သိုၵ်းမၢၼ်ႈတင်း သိုၵ်းၶၢင် KIA ပဵၼ်ပၢင်တိုၵ်းၵၼ် ၼႂ်းၸႄႈဝဵင်းၵူတ်ႉၶၢႆ ထပ်းၵၼ်မႃး 5-6 ဝၼ်းယဝ်ႉ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈ လႆႈမၢတ်ႇၸဵပ်းၸွမ်း 3 ၵေႃႉ။
မိူဝ်ႈၼႆႉ ဝၼ်းတီႈ 9/9/2022 ယၢမ်းၵၢင်ၼႂ် 9:00 မူင်း ထိုင် 10:15 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် KIA တပ်ႉၵွင်မၢႆ 29 သွင်ၾၢႆႇပဵၼ်ပၢင်တိုၵ်းၵၼ်ႁၢဝ်ႈႁႅင်း တီႈႁိမ်းလွႆသၢမ်သိပ်း တၢင်းၽႄၶဝ်ႈဝၢၼ်ႈၼမ်ႉပႃၶီး ၸႄႈ ဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၼႆယဝ်ႉ။
ၵူၼ်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ်ၼႆႉ သိုၵ်းၶၢင်ၶဝ် ယူႇဝႆႉၼႂ်းထိူၼ်ႇ သင်ၸိူဝ်ႉဝႃႈ သိုၵ်းမၢၼ်ႈ တေၶဝ်ႈ ထိူၼ်ႇၵႂႃႇထႅင်ႈတႄႉ ပၢင်တိုၵ်းတေၸၢင်ႈပဵၼ်ထႅင်ႈယူႇ။ ၵူၺ်းၵႃႈ လွင်ႈမၢတ်ႇၸဵပ်းလူႉတၢႆ တင်းသွင်ၾၢႆႇမိူဝ်ႈၼႆႉတႄႉ ႁဝ်းၶႃႈ ပႆႇႁူႉၶႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ မိူဝ်ႈဝႃး ဝၼ်းတီႈ 8/9/2022 ယၢမ်းၵၢင်ၼႂ် 10 မူင်း သိုၵ်းမၢၼ်ႈ ထႅမ်ႁႅင်းသိုၵ်းမုင်ႈၸူးတၢင်းမၢၼ်ႈပဵင်း တင်းၼမ်သေ ထိုင်မႃး ယၢမ်းဝၢႆးဝၼ်းမွၵ်ႈ 5 မူင်း သိုၵ်းမၢၼ်ႈတင်း သိုၵ်းၶၢင် KIA ယိုဝ်းၵၼ် တင်းဝၢၼ်ႈၵႃလႅင်လႄႈ ၼမ်ႉ ၵူတ်ႉ ၸိူဝ်းၼႆႉ။
“ပၢင်တိုၵ်းၼႆႉ တႄႇပဵၼ်မႃး မိူဝ်ႈဝၼ်းတိတ်းဝူင်ႈပူၼ်ႉမႃး သိုၵ်းၶၢင်တင်း PDF ထႅမ်ႁႅင်းသိုၵ်းမႃးၵဵပ်းၶွၼ်ႇၸဝ်ႈၵႃး တၢင်း မၢၼ်ႈပဵင်း။ သိုၵ်းမၢၼ်ႈ ထႅမ်ႁႅင်းသိုၵ်းၶိုၼ်ႈမႃးထႅင်ႈ သွင်ၾၢႆႇၸင်ႇပဵၼ်ပၢင်တိုၵ်းၵၼ်မႃး တေႃႇထိုင်ယၢမ်းလဵဝ် မီးၶၢဝ်း တၢင်း 4-5 ဝၼ်းယဝ်ႉ”- ၵူၼ်းၵူတ်ႉၶၢႆ သိုပ်ႇလၢတ်ႈၼႄၼင်ႇၼႆ။
မိူဝ်ႈဝၼ်းတီႈ 6/9/2022 ယၢမ်းၵၢင်ၶမ်ႈ 7:30 မူင်း သိုၵ်းမၢၼ်ႈတင်း KIA ပဵၼ်ပၢင်တိုၵ်းၵၼ်ႁၢဝ်ႈႁႅင်း တီႈႁိမ်း(လၢၼ်ႇ) တူဝ်းၵဵၵ်ႉၵူတ်ႉၶၢႆသေ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈမေႃႇႁဵၵ်ႇ 3 ၵေႃႉ လႆႈမၢတ်ႇၸဵပ်း ယၢမ်းလဵဝ် လႆႈသူင်ႇယူတ်းယႃ ဝႆႉတီႈ ႁူင်းယႃလူင် ၵူတ်ႉၶၢႆဝႆႉယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ