မိူဝ်ႈၼႆႉ ဝၼ်းတီႈ 7/9/2022 ယၢမ်းၵၢင်ၼႂ် မွၵ်ႈ 6 မူင်း မီးၵူၼ်းဢမ်ႇႁူႉၾၢႆႇ 3 ၵေႃႉ ယိပ်းၵွင်ႈပွတ်း/ ယၢဝ်းသေ ၶဝ်ႈၸူၼ် ႁိူၼ်းၵူၼ်းလႅၵ်ႈငိုၼ်း လင်ၼိုင်ႈ တီႈပွၵ်ႉၸၢၼ်း ဝဵင်းမူႇၸေႊ ၸိုင်ႈတႆးပွတ်းႁွင်ႇ သုမ်းၸွမ်းငိုၼ်းမွၵ်ႈ 500 သႅၼ်ပျႃး ၼႆ ယဝ်ႉ။
ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းႁၢႆႉ 3 ၵေႃႉၼႆႉ ၶီႇၵႃးမႃးၸွမ်းၵၼ် လမ်းၼိုင်ႈ။ ယိပ်းတင်းၵွင်ႈ ပွတ်း၊ ၵွင်ႈယၢဝ်း ၸေးမိုဝ်း ၶဝ်ႈမႃးၸူၼ်။ ၵွၼ်ႇတေၶဝ်ႈၸူၼ်ၼၼ်ႉ ၶဝ်ယိုဝ်းလွၵ်ႇ ၸဝ်ႈႁိူၼ်း ၵမ်းၼိုင်ႈသေ ၶဝ်ႈၸူၼ် ၼႂ်းႁိူၼ်း။ သွၵ်ႈတဝ်ၼႂ်းႁိူၼ်းယေးလႄႈ တိူၵ်ႈၵဵပ်းငိုၼ်း၊ ႁွင်ႈၼွၼ်း ၸိူဝ်းၼႆႉ တင်းမူတ်း”- ဝႃႈၼႆ။
လွင်ႈတုမ်ႉတိူဝ်ႉ ၵူၼ်းႁိူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး ၊ ၵူၺ်းၵႃႈ လႆႈသုမ်းၵႂႃႇ ငိုၼ်းမၢၼ်ႈ မွၵ်ႈ 500 သႅၼ်ပျႃး။ လိူဝ်ၼၼ်ႉ ၵွင်ႈထႆႇ CCTV ၸိူဝ်းၼၼ်ႉၵေႃႈ ၶဝ်ယႃႉလႅဝ်ပႃးထႅင်ႈလူးၵွၼ်ႇ ၼႆယဝ်ႉ။
ၼႂ်းၸႄႈတွၼ်ႈမူႇၸေႊၼႆႉ မီး ၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃးၼမ် မိူၼ်ၼင်ႇ သိုၵ်းမၢၼ်ႈ၊ သိုၵ်းၶၢင် KIA, သိုၵ်းတ ဢၢင်း TNLA, သိုၵ်းတႆး SSPP လႄႈ ၸုမ်းပျီႇတူႉၸိတ်ႉ တႂ်ႈသိုၵ်းမၢၼ်ႈၵုမ်းၵမ် ၸိူဝ်းၼႆႉ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း ပီပၢႆ 8 လိူၼ်ၼႆႉ ၼႂ်းၸႄႈဝဵင်းမူႇၸေႊ ၵႆႉမီးလွင်ႈပၼ်ႁႃ ၸူၼ်ၵၼ်၊ လၵ်ႉၵၼ် ၸိူဝ်းၼႆႉ မႃးၶိူဝ်းယႂ်း။ ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈ/ သိုၵ်းမၢၼ်ႈ ဢမ်ႇတွၼ်ႉတီႉၺွပ်းလႆႈသေပွၵ်ႈ။
