ၸုမ်းဢမ်ႇႁူႉၾၢႆႇ ႁၢင်ႈၵၢင်မၢၵ်ႇသျွတ်ႉ တႅၵ်ႇသႂ်ႇၵႃး ၽူႈႁၢပ်ႇၵၢၼ်လူင်ပွင်ၸိုင်ႈ တႂ်ႈသိုၵ်းမၢၼ်ႈၵုမ်းၵမ် ၼိူဝ်သဵၼ်ႈတၢင်း မိူင်းမိတ်ႈ – ၵျွၵ်ႉမေႃး ဝၢႆးပွင်း လုၵ်ႈၼိုင်ႈ ၸဝ်ႈၼႃႈတီႈၾၢႆႇၽုၵ်ႇသွမ်ႈ ၸႄႈတွၼ်ႈမိူင်းမိတ်ႈ မၢတ်ႇၸဵပ်း ၵေႃႉၼိုင်ႈ။
မိူဝ်ႈဝႃး ဝၼ်းတီႈ 8/9/2022 ယၢမ်းၵၢင်ဝၼ်း 12:30 မူင်း ၵႃးၽူႈႁၢပ်ႇၵၢၼ်လူင်ပွင်ၸိုင်ႈ တႂ်ႈသိုၵ်းမၢၼ်ႈ ၵုမ်းၵမ် 3 လမ်း ထုၵ်ႇၸုမ်းဢမ်ႇႁူႉၾၢႆႇ ႁၢင်ႈၵၢင်မၢၵ်ႇသျွတ်ႉ ၼိူဝ်သဵၼ်ႈတၢင်း မိူင်းမိတ်ႈ – ၵျွၵ်ႉမေႃးဝၢႆးပွင်း တႅၵ်ႇသႂ်ႇလုၵ်ႈၼိုင်ႈ၊ ၸၢၵ်ႇမၢၵ်ႇ တိူဝ်ႉသႂ်ႇ ဢူးၸၢႆးတူးတူး ဢႃယု 58 ပီ ၸဝ်ႈၼႃႈတီႈၾၢႆႇၽုၵ်ႇသွမ်ႈ ၸႄႈတွၼ်ႈမိူင်းမိတ်ႈ လႆႈတိူဝ်ႉၺႃးမၢတ်ႇၸဵပ်း တီႈငွၵ်း သွၵ်ႇၾၢႆႇသၢႆႉ။ ဢွင်ႈတီႈပဵၼ်ၼၼ်ႉ ၼႂ်းၵႄႈမိူင်းမိတ်ႈ – ၵျွၵ်ႉမေႃးဝၢႆးပွင်း ၸဵင်ႇၸၢၼ်းဝၼ်းဢွၵ်ႇမိူင်းမိတ်ႈ ယၢၼ်ဝဵင်းမွၵ်ႈ 30 လၵ်း ၼႂ်းၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ။
ၵူၼ်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ လွင်ႈတၢင်းမၼ်းၼႆႉ ပဵၼ်ၼႆ ၶဝ်ၵႂႃႇၵႃး 3 လမ်း၊ ပဵၼ်ၵႃးၽူဝ်းဝီးမူတ်း ၼိုင်ႈလမ်းပႃးၵႂႃႇၵူၼ်း 9-10 ၵေႃႉ။ ၶဝ်ၵႂႃႇ ၵူတ်ႇထတ်း တီႈၵျွၵ်ႉမေႃးဝၢႆးပွင်းၼၼ်ႉသေ ပွၵ်ႈမႃး ၺႃးၸုမ်းဢမ်ႇ ႁူႉၾၢႆႇ ႁၢင်ႈၵၢင်မၢၵ်ႇသျွတ်ႉတႅၵ်ႇသႂ်ႇ လုၵ်ႈၼိုင်ႈ။ ဢွင်ႈတီႈၼၼ်ႉ မီးသိုၵ်းမၢၼ်ႈယူႇဝႆႉလႄႈ ၶဝ်လၢၵ်ႈၵွင်ႈ ယိုဝ်းသႂ်ႇၸွမ်း ၼႂ်းထိူၼ်ႇ တင်းၼမ်။ ၸဝ်ႈၼႃႈတီႈၾၢႆႇၽုၵ်ႇသွမ်ႈၼၼ်ႉတႄႉ တိူဝ်ႉၺႃးတီႈငွၵ်းသွၵ်ႇ လႆႈမၢတ်ႇၸဵပ်းသေ ဢမ်ႇထိုင်တီႈ လႆႈမႆႈၸႂ် ၵူၺ်းၵႃႈ ၵႃးၶဝ်ၼၼ်ႉတႄႉ လူႉၵွႆၸွမ်းၵမ်ႈၽွင်ႈယူႇ”- ဝႃႈၼႆ။
ယၢမ်းလဵဝ် တူဝ်ဢူးၸၢႆးတူးတူး ၸဝ်ႈၼႃႈတီႈၾၢႆႇၽုၵ်ႇသွမ်ႈ ၸႄႈတွၼ်ႈမိူင်းမိတ်ႈၼႆႉ လႆႈသူင်ႇ ယူတ်းယႃတူဝ်ဝႆႉ တီႈႁူင်း ယႃလူင် မိူင်းမိတ်ႈဝႆႉယဝ်ႉ။ ၼႂ်းၵႃး 3 လၢမ်းဢၼ်ၵႂႃႇၵူတ်ႇထတ်း တီႈၵျွၵ်ႉမေႃးဝၢႆးပွင်း ပွၵ်ႈမႃးၼၼ်ႉ တေမီး ၸဝ်ႈၼႃႈတီႈ ၾၢႆႇပလိၵ်ႈမၢၼ်ႈ၊ ၾၢႆႇယႃႈမဝ်းၵမ်၊ ၾၢႆႇၽုၵ်ႇသွမ်ႈလႄႈ ၾၢႆႇလဝၵ ၸိူဝ်းၼႆႉ။
ဢိင်ၼိူဝ် လွင်ႈမၢၵ်ႇတႅၵ်ႇၼႆႉသေ တႄႇဢဝ် ဝၼ်းတီႈ 9 ၼႆႉၵေႃႈ ယူႇတီႈ ၶွင်ႇသီႇသိုၵ်းမၢၼ်ႈ ယိုတ်းမိူင်း ဢဵၼ်ႁႅင်း 150-160 တေလုၵ်ႉတီႈဝဵင်းလိူဝ်ႇ (မၢၼ်းတလေး) ၼၼ်ႉမႃးတူင်ႉၼိုင် ၵႂၢတ်ႇလၢင်ႉ ၸွမ်းပိုၼ်ႉတီႈႁိမ်းႁွမ်း ၵျွၵ်ႉမေႃးဝၢႆးပွင်း ၸိူဝ်း ၼၼ်ႉ။ ယဝ်ႉၵေႃႈ ႁၢမ်ႈၵူၼ်းမိူင်းၵႂႃႇမႃးၵၼ်လႄႈ ႁၢမ်ႈၶွမ်ႊပၼီႊၶုတ်းၶမ်း လဵၵ်ႉယႂ်ႇ ၸိူဝ်းၼၼ်ႉ ၵိုတ်းယင်ႉဝႆႉ ၸူဝ်ႈၶၢဝ်း ၼႆ ယဝ်ႉ။
“လႆႈငိၼ်းဝႃႈ သိုၵ်းမၢၼ်ႈ တေလုၵ်ႉတၢင်းဝဵင်းလိူဝ်ႇ(မၼ်းတလေး) မႃးၵႂၢတ်ႇလၢင်ႉ ၸိူဝ်းႁိမ်းႁွမ်းၼၼ်ႉ တႃႇဢဵၼ်ႁႅင်း 150-160 ၵေႃႉ။ တၢင်းပွတ်းတွၼ်ႈၼၼ်ႉသမ်ႉ ၸုမ်းၵႅတ်ႇၶႄၵူၼ်းမိူင်း PDF တူင်ႉၼိုင် ဢဵၼ်ႁႅင်းၶဝ် တေမီးမွၵ်ႈ 200 ၼႆႉ”- ၵူၼ်းမိူင်းမိတ်ႈ သိုပ်ႇလၢတ်ႈၼႄၼင်ႇ ၼႆ။
တၢင်းပွတ်းတွၼ်ႈ ၵျွၵ်ႉမေႃးဝၢႆးပွင်းၼၼ်ႉ ၵမ်ႈၼမ် မီးဝႆႉ ၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃး မိူၼ်ၼင်ႇ ၶွင်ႇသီႇသိုၵ်းမၢၼ်ႈ ယိုတ်းမိူင်း၊ သိုၵ်းၶၢင် KIA ၊ သိုၵ်းတဢၢင်း TNLA လႄႈ ၸုမ်း PDF ၵႅတ်ႇၶႄၵူၼ်းမိူင်း ၸိူဝ်းၼႆႉ။ ဢွင်ႈတီႈ ၸိူဝ်းၼၼ်ႉ PDF ဢဵၼ်ႁႅင်းယႂ်ႇဝႆႉ ဝႃႈၼႆ။
