ၶၢဝ်းတၢင်းပီပၢႆ 7 လိူၼ်မႃးၼႆႉ ၶွင်ႇသီႇသိုၵ်းမၢၼ်ႈ ယိုတ်းမိူင်း ၽဝ်ႁိူၼ်းယေး ၵူၼ်းဝၢၼ်ႈမႃးမီးၵႂႃႇ 28,434 လင် ၼႂ်းၼၼ်ႉ ပႃးမိူင်းတႆး ပွတ်းၸၢၼ်း 132 လင်။

ဝၼ်းတီႈ 27/8/2022 ပူၼ်ႉမႃးၼႆႉ ယူႇတီႈ ၸုမ်းၵဵပ်းၶေႃႈမုၼ်း Data for Myanmar ပိုၼ်ၽၢဝ်ႇဝႃႈ ႁိူၼ်း ယေး ၵူၼ်း ဝၢၼ်ႈ ၼႂ်းမိူင်းႁူမ်ႈတုမ်ပတ်းပိုၼ်ႉ ဢၼ်ပဵၼ်ၸုမ်းယူႇတႂ်ႈသိုၵ်းမၢၼ်ႈ ၵုမ်းၵမ်ၼၼ်ႉ ၽဝ်ႁိူၼ်းယေးၵူၼ်းဝၢၼ်ႈမႃး ၼႂ်းၶၢဝ်း တၢင်း 570 ဝၼ်းပၢႆ (ၶၢဝ်းတၢင်း ပီပၢႆ 7 လိူၼ်) ၼႆႉ ဢဝ်လၢႆး ႁုၵ်ႉႁၢႆႉ ႁဵတ်းတေႃႇၵူၼ်းမိူင်း။ ၽဝ်ႁိူၼ်းၵူၼ်းမိူင်းတင်းမူတ်း  674 တီႈ ႁိူၼ်းယေးဢၼ်ၺႃးၽဝ်မီး 28,434 လင် ၼႆယဝ်ႉ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ – “တင်ႈတႄႇ သိုၵ်းမၢၼ်ႈယိုတ်းဢႃႇၼႃႇမႃး တေႃႇထိုင် ဝၼ်းတီႈ 25/8/2022 ၼႆႉ ၸုမ်းဢၼ်ယူႇတႂ်ႈသိုၵ်းမၢၼ်ႈ ၵုမ်းၵမ်ၼၼ်ႉ ၽဝ်ႁိူၼ်းယေး ၵူၼ်းဝၢၼ်ႈၵႂႃႇ တင်းမူတ်း 28,434 လင် ၼႂ်းၼၼ်ႉ ပႃးမိူင်း တႆး 132 လင် ။ ၼႂ်း 132 လင်ၼၼ်ႉ ပဵၼ်ၼႂ်းၸႄႈဝဵင်းၾၢႆၶုၼ်တင်း ယႂႃႇငၢၼ်ႇ ၸိုင်ႈတႆးပွတ်းၸၢၼ်း”- ဝႃႈၼႆ။

ႁိူၼ်းယေး ၵူၼ်းဝၢၼ်ႈ ဢၼ်ထုၵ်ႇၾႆးၽဝ် 28,434 လင်ၼႆႉ မိူၼ်ၼင်ႇ – ၼႂ်းတိူင်းပႃႇၵိူဝ် (တွၼ်ႈဢွၵ်ႇ) 16 လင်၊ တိူင်းပႃႇ ၵိူဝ် (တွၼ်ႈတူၵ်း) 27 လင်၊ ၸႄႈမိူင်းၶျၢင်း 1,474 လင်၊ ၸႄႈမိူင်းၶၢင် 405 လင်၊ ၸႄႈမိူင်းယၢင်းလႅင် 418 လင်၊ ယၢင်း ၽိူၵ်ႇ 7 လင်၊ တိူင်းမၵူၺ်း 5,418 လင်၊ တိူင်းဝဵင်းလိူဝ်ႇ 75 လင်၊ ၸႄႈမိူင်းမွၼ်း 211 လင်၊ တိူင်းၸႄႈၵႅင်း 20,153 လင်၊ မိူင်းတႆးပွတ်းၸၢၼ်း 132 လင်လႄႈ တိူင်းတႃႈၼၢဝ်းသီ 98 လင် ဝႃႈၼႆ။