဝ်ႉ လၢမ်းမႆႈပႃးႁိူၼ်းမၼ်း ၵႂႃႇပႅတ်ႈတင်းလင်ႁဵတ်းၼၼ်ဢေႃႈ ” ဝႃႈၼႆ။
ယွၼ်ႉၾႆးမႆႈႁိူၼ်းၼၼ်ႉသေ ၵႅမ်ၽူႈၵွၼ်းပလိၵ်ႈ ၸႄႈဝဵင်းတႃႈၶီႈလဵၵ်း ဢူးပူဝ်ႇပူဝ်ႇဢွင်ႇ လႆႈဢဝ်လိူင်ႈၸွႆးတြႃးဝႆႉၼိူဝ်ၸဝ်ႈႁိူၼ်း ၵေႃႉပဵၼ်လုင်းဢႃးသူႈ ၼၼ်ႉဝႆႉဝႃႈၼႆ။
ၶၢဝ်းၾူၼ်သေတႃႉ ဢိင်ၼိူဝ်ဝႆႉလွင်ႈၽိုၼ်းၾႆးမဝ်မၢင်၊ ၽွင်းၾႆးၾႃႉမႃးဢမ်ႇမၢၼ်ႇၼႆႉသမ်ႉၾႆးၵႆႉသျွတ်ႉသေ လၢမ်းမႆႈႁိူၼ်းယေး ၼႂ်းမိူင်းတႆး ။ ၵႆႉမီးၽေးၾႆးတႃႇသေႇ။
မိူဝ်ႈဝၼ်းတီႈ 30.8.2022 ၼၼ်ႉၵေႃႈ ၾႆးမႆႈလွပ်ႈ တီႈပွၵ်ႉလွႆဝႄႈ ၸႄႈဝဵင်းမိူင်းၼၢႆးၸႄႈတွၼ်ႈလၢင်းၶိူဝ်း မိူင်းတႆးပွတ်းၸၢၼ်း ။
