ၶၢဝ်းတၢင်းၸမ် 3 လိူၼ်မႃးၼႆႉ သိုၵ်းမၢၼ်ႈသီႇပေႃႉ ပိုၼ်ၽၢဝ်ႇၸႂ်ႉတိုဝ်း မၢႆမီႈ ႁၢမ်ႈဢွၵ်ႇ ၼွၵ်ႈႁိူၼ်း ယၢမ်းၵၢင်ၶိုၼ်း ၵူၼ်းမိူင်းသီႇပေႃႉလၢတ်ႈဝႃႈ ဢမ်ႇမီးလွင်ႈႁူမ်ႇလူမ်ႈလႄႈ လွင်ႈဢုၼ်ႇၸႂ် မိူၼ်ပၼ် တိုဝ်ႉတၢင်းၽူႈလၵ်ႉၵူၼ်းၸူၼ်လိူင်ႇၼမ်ၵူၺ်းယဝ်ႉ ဝႃႈၼႆ။
ၽူႈၵွၼ်းၸႄႈဝဵင်းသီႇပေႃႉ တႂ်ႈသိုၵ်းမၢၼ်ႈၸႂ်ႉတိုဝ်းမၢႆမီႈ ႁၢမ်ႈဢွၵ်ႇႁိူၼ်း ယၢမ်းၵၢင်ၶိုၼ်းၼႆႉ တင်ႈတႄႇဝၼ်းတီႈ 8/6/2022 မႃး တေႃႇထိုင်ယၢမ်းလဵဝ် ႁိုင်မႃး ၶၢဝ်းတၢင်းၸမ် 3 လိူၼ် ၊ ဢမ်ႇမီးၵူၼ်းၵႂႃႇမႃးယၢမ်းၵၢင်ၶိုၼ်း ယိုင်ႈၶႅၼ်း ႁဵတ်းႁႂ်ႈၵူၼ်းသူႇသမ်းၵိၼ်ယႃႈလႄႈ ၽူႈလၵ်ႉၸၵ်ႉၶုတ်ႈ ထၢင်ႇႁၢင်ႈလၵ်ႉ ၊ ထၢင်ႇႁၢင်ႈသူႇသမ်းၵႃႉၶၢႆယႃႈမဝ်းၵမ် ၼမ်မႃးထႅင်ႈ ၼႆယဝ်ႉ။
ၵူၼ်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “မႃႇသျႄႇလေႃးၼႆႉ ၶဝ်ပႆႇပူတ်း တိုၵ်ႉၸႂ်ႉယူႇ။ ၵူၼ်းလၵ်ႉၵူၼ်းၸူၼ် ယိင်ႈ ၶႅၼ်းၼမ်။ ရူတ်ႉၶိူင်ႈၼႆႉ ပေႃးၵႂႃႇၸၢႆႇၵၢတ်ႇ ဝႆႉမဝ်မၢင်ဢမ်ႇလႆႈသေဢိတ်း၊ တမ်းဝႆႉ ၵမ်းလဵဝ်ၵူၺ်းၵေႃႈ ႁၢႆယဝ်ႉ။ ၵႆႉႁၢႆၼႃႇ ရူတ်ႉၶိူင်ႈၼႆႉ ၶႂ်ႈဝႃႈ မီးၵူႈဝူင်ႈယဝ်ႉ။ ၼိုင်ႈဝူင်ႈ ပဵၼ်လၢႆလမ်းၶႃႈဢေႃႈ။ ၸူဝ်ႈသိုၵ်းမၢၼ်ႈ ယိုတ်းမိူင်းမႃးၼႆႉၵူၺ်း ၽူႈလၵ်ႉလိူင်ႇၼမ် ၼႃႇယဝ်ႉၶႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ ၸူဝ်ႈသိုၵ်းမၢၼ်ႈ ပိုၼ်ၽၢဝ်ႇဢွၵ်ႇမၢႆမီႈႁၢမ်ႈဢွၵ်ႇႁိူၼ်းၼႆႉ ယူႇတီႈပလိၵ်ႈ/ သိုၵ်းမၢၼ်ႈ ၼႂ်းၸႄႈဝဵင်းသီႇ ပေႃႉ ဢမ်ႇတွၼ်ႉတီႉၺွပ်းလႆႈမႃးသေပွၵ်ႈ ။ ရူတ်ႉၶိူင်ႈ ဢၼ်ၺႃး လၵ်ႉၵႂႃႇၸိူဝ်းၼၼ်ႉၵေႃႈ ဢမ်ႇတွၼ်ႉလႆႈၶိုၼ်းသေ လမ်း ဝႃႈၼႆ။
“မိူဝ်ႈဝႃးၼႆႉ ပိူၼ်ႈမႃးလၵ်ႉၶဝ်ႈၼႂ်းႁၢၼ်ႉၶၢႆၶူဝ်းၵုၼ်ႇ ႁိမ်းႁွမ်းႁဝ်းၼႆႉၵူၺ်း လၵ်ႉၵႂႃႇၶဝ်ႈမုၼ်းၶွင်ၵိၼ်ယႅမ်ႉ တင်းၼမ်။ လူႉ သုမ်းၵႃႈႁိုဝ်တႄႉ ဢမ်ႇႁူႉ။ ယၢမ်းလဵဝ် ၵၢၼ်ႁႃၵိၼ်ယၢပ်ႇ၊ မၢင်ၵေႃႉ ဢမ်ႇမီးငိုၼ်း ၸိူင်ႉၼႆၵေႃႈပႃး ထိုင်တီႈလၵ်ႉၸူၼ်ၵၼ် မႃးၼမ် ၼႆႉၵေႃႈ တေၵဵဝ်ႇပႃး။ ယၢမ်းလဵဝ် ယိုင်ႈၶႅၼ်းမႆႈၸႂ် ဢွၵ်ႇႁိူၼ်းယေး ၵႂႃႇၵႅပ်ႉၼိုင်ႈၵေႃႈ ဢမ်ႇႁတ်းပွႆႇၵႂႃႇယဝ်ႉ ၵူဝ် ပိူၼ်ႈၶဝ်ႈလၵ်ႉၶူဝ်းၼႂ်းႁိူၼ်းယေး။ ယဝ်ႉၵေႃႈ လုၵ်ႈလၢင်းၵႂႃႇႁူင်းႁဵၼ်း ၶိုၼ်ႈၵိဝ်ႇသိၼ်ႇ ၸိူဝ်းၼႆႉၵေႃႈ လႆႈမႆႈၸႂ်ၸွမ်း ၵူဝ်ၺႃး ၸူၼ် ႁဵတ်းႁၢႆႉတီႈၶဝ်။ ၵူၼ်းႁၢႆႉၼႆႉ ပေႃးတိူၵ်ႈၵေႃႈ မိူၵ်ႈယဝ်ႉ ဢမ်ႇဝႃႈ လုၵ်ႈဢွၼ်ႇ/ ၵူၼ်းလူင် ပေႃးၶဝ်ၶႂ်ႈႁဵတ်းၼႆ ၶဝ်ႁဵတ်း ႁၢႆႉမူတ်းၶႃႈယဝ်ႉ”- ၵူၼ်းသီႇပေႃႉ သိုပ်ႇလၢတ်ႈၼႄၼင်ႇၼႆ။
ယၢမ်းတေႃႈလဵဝ် ၼႂ်းၸႄႈဝဵင်းသီႇပေႃႉၼႆႉ ပေႃးယၢမ်းၵၢင်ၶမ်ႈ မွၵ်ႈ 6-7 မူင်းၼႆႉ ဢမ်ႇႁတ်းဢွၵ်ႁိူၼ်းၵႂႃႇမႃးၵၼ် ၵိုၼ်း ၶွၼ်ႈ လိူဝ်ၵူႈပွၵ်ႈယဝ်ႉ။ ၵမ်ႈၼမ် တေယူႇၼႂ်းႁိူၼ်းယေးၽႂ်မၼ်း ၸိူဝ်းၼၼ် ယွၼ်ႉငဝ်းလၢႆးဝၢၼ်ႈမိူင်း ဢမ်ႇမီးလွင်ႈၼိမ် သဝ်း ဢမ်ႇမီးလွင်ႈႁူမ်ႇလူမ်ႈ ၸိူဝ်းၼႆႉ။
