ၸုမ်းပျီႇတူႉၸိတ်ႉ ပဢူဝ်း PNO ယိုတ်း တီႈလိၼ်ၵူၼ်းမိူင်းသီႇသႅင်ႇ ဢမ်ႇယွမ်း 10 ဢေႊၶိူဝ်ႊ။
မိူဝ်ႈဝႃး ဝၼ်းတီႈ 24/8/2022 ၸုမ်းပျီႇတူႉၸိတ်ႉ ပဢူဝ်း PNO ဢဝ်ၸၢၵ်ႈမႃးထႆ သူၼ်ၶဝ်ႈၵၢပ်ႇ/ တူင်ႈၼႃး တီႈလိၼ်ၵူၼ်းဝၢၼ်ႈၼွင်ပႃယဵၼ်ႇ ဢိူင်ႇတၢမ်ၽၢၵ်ႇ ၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ယင်းပႆႇလႆႈၵဵပ်းမၢၵ်ႇၶဝ်ႈတဝ်ႈၼမ်ႉ။
ၵူၼ်းသီႇသႅင်ႇ လၢတ်ႈတီႈၽူႈတွႆႇႁွၵ်ႈဝႃႈ – “တီႈလိၼ်ၶႃႈၼႆႉ ၶဝ်သိမ်းဢဝ်ၵႂႃႇမူတ်း။ ၶဝ်မႃးသိမ်းဢဝ်လၢႆၵႂႃႇ မိူဝ်ႈႁူဝ်လိူၼ် ၵျုႊလၢႆႊၼၼ်ႉ။ ဢမ်ႇၸႂ်ႈတီႈလိၼ်ၶႃႈၵူၺ်းဢၼ်ၺႃးယိုတ်းၼႆ။ပႃးထႅင်ႈတီႈလိၼ်ၵူၼ်းဝၢၼ်ႈလၢႆလၢႆၵေႃႉၵွၼ်ႇဢေႃႈ။ ၵွပ်ႈသင်လႄႈၶဝ်မႃးသိမ်း ဢဝ်ၵႂႃႇဢၼ်ဝႃႈၼႆႉ ထၢမ်ၶဝ်ၵေႃႈ ဢမ်ႇတွပ်ႇသင်။ ယဝ်ႉၵေႃႈ ပၢႆလႃႇႁိုတ်းသႂ်ႇ ၵူၼ်းဝၢၼ်ႈထႅင်ႈၵွၼ်ႇ။ တူၼ်ႈမၢၵ်ႇၶဝ်ႈတဝ်ႈၼမ်ႉဢၼ်မီးၼႂ်းသူၼ်ၼႂ်းၼႃးၵေႃႈ ၶဝ်ယႃႉပႅတ်ႈမူတ်း”- ဝႃႈၼႆ။
တီႈလိၼ် ၵူၼ်းဝၢၼ်ႈၼွင်ပႃယဵၼ်ႇ ၼႂ်းဢိူင်ႇတၢမ်ႇၽၢၵ်ႇ ဢၼ်ထုၵ်ႇၸုမ်းပျီႇတူႉၸိတ်ႉပဢူဝ်း PNO ဢထမ်ႇမ ယိုတ်း ဢဝ်လၢႆၵႂႃႇ မိူဝ်ႈဝၼ်းတီႈ 4/7/2022 ပူၼ်ႉမႃးၼၼ်ႉ ဢမ်ႇယွမ်း 13 ဢေႊၶိူဝ်ႊ။
ဢွင်ႈတီႈလိၼ် ၸိူဝ်းၼႆႉ ပဵၼ်တီႈလိၼ်မီးဝႂ် ဢၼ်ၶဝ်ႈပဵၼ်တၢင်းၵၢၼ်တင်းမူတ်း။ ဢိင်ၼိူဝ် လွင်ႈပျီႇတူႉၸိတ်ႉပဢူဝ်း PNO ဢထမ်ႇမ ယိုတ်းဢဝ်လၢႆ ၸိူင်ႉၼႆၼႆႉ ယူႇတီႈ ၵူၼ်းဝၢၼ်ႈ တိူင်ႇလၢတ်ႈတီႈလုမ်းၽူႈမီးပုၼ်ႈၽွၼ်းၶဝ်ၵေႃႈ ဢမ်ႇမႃးၵေႈ လိတ်ႈပၼ်သင်။ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇ တႃႇႁႃၵိၼ်လဵင်ႉတွင်ႉ။
“ၶႃႈႁဝ်းသမ်ႉ ပဵၼ်ၵူၼ်းႁႃလဵင်ႉၼႂ်းမုင်ႉႁေႃႁိူၼ်း။ လုၵ်ႈလၢင်းၵေႃႈဢမ်ႇမီး။ ဢႃယုၵေႃႈ ယႂ်ႇယဝ်ႉ။ တေၵႂႃႇႁဵတ်းၵၢၼ် ႁႃၵိၼ် ၸွမ်းဝၼ်းၵေႃႈ ဢမ်ႇပဵၼ်လႆႈယဝ်ႉ။ တေႃႈလဵဝ် ၽုၵ်ႇဝႆႉၶဝ်ႈ ၸိူဝ်းၼႆႉ မိူဝ်ႈဝႃး ဝၼ်းတီႈ 24 ၶဝ်ဢဝ်ၸၢၵ်ႇမႃးထႆပႅတ်ႈမူတ်း ၶႃႈ”- ၵူၼ်းသီႇသႅင်ႇ သိုပ်ႇလၢတ်ႈၼႄၼင်ႇၼႆ။
မိူဝ်ႈပီ 2020 လိူၼ်မေႊပူၼ်ႉမႃးၼၼ်ႉ သိုၵ်းမၢၼ်ႈတင်း ၸဝ်ႈၼႃး တင်းမူတ်း 5 ဝၢၼ်ႈ လႆႈၽိတ်းမေႃးထဵင်ၵၼ် ၵဵဝ်ႇလူၺ်ႈ လွင်ႈတီႈလိၼ်သူၼ်ႁႆႈၼႃး ၼႂ်းၸႄႈဝဵင်းသီႇသႅင်ႇၼႆႉသေ ၸဝ်ႈၼႃး 70 ၵေႃႉ ထုၵ်ႇၸွႆးတြႃး ၸၢၵ်ႈထႆၼႃး 29 လင် ထုၵ်ႇ ယိုတ်းဢဝ်လၢႆ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ