ထဝ်ႈၸၢႆး ၵူၼ်းပၢႆႈၽေးသိုၵ်း ဢႃယု 80 ပၢႆ ၵေႃႉၼိုင်ႈ လူႉတၢႆ ယွၼ်ႉတၢင်းပဵၼ်ၵူၼ်းထဝ်ႈ တီႈႁူင်းႁေႃ ၵေႃလိၵ်ႈလၢႆး ဝဵင်းၵျွၵ်ႉ မႄး။
မိူဝ်ႈဝႃး ဝၼ်းတီႈ 7/9/2022 ပူႇၶိင်ႇ ဢႃယု 84 ပီ ၵူၼ်းဝၢၼ်ႈႁူးသူၼ် ဢၼ်ပၢႆႈၽေးသိုၵ်း မႃးသွၼ်ႈယူႇဝႆႉ တီႈၵေႃလိၵ်ႈ လၢႆးလႄႈ ၾိင်ႈငႄႈတႆး ဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ႁိုင်ၸမ်ၼိုင်ႈပီၼႆႉ လႆႈလူႉတၢႆၵႂႃႇ ယွၼ်ႉတၢင်းပဵၼ်ၵူၼ်းထဝ်ႈ ၼႆ ယဝ်ႉ။
လုင်းၸၢႆးလႅင်းႁၢၼ် ႁူဝ်ပဝ်ႈ ၵေႃလိၵ်ႈလၢႆး ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ -“ပဵၼ်ထဝ်ႈၸၢႆး ပူႇၶိင်ႇ ဢႃယု 84 ပီ လူႉတၢႆ ယွၼ်ႉတၢင်းပဵၼ်ၵူၼ်းထဝ်ႈ မိူဝ်ႈၼႆႉ ဝၼ်းတီႈ 8 ယၢမ်းဝၢႆးဝၼ်း 1 မူင်း ပူၼ်ႉၶၢပ်ႈတူဝ် ။ ထဝ်ႈၸၢႆးၼႆႉ လုၵ်ႉဝၢၼ်ႈႁူးသူၼ်သေ ပၢႆႈမႃးၸမ်ပီယဝ်ႉ တေႃႇထိုင်ယၢမ်းလဵဝ် ဢမ်ႇၸၢင်ႈပွၵ်ႈၶိုၼ်းႁိူၼ်းယေး လႆႈမႃးလူႉတၢႆတီႈပၢင်သဝ်းၵူၼ်းပၢႆႈၽေးသိုၵ်းၼႆႉ”- ဝႃႈၼႆ။
ယၢမ်းလဵဝ် တီႈၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၵျွၵ်ႉမႄးၼႆႉ မီးၵူၼ်းပၢႆႈၽေးသိုၵ်း မႃးသွၼ်ႈယူႇဝႆႉ မုင်ႉႁေႃႁိူၼ်း 54 လင် ႁူဝ်ၵူၼ်း 180 ပၢႆ ပဵၼ်ၵူၼ်းဝၢၼ်ႈႁူးသူၼ်၊ ဝၢၼ်ႈတူၼ်ႈႁိူၵ်ႈလႄႈ ဝၢၼ်ႈၼႅမ်းသႆး ၸမ်ထိုင်ပီယဝ်ႉပႆႇၸၢင်ႈပွၵ်ႈႁိူၼ်းၶိုၼ်း ၸိူဝ်းၼႆႉ။
“တေႃႈလဵဝ် ဢၼ်ယၢပ်ႇၽိုတ်ႇႁႅင်းတႄႉ ပၢႆးယူႇလီ၊ ပၢႆးပၺ်ႇၺႃႇ။ ပၢႆးယူႇလီတႄႉ တႃႇၵူၼ်းထဝ်ႈ ပေႃး ဢမ်ႇယူႇလီ ၵိၼ် ဢမ်ႇဝၢၼ် တႃႇၵႂႃႇၼႄမေႃယႃသမ်ႉ ဢမ်ႇမီးၵႃႈယူတ်းယႃ။ တႃႇသိုဝ်ႉယႃႈယႃ ၵိၼ်ၵေႃႈ ယၢပ်ႇၸႂ်။ လိူဝ်ၼၼ်ႉ ပၢႆးပၺ်ႇၺႃႇ တႃႇလုၵ်ႈဢွၼ်ႇ ၶဝ်ဢမ်ႇလႆႈႁဵတ်းလိၵ်ႈမႃး မီးၶၢဝ်းတၢင်းႁိုင်ယဝ်ႉ ၵူဝ်ပၢႆးပၺ်ႇၺႃႇၶဝ်ၶၢတ်ႇ။ ယၢမ်းလဵဝ် ၸဝ်ႈတႃႇၼ ဢၼ်မႃးၸွႆႈထႅမ် ၸိူဝ်း ၼႆႉၵေႃႈ ႁၢင်ႇၵႂႃႇႁိုင်ယဝ်ႉ တႃႇၵိၼ်တႃႇယႅမ်ႉ လူဝ်ႇတၢင်းၸွႆႈထႅမ် ႁႅင်းၶႃႈဢေႃႈ”- လုင်းၸၢႆးလႅင်းႁၢၼ် သိုပ်ႇ လၢတ်ႈၼႄၼင်ႇၼႆ။
လိူဝ်ၼၼ်ႉ ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈယူႇဝႆႉ တီႈၵေႃလိၵ်ႈလၢႆးမိူင်းငေႃႉလႄႈ ႁိူၼ်းယေး ပီႈၼွင်ႉၽႂ်မၼ်းၸိူဝ်းၼႆႉ တေမီးႁူဝ်ၵူၼ်းမွၵ်ႈ 600။ ပေႃးႁူမ်ႈၵၼ် တင်းဝဵင်းၵျွၵ်ႉမႄး တင်းမူတ်းၸိုင် တေမီးမွၵ်ႈ 5 ႁဵင်ပၢႆ။ ယွၼ်ႉၸုမ်းဢူၺ်းလီ ပွတ်းႁွင်ႇ TNLA, SSPP တင်း RCSS ပဵၼ်ပၢင်တိုၵ်းၵၼ်မႃးႁၢဝ်ႈႁႅင်းသေ ႁဵတ်းႁႂ်ႈၵူၼ်းပိုၼ်ႉတီႈ ဢွၼ်ၵၼ်ပၢႆႈ မီးၼပ်ႉ ႁူဝ်ႁဵင် ပၢႆႈမႃး ၸမ် 1 ပီယဝ်ႉ။
