ၵႃႈၸႂ်ႉၸၢႆႇၼႂ်းၵၢၼ်ၽုၵ်ႇသွမ်ႈသဵင်ႈၼမ် ၶၼ်ၶူဝ်းၵုၼ်ႇဢၼ်ဢွၵ်ႇမႃးသမ်ႉလႆႈၶၢႆထုၵ်ႇၶၢႆပေႃး၊ ၸဝ်ႈၼႃးၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၵိၼ်းၸႂ်။  

ၶၢဝ်းၽုၵ်ႇသွမ်ႈၵႃႈပီပူၼ်ႉမႃးၼႆႉ ၾိင်ႈၾႃႉဢမ်ႇလီ ၾူၼ်ဢမ်ႇလိူင်ႇ တႃႇႁႂ်ႈတူၼ်ႈမၢၵ်ႇပူင်းလီ ၼၼ်ႉလႆႈၸႂ်ႉၾုၼ်ႇထၢတ်ႈၼမ် ၵႃႈၸႂ်ႉၸၢႆႇၵၢၼ်ၽုၵ်ႇသွမ်ႈတူၵ်းမႅၼ်ႈၼမ်သေ ၽိူဝ်ႇထိုင်ၶၢဝ်းၵဵပ်း ပၢတ်ႇမႃး မၢၵ်ႇၶဝ်ႈတဝ်ႈၼမ်ႉဢၼ်ဢွၵ်ႇတီႈၼႃးၸဝ်ႈၵဝ်ႇသမ်ႉ ၶၢႆလႆႈၵႃႈၶၼ်ထုၵ်ႇပေႃးလႄႈ ၸဝ်ႈၼႃးယွင်ႁူၺ်ႈယၢပ်ႇၵိၼ်းၸႂ်။

ၸဝ်ႈၼႃး ၼႂ်းၼွင်ႁၢႆးယႃႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၶၼ်ၾုၼ်ႇထၢတ်ႈ 1 ထူင် သႅၼ်ပၢႆယဝ်ႉ။ ယွၼ်ႉၾူၼ် ဢမ်ႇတူၵ်းသေ တူၼ်ႈၶဝ်ႈ ဢမ်ႇလႆႈႁပ်ႉၼမ်ႉလႄႈ လႆႈၸႂ်ႉၾုၼ်ႇ ထၢတ်ႈၼမ်။ တေႃႈလဵဝ်သမ်ႉ ၾူၼ်တူၵ်းၼမ် ၼမ်ႉလုပ်ႇထူမ်ႈၼႃးလႄႈ ၶဝ်ႈဢမ်ႇဢွၵ်ႇၸွမ်းၼင်ႇဢၼ်မုင်ႈမွင်းဝႆႉ။ ”- ဝႃႈၼႆ။  

ၶၼ်ၶဝ်ႈသၢၼ်ၼႂ်းၵၢတ်ႇယၢမ်းလဵဝ် ၼိုင်ႈၶႂၢႆး 4 မိုၼ်ပျႃး။ ၵူၺ်းၵႃႈၶဝ်ႈပိူၵ်ႇဢၼ်ဢွၵ်ႇၼႂ်းၼႃးသမ်ႉလႆႈၶၢႆၶၼ်ထုၵ်ႇလိူဝ်ႁႅင်း။ ၾၢႆႇၸဝ်ႈၼႃးယၢပ်ႇၽိုတ်ႇ သုမ်းႁႅင်း။

ၾၢႆႇၼိုင်ႈဢၼ်ႁဵတ်းႁႂ်ႈၼမ်ႉထူမ်ႈတူင်ႈၼႃးၼႆႉ ပဵၼ်ယွၼ်ႉ လၢႆႇၼမ်ႉဢၼ်လႆၶဝ်ႈ လႆဢွၵ်ႇ တီႈၼွင်ႈႁၢႆးယႃႈ တၼ်၊ တိုၼ်ႈ။  ၽွင်းၶၢဝ်းမႆႈ ၼမ်ႉၼွင်ႁႅင်ႈ ၽွင်းၶၢဝ်းၾူၼ်သမ်ႉ ၵုၼ်ၽူးယွႆႈ၊ တူၼ်ႈယိူဝ်ႈယႃႈလႄႈ ငႂ်ႈတဝ်းၼႂ်းၼွင်ၸိူဝ်းၼၼ်ႉ လွင်ႈၶမ်လၢႆႇၼမ်ႉ ဢၼ်လႆလူင်းမႄႈၼမ်ႉ ၽီလူး။ ႁဵတ်းႁႂ်ႈလၢႆႇၼမ်ႉတၼ်လႄႈ ၼမ်ႉယိုင်ႈၶိုၼ်ႈ ထူမ်ႈၼႃးႁိူၼ်းယေးၵူၼ်းဝၢၼ်ႈၸိူဝ်းယူႇႁိမ်းၾင်ႇၼွင်။

“ပီၼႆႉ ၸဝ်ႈၼႃးသုမ်းၼမ်  ငိုၼ်းတိုၼ်းတႃႇပီတေမႃးယၢပ်ႇၽိုတ်ႇ၊ ဢၼ်တေၽုၵ်ႇသွမ်ႈၼႂ်းပီတေမႃးၼႆႉ တေၵိုတ်း သၢမ်ပုၼ်ႈသွင်ပုၼ်ႈ ၵူၺ်းယဝ်ႉ။  ၵႃႈၸရိတ်ႈၵေႃႈၵႃႈ ၾုၼ်ႇထၢတ်ႈၵေႃႈ ၵႃႈႁႅင်း၊ တူၼ်ႈၶဝ်ႈၵေႃႈ ဢမ်ႇလီ ၸိူင်ႉၼႆ ပဵၼ်ဢၼ်ယၢပ်ႇၽိုတ်ႇ တႃႇၸဝ်ႈၼႃးႁဝ်းၶႃႈတႄႉဢေႃႈ”- ၸဝ်ႈၼႃး သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ်လွင်ႈလၢႆႇၼမ်ႉတၼ်ၼၼ်ႉသေ ၸဝ်ႈၼႃးလႄႈ ၵူၼ်းမိူင်း ဢွၼ်ၵၼ်တုၵ်းယွၼ်း တီႈၽွင်းလူင် ၾၢႆႇမိူင်ၼမ်ႉလႄႈၾၢႆ မႃးၵႄႈလိတ်ႈပၼ် တေႃႇထိုင်ယၢမ်းလဵဝ်ၵေႃႈ ပႆႇမႃးတူၺ်းၸွႆႈ ၵႄႈလိတ်ႈသင်ပၼ် ၼႆယဝ်ႉ။

တေႃႈလဵဝ် ၵူၼ်းၼႂ်းၼွင်ႁၢႆးယႃႈ ဢၼ်လႆႈၸႂ်ယႂ်ႇ ႁဵတ်းၵၢၼ်ႁႃၵိၼ်လဵင်ႉတွင်ႉ လွင်ႈၵၢၼ်ၽုၵ်ႇသွမ်ႈၼႆႉ တေပဵၼ်ဝၢၼ်ႈမေႃႇပီႇ (မှော်ဘီကျေးရွာ)၊ တွင်ႇၶျေႇ(တောင်ခြေကျေးရွာ)၊ လွႆမၢဝ်း (လွယ်မောရွာ) ၊ မိူင်းပဵဝ်း (မိုင်းပျိုးရွာ) ၸိူဝ်းၼႆႉ။   ပီၼႆႉၶၼ်ၶဝ်ႈဢမ်ႇမီး ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇႁႅင်း။