သိုၵ်းမၢၼ်ႈယိုဝ်းၵွင်ႈလူင်သႂ်ႇဝၢၼ်ႈလွႆပဝ်း လႄႈဝၢၼ်ႈတွင်ႇပူဝ်ႉ ၸႄႈဝဵင်းၾၢႆၶုၼ် ၵူၼ်းမိူင်းမၢတ်ႇၸဵပ်း 3 ၵေႃႉ။
မိူဝ်ႈဝၼ်းတီႈ 4/9/2022 ယၢမ်းၵၢင်ၶမ်ႈမွၵ်ႈ 9 မူင်း သိုၵ်းမၢၼ်ႈ ယိုဝ်းၵွင်ႈသႂ်ႇၼႂ်းဝၢၼ်ႈလွႆပဝ်း ၊ ၸၢၵ်ႇမၢၵ်ႇတိူဝ်ႉသႂ်ႇၵူၼ်းၼႂ်းဝၢၼ်ႈ 3 ၵေႃႉ။
ၽူႈၸၢႆးၵူၼ်းမိူင်းဝဵင်းၾၢႆၶုၼ် ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ ၵူၼ်းၼုမ်ႇၼႂ်းဝၢၼ်ႈ တိုၵ်ႉၶီႇရူတ်ႉၶိူင်ႈၵႂႃႇမႃးၼႂ်းဝၢၼ်ႈယူႇၼၼ်ႉ ၸၢၵ်ႇမၢၵ်ႇသိုၵ်းမၢၼ်ႈသဵၼ်တိူဝ်ႉသႂ်ႇလႄႈမၢတ်ႇၸဵပ်း။ ယၢမ်းလဵဝ်ယူတ်းယႃတူဝ်ဝႆႉတီႈႁူင်းယႃယူႇ။ ဢမ်ႇထိုင်တီႈလႆႈမႆႈၸႂ်ၼင်ႇၵဝ်ႇၶႃႈ”- ဝႃႈၼႆ။
ၼႂ်းၸႄႈဝဵင်းၾၢႆၶုၼ်ၼၼ်ႉသိုၵ်းမၢၼ်ႈလႄႈ သိုၵ်းၵႅတ်ႇၶႄၵူၼ်းမိူင်း PDF ၾၢႆၶုၼ် ပိုတ်းယိုဝ်းတိုၵ်းတေႃးၵၼ်။ ယၢမ်းလဵဝ် သိုၵ်း PDF ဢမ်ႇတူင်ႉႁိမ်းဝၢၼ်ႈ ႁိမ်းဝဵင်းယဝ်ႉသေတႃႉ သိုၵ်းမၢၼ်ႈလၢမ်းလိမ်းယိုဝ်းၵွင်ႈသႂ်ႇၼႂ်းဝၢၼ်ႈၼႂ်းၶူင်ႇၾၢႆႇလဵဝ် ၵူၼ်းသိုၵ်း PDF တပ်ႉၵွင်မၢႆ 2 ၸႄႈဝဵင်းၾၢႆၶုၼ် လၢတ်ႈၼင်ႇၼႆ။
“ယၢမ်းလဵဝ် ပၢင်တိုၵ်းတႄႉ ယဵၼ်ဝႆႉယူႇ။ ႁဝ်းၶႃႈၵေႃႈဢမ်ႇယိုဝ်းၶိုၼ်း။ ၾၢႆႇသိုၵ်းမၢၼ်ႈၵူၺ်းယိုဝ်းယူႇၾၢႆႇလဵဝ်။ လွင်ႈၶဵင်ႈၶႅင်ၵၢၼ်သိုၵ်းၵၼ်ၵေႃႈဢမ်ႇမီး။ၾၢႆႇသိုၵ်းမၢၼ်ႈၵူၺ်းယိုဝ်းယူႇၾၢႆႇလဵဝ် ” ၵူၼ်းသိုၵ်း PDF တပ်ႉၵွင်မၢႆ 2 ၼၼ်ႉလၢတ်ႈၼင်ႇၼႆ။
ပူၼ်ႉမႃးဝၼ်းတီႈ 25 ၼၼ်ႉၵေႃႈ သိုၵ်းမၢၼ်ႈယိုဝ်းၵွင်ႈလူင်သႂ်ႇၼႂ်းဝၢၼ်ႈလွႆပဝ်း။ ၽွင်းၼၼ်ႉၵေႃႈၸၢၵ်ႇမၢၵ်ႇတိူဝ်ႉၵူၼ်းဝၢၼ်ႈမၢတ်ႇၸဵပ်းၵေႃႉၼိုင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ