ၼႂ်းၸႄႈဝဵင်းၵူတ်ႉၶၢႆ KIA လႄႈသိုၵ်းမၢၼ်ႈယိုဝ်းၵၼ် မၢၵ်ႇလူင်တူၵ်းႁိမ်းဝၢၼ်ႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်း မၢတ်ႇၸဵပ်းၸွမ်း 3 ၵေႃႉ ယၢမ်း လဵဝ် လႆႈသူင်ႇယူတ်းယႃတူဝ်ဝႆႉတီႈ ႁူင်းယႃ။
မိူဝ်ႈဝႃး ဝၼ်းတီႈ 6/9/2022 ယၢမ်းၵၢင်ၼႂ် 4:30 မူင်း – 10:30 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် KIA ပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈႁိမ်းၼမ်ႉၽၵ်းၵႃ။ ထိုင်မႃးယၢမ်းၵၢင်ၶမ်ႈ 7:30 မူင်း သွင်ၾၢႆႇပဵၼ်ပၢင်တိုၵ်းၵၼ်ထႅင်ႈ တီႈ ႁိမ်း(လၢၼ်ႇ) တူဝ်းၵဵၵ်ႉၵူတ်ႉၶၢႆ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈမေႃႇႁဵၵ်ႇ 3 ၵေႃႉ ၼႂ်းၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ၼႆယဝ်ႉ။
ၵူၼ်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ယၢမ်းၵၢင်ၶမ်ႈ 7 မူင်းၶိုင်ႈၼႆႉ သွင်ၾၢႆႇပဵၼ်ပၢင်တိုၵ်းၵၼ်သေ ၸၢၵ်ႇမၢၵ်ႇ တိူဝ်ႉသႂ်ႇ ၵူၼ်းဝၢၼ်ႈမေႃႇႁဵၵ်ႇ 3 ၵေႃႉ။ ဢႃယု 14 ပီ ၵေႃႉၼိုင်ႈ၊ ဢႃယု 17 ပီ ၵေႃႉၼိုင်ႈလႄႈ ဢႃယု 33 ပီ ၵေႃႉ ၼိုင်ႈ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉတီႈ ႁူင်းယႃတီႈၵူတ်ႉၶၢႆယဝ်ႉ”- ဝႃႈၼႆ။
မၢၵ်ႇၵွင်ႈလူင်တူၵ်းၸမ်ႁႅင်းၼႃႇလႄႈ ၵူၼ်းဝၢၼ်ႈမေႃႇႁဵၵ်ႇ ၵူဝ်သေ ဢွၼ်ၵၼ်ပၢႆႈမူၵ်းၼႂ်းလုၵ်းပဵမ်ႇ ။
“ၶဝ်ယိုဝ်းၵၼ် မိူဝ်ႈဝႃးၼႆႉ ၵူဝ်ၶႃႈဢေႃႈ ႁိူၼ်းပေႃးသၼ်ႇပဵၼ်ၵမ်းပဵၼ်ၵမ်း ႁဝ်းယူႇၵႆၵၼ် တၢင်းဝၢၼ်ႈမေႃႇႁဵၵ်ႇ ၵွၼ်ႇၶႃႈ ဢေႃႈၼႆႉ။ ဢၼ်ယူႇၸမ်ၸိူဝ်းၼၼ်ႉ ဢမ်ႇၸၢင်ႈဝႃႈႁိုဝ်ယဝ်ႉၶႃႈ ၵူၼ်းဝၢၼ်ႈ ပေႃးလႆႈၵႂႃႇမူၵ်းၼႂ်းလုၵ်ႉပဵမ်ႇၵၼ်”- ၵူၼ်းၵူတ်ႉၶၢႆ သိုပ်ႇလၢတ်ႈၼႄၼင်ႇၼႆ။
ၽွင်းပၢင်တိုၵ်း ယၢမ်းၵၢင်ၼႂ် 4:30 မူင်း – 10:30 မူင်းၼၼ်ႉ သွင်ၾၢႆႇလိုပ်ႈလမ်းပိုတ်းယိုဝ်းၵၼ်ထိုင်ႁိမ်းတၢင်းလူင် ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်ယိုဝ်းၸွႆႈသေ တင်းသွင်ၾၢႆႇ သဵင်ၵွင်ႈၸင်ႇတေယဵၼ်။ ထိုင်တီႈၸဝ်ႈၵႃး၊ ၵူၼ်းၶၢႆၵၢတ်ႇ ဢမ်ႇ ၸၢင်ႈၵႂႃႇမႃး လႆႈပိၵ်ႉဢိုတ်းဝႆႉ ၵမ်းၼိုင်ႈ ။
မိူဝ်ႈဝၼ်းတီႈ 25/7/2022 ၼၼ်ႉ ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် KIA ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းၵႄႈမၢၼ်ႈၼွင်တင်း ၼမ်ႉပႃၶီး ႁိမ်းလွႆသၢမ်သိပ်း ၼႂ်းၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ မၢၵ်ႇလူင်တူၵ်းတႅၵ်ႇ ၸၢၵ်ႇမၢၵ်ႇသဵၼ်တိူဝ်ႉ ဢွၼ်ႇၸၢႆး ဢႃယု 4 ၶူပ်ႇ လႆႈမၢတ်ႇၸဵပ်းႁၢဝ်ႈႁႅင်း လႆႈလူႉတၢႆ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ