မီးၵူၼ်းဢမ်ႇႁူႉၾၢႆႇ ႁဵတ်းၾဵတ်ႉပုၵ်ႉ Facebook ပွမ် သေ လႅၼ်ၵိၼ်ငိုၼ်းၼိူဝ်ဢွၼ်ႊလၢႆႊၼမ် ၵူၼ်းၵူတ်ႉၶၢႆ ထုၵ်ႇလႅၼ် သုမ်းငိုၼ်းတင်းၼမ်။
မိူဝ်ႈဝၼ်းတီႈ 29/8/2022 ပူၼ်ႉမႃးၼႆႉ မီးၵူၼ်းဢမ်ႇႁူႉၾၢႆႇ ႁဵတ်းၾဵတ်ႉပုၵ်ႉပွမ် လွၵ်ႇလႅၼ်ဢဝ်ငိုၼ်း ၵူၼ်းၵူတ်ႉၶၢႆ (ၽူႈၸၢႆး) ၵေႃႉၼိုင်ႈ သုမ်းငိုၼ်း 1 သႅၼ်ပျႃး ။ ပဵၼ်တီႈၼႂ်းၸႄႈဝဵင်းၵူတ်ႇၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ။
ဢူၺ်းၵေႃႉ ၵူၼ်းၵေႃႉသုမ်းငိုၼ်း တီႈဝဵင်းၵူတ်ႇၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းၸုမ်းၼၼ်ႉ ၶဝ်ႁဵတ်းၾဵတ်ႉပုၵ်ႉပွမ်သေ လၢတ်ႈၵႂၢမ်းမၢၼ်ႈမႃး လႅၼ်ဢူၺ်းၵေႃႉၶႃႈဝႃႈ ႁဝ်းမီးငိုၼ်းပွမ်ဝႆႉ သင်သူၶႂ်ႈလႆႈၼႆ ဢူၼ်းငိုၼ်းမႃးပၼ်ႁဝ်း 1 သႅၼ် သူတေ လႆႈ 10 သႅၼ်။ သင်ဢူၼ်းမႃးပၼ် 2 သႅၼ် သူတေလႆႈ 20 သႅၼ်။ ပေႃးသူဢူၼ်းငိုၼ်းမႃး ႁဝ်းတေဢူၼ်းငိုၼ်းပွမ်ၼၼ်ႉပၼ်ၶိုၼ်းၵမ်းလဵဝ် ဝႃႈၼႆလႄႈ ဢူၺ်းၵေႃႉၶႃႈ ၸၢမ်းဢူၼ်းပၼ်တူၺ်း 1 သႅၼ်ပျႃး။ပေႃးဢူၺ်းၵေႃႉၶႃႈဢူၼ်းပၼ်ယဝ်ႉၵေႃႈ ၶဝ်ပိၵ်ႉ ပႅတ်ႈတီႈၵပ်းသိုပ်ႇတိတ်းတေႃႇ တၢင်းၽဵတ်ႉပုၵ်ႉ တၢင်းၾူၼ်း ၵမ်းလဵဝ်။ သုမ်းငိုၼ်းပႅတ်ႈလၢႆလၢႆ။ တေႃႇထိုင်ယၢမ်းလဵဝ် ဢမ်ႇလႆႈၶိုၼ်း၊ ငိုၼ်းၼႆႉ ဢူၼ်းၵႂႃႇတီႈ K-pay ၶႃႈ”- ဝႃႈၼႆ။
ၶၢဝ်းၵၢပ်ႈဝၢၼ်ႈမိူင်းလူႉ ပၢႆးမၢၵ်ႈမီးတူၵ်း ၵူၼ်းမိူင်းတုၵ်ႉၶၵပ်ႉၵိၼ်းၸႂ်ႁႅင်း ၽႂ်ၵေႃႈလူဝ်ႇၸႂ်ႉငိုၼ်း၊ ၵူၼ်းဢမ်ႇႁူႉ ၾၢႆႇၸုမ်းၼႆႉဢဝ်တိုဝ်ႉတၢင်းသေ ႁဵတ်းၾဵတ်ႉပုၵ်ႉပွမ် လႅၼ်ၵိၼ်ငိုၼ်း ၼိူဝ်ဢွၼ်ႊလၢႆႊမႃး ၵႂၢင်ႈၶႂၢင်။
“ယၢမ်းလဵဝ်ၼႆႉ ၵၢပ်ႈဝၢၼ်ႈတႃမိူင်း လူႉၸိူင်ႉၼႆ ၽႂ်ၵေႃႈ ၵပ်းၵိၼ်းၸႂ် လူဝ်ႇငိုၼ်းႁႅင်း ၵူၼ်းၸိူဝ်းၼၼ်ႉ ၶဝ်ဢဝ်တိုဝ်ႉတၢင်း ၸိူင်ႉၼႆသေ ႁႃယွၵ်ႇလႅၼ်ပိူၼ်ႈ ႁဵတ်းငိုၼ်းပွမ်ၶၢႆ ၼိူဝ်ဢွၼ်ႊလၢႆႊ ၶဝ်ဝႃႈတေဢဝ်ပုၼ်ႈၽွၼ်း ႁူဝ်ပၢၵ်ႇတဵမ်သေ သူင်ႇ ပၼ်။ ၵွပ်ႈၶဝ် ဢမ်ႇၸႂ်ႈတြႃးဝၢင်ႇလႄႈ ဢမ်ႇႁတ်းဢွၵ်ႇၼႃႈ ၼႆဝႃႇ။ ၵွပ်ႈၼႆလႄႈ ယႃႇယုမ်ႇငၢႆႈ ဢွၼ်ၵၼ်ၾၢင်ႉ သတိၵၼ် ၽွင်ႈ”- ဢူၺ်းၵေႃႉ ၵူၼ်းၵေႃႉသုမ်းငိုၼ်း တီႈဝဵင်းၵူတ်ႇၶၢႆ သိုပ်ႇလၢတ်ႈၼႄၼင်ႇၼႆ။
ၸုမ်းၵူၼ်းဢမ်ႇႁူႉၾၢႆႇ ဢၼ်ႁဵတ်းၽဵတ်ႉပုၵ်ႉပွမ်/ တု လႅၼ်ၵိၼ်ၵူၼ်းၼိူဝ်ဢွၼ်ႊလၢႆႊၸိူင်ႉၼႆၼႆႉ ၶဝ်ယူႇတီႈလႂ် ပဵၼ်ၽႂ် ၽႂ် ၵေႃႈ ဢမ်ႇႁူႉ ၼႆယဝ်ႉ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း ပီပၢႆ 7 လိူၼ်ၼႆႉ ၵၢၼ်ပၢႆးမၢၵ်ႈမီး ၼႂ်းမိူင်းႁူမ်ႈတုမ် တူၵ်းႁႅင်း၊ ၵၢၼ်ငၢၼ်းဢမ်ႇ ပဵၼ်၊ ၵူၼ်းမိူင်းၵပ်းၵိၼ်းၸႂ်ႁႅင်း၊ ႁႃငိုၼ်းယၢပ်ႇ။ ယဝ်ႉၵေႃႈ ၶူဝ်းၵုၼ်ႇၶွင်ၵိၼ်ယႅမ်ႉၵေႃႈ ၶိုၼ်ႈႁႅင်း ၵူႈမဵဝ်း၊ ၶူဝ်းၵုၼ်ႇၼႂ်းမိူင်း သမ်ႉ ဢမ်ႇၸၢင်ႈတေႃႉဢွၵ်ႇၶၢႆတၢင်းလႂ် ႁဵတ်းႁႂ်ႈၵူၼ်းမိူင်းတုၵ်ႉၶယၢပ်ႇၽိုတ်ႇႁႅင်း ၼႆယဝ်ႉ။
 ၵေႃႉၼိုင်ႈ သုမ်းငိုၼ်း 1 သႅၼ်ပျႃး ။ ပဵၼ်တီႈၼႂ်းၸႄႈဝဵင်းၵူတ်ႇၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ။ ){kind=link}