SHRF ၸုမ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး တင်း TSU ၸုမ်းၽွမ်ႉႁူမ်ႈလုၵ်ႈႁဵၼ်း ႁူမ်ႈၵၼ် တုၵ်းယွၼ်း ႁႂ်ႈၶွမ်ႊပၼီႊ ၸိူဝ်းတိုၵ်ႉၶုတ်းၶမ်း တၢင်းဢွၵ်ႇဝဵင်းတႃႈၶီႈလဵၵ်း ၸိူဝ်းၼၼ်ႉ ႁႂ်ႈ ၵိုတ်းယင်ႉတင်းမူတ်း ၵွပ်ႈဝႃႈ မၼ်းတုမ်ႉတိူဝ်ႉ ၵူၼ်းမိူင်းလႄႈ ၶူဝ်းတိုၼ်းသၽႃႇဝ ႁၢဝ်ႈႁႅင်း။
မိူဝ်ႈၼႆႉ ဝၼ်းတီႈ 24/8/2022 ယူႇတီႈ ၵဝ်ႉငဝ်ႈသုၼ်ႇလႆႈၵူၼ်း SHRF လႄႈ ၸုမ်းၽွမ်ႉႁူမ်ႈလုၵ်ႈႁဵၼ်းတႆး TSU ႁူမ်ႈ ၵၼ်သေ ဢွၵ်ႇၽိုၼ်တၢမ်းငဝ်းလၢႆး လွင်ႈၵူၼ်းဝၢၼ်ႈၼႃးႁႆးလူင် ဢိူင်ႇမိူင်းလဵၼ်း ဝဵင်းတႃႈလိူဝ်ႇ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ဢၼ်ထုၵ်ႇၶီႈၵူမ်ႇဢုင် ထူမ်ႈဝၢၼ်ႈယွၼ်ႉၵၢၼ်ၶုတ်းၶမ်းၼၼ်ႉ ဝႃႈၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈဝႃႈ – “ပိူင်လူင်တႄႉ ႁဝ်းၶႃႈ တုၵ်းယွၼ်းႁႂ်ႈၶွမ်ႊပၼီႊ ၸိူဝ်းတိုၵ်ႉ ၶုတ်းၶမ်းယူႇၼႆႉ ၵိုတ်းတင်းမူတ်း ၵွပ်ႈဝႃႈ မၼ်းတုမ်ႉတိူဝ်ႉ တူင်ႇဝူင်းၵူၼ်းလႄႈ ၶူဝ်းတိုၼ်းသၽႃႇဝ ႁၢဝ်ႈႁႅင်း။ ထႅင်ႈလွင်ႈ ၼိုင်ႈ တုၵ်းယွၼ်းၶွမ်ႊပၼီႊ ၼွၵ်ႈမိူင်းယႂ်ႇလူင် မိူၼ်ၶွမ်ႊပၼီႊ Locrian Precious Metals ဢွတ်ႊသတြေးယႃႊၶဝ် ထွၼ်တူဝ်ဢွၵ်ႇၼႂ်း ၵၢၼ်လူင်းတိုၼ်းလၢင်းၶုတ်းၶမ်း။ ၵွပ်ႈဝႃႈ ပိုၼ်ႉတီႈၶဝ်လႆႈၶႂၢင်ႉဝႆႉၼၼ်ႉ ယႂ်ႇလူင်လၢင်လႄႈ တေတုမ်ႉတိူဝ်ႉ ၵူၼ်းဝၢၼ်ႈၵူၼ်းမိူင်း ၸိူဝ်းယူႇပွတ်းတွၼ်ႈတၢင်းၼၼ်ႉတင်းမူတ်း”- ဝႃႈၼႆ။
ၵၢၼ်ၶုတ်းၶမ်းၼႆႉ ယႃႉၼမ်ႉလိၼ်ႁိၼ်ၾႃ ယွၼ်ႉမၼ်းတုမ်ႉတိူဝ်ႉ ၶူဝ်းတိုၼ်းသၽႃဝ တင်းတူင်ႇဝူင်းၵူၼ်း၊ ႁဵတ်းႁႂ်ႈၵူၼ်းဝၢၼ်ႈ ၵူၼ်းမိူင်းၼႂ်းပိုၼ်ႉတီႈ ထူပ်းတၢင်းယၢပ်ႇၽိုတ်ႇ လႆႈၶၢႆႉပၢႆႈ ႁဵတ်းၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇလႄႈ ဢမ်ႇၸႂ်ႈၽွၼ်းလီ တႃႇပီႈၼွင်ႉၵူၼ်းဝၢၼ်ႈၵူၼ်းမိူင်းသင် ၸိူဝ်းပဵၼ်ၸဝ်ႈၶွင်မၼ်းမႃး ပၢၼ်သိုပ်ႇပၢၼ်တႄႉ ပဵၼ်ၽွၼ်းလီ တႃႇၸဝ်ႈၼႃႈတီႈ သိုၵ်းမၢၼ်ႈၶဝ်လႄႈ ၽူႈလူင်းတိုၼ်းလၢင်းၶဝ်ၵူၺ်း ၸၢႆးႁေႃသႅင်လၢတ်ႈ။
လွင်ႈၼမ်ႉၼွင်းထူမ်ႈၼႆႉ တိုၼ်းႁၢင်ႈႁၢႆႉမႃးၵူႈပီ တင်ႈတႄႇဢဝ်ၶိူင်ႈၸၢၵ်ႈမႃးၶုတ်းၶမ်း ၼႂ်းပီ 2007 ဢွင်ႈတီႈလႅင်ႇ ၼမ်ႉမႄႈ ၼမ်ႉၶမ်း ဢၼ်ယူႇတၢင်းၸၢၼ်းဝၢၼ်ႈၼႃးႁႆးလူင် ၼႂ်းဢိူင်ႇမိူင်းလဵၼ်းၼၼ်ႉ။ ဢွင်ႈထၢင်ၶုတ်းၶမ်းၼၼ်ႉ မေႇၶႂၢၵ်ႈၵႂၢင်ႈထိုင် 10 ၵီႊလူဝ်ႊမေႊတိူဝ်ႊ ၸွမ်းထုင်ႉသၼ်လွႆၶမ်း ဢၼ်ယူႇၸွမ်းသၢပ်ႇမႄႈၼမ်ႉၶွင် ၼႃႈတၢင်းတူၵ်းၼၼ်ႉ။ ၶီႈၵူမ်ႇၶီႈလိၼ် ဢၼ်လႆလူင်းမႃး ပႃးတင်းၵွင်ႉသၢၼ်ႊ၊ သၢႆႊယႃႊၼၢႆႊ ၼႂ်းၼွင်ၶိုင်ၶမ်းၼၼ်ႉမႃး ဢိုတ်းတၼ်ပႅတ်ႈမႄႈၼမ်ႉၶမ်းသေ ႁဵတ်းႁႂ်ႈ ၾင်ႇမႄႈၼမ်ႉၶမ်း ၵမ်းၵမ်း လႆႈၵူၼ်ႇပင်း ၼႂ်းၶၢဝ်းၾူၼ်။
လွင်ႈတုမ်ႉတိူဝ်ႉလူႉသုမ်း တီႈၼႃးႁႆးလူင် ပီၼႆႉ လႆႈဝႃႈလူႉယႂ်ႇသုမ်းလူင်လၢင် ၶီႈလိၼ်လႆလုပ်ႇၶဝ်ႈႁိူၼ်း ၵူၼ်းဝၢၼ်ႈသိပ်း ၸဵတ်းႁိူၼ်းသေ ႁဵတ်းႁႂ်ႈၼႂ်းၼၼ်ႉ ၵဝ်ႈႁိူၼ်းႁူပ်ႉၺႃးတၢင်းလူႉသုမ်းယႂ်ႇၼမ်။ ၽူႈၵွၼ်းၸႄႈဝဵင်းတႃႈလိူဝ်ႇ ၵေႃႉဢၼ်ပဵၼ် ၽူႈၵပ်းသၢၼ်ပၼ်ၼႂ်းၵႄႈၶွမ်ႊပၼီႊၶုတ်းၶမ်းလႄႈ ၵူၼ်းဝၢၼ်ႈၸိူဝ်းထူပ်းၺႃး လွင်ႈတုမ်ႉတိူဝ်ႉ ပွၵ်ႈၼႆႉ လႆႈႁၢင်ႈႁႅၼ်းဢဝ် လူတ်ႉၸူင်/ ၶုတ်း မႃးၵိူၵ်ႇၸူင်ဢွၵ်ႇၶီႈလိၼ်ၼၼ်ႉ ပၼ်ၵူၼ်းဝၢၼ်ႈယူႇ ၵူၺ်းၵႃႈ လွင်ႈသၢႆႈတႅၼ်းသင်တႄႉ ဢမ်ႇႁၼ်ၸွႆႈပႃး ဝႃႈၼႆ။
တင်ႈတႄႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး မိူဝ်ႈၼႂ်းလိူၼ်ၾႅပ်ႊပိဝ်ႊရီႊ 2021 ၼၼ်ႉယဝ်ႉ မီးၶူင်းၵၢၼ် ၶုတ်းမိူင်/ ၶမ်း မႃးၽႂ်းၶၼ် ပိူဝ်ႈတႃႇ ပဵၼ်လွၵ်းလၢႆး ႁႃလၢႆးလႆႈပၼ်သိုၵ်းမၢၼ်ႈၼၼ်ႉသေ လွင်ႈၼႆႉ ပဵၼ်ၵၢၼ်ၵိုင်ႉၵၢင်ႉ ႁဵတ်းႁိပ်ႈၼႅတ်ႈ မႃးလိူဝ်ၵဝ်ႇ။
တၢမ်ၼင်ႇသဵၼ်ႈမၢႆ ဢၼ်လုမ်းႁွင်ႈၵၢၼ်လူင်ၽၢႆႇႁၵ်ႉသႃလႄႈ မႅတ်ႇပႅင်းၶူဝ်းတိုၼ်းသၽႃဝ လူင်ပွင်ၸိုင်ႈမၢၼ်ႈ ဢၼ် ဢွၵ်ႇ ၼႂ်းလိူၼ်ၼူဝ်ႊဝႅမ်ႊပိူဝ်ႊ 2021 ၼၼ်ႉလၢတ်ႈဝႆႉဝႃႈ မီးၶွမ်ႊပၼီႊ 12 ဢၼ်လႆႈဝႂ်ၶႂၢင်ႉတႃႇၶုတ်းၶမ်း ၼႂ်း ပိုၼ်ႉတီႈမိူင်း လဵၼ်း ၶၢဝ်းတၢင်း 11 ပီသေ ၸိူဝ်းလႆႈဝႂ်ၶႂၢင်ႉၶုတ်းတႃႇၶၢဝ်းတၢင်းဢႃယု မူတ်း 1 ပီသမ်ႉ မီးၶွမ်ႊပၼီႊ 9 ဢၼ်။
ၼႂ်းၶွမ်ႊပၼီႊ ၸိူဝ်းလႆႈဝႂ်ၶႂၢင်ႉၶုတ်းၼႆႉ မီးၶွမ်ႊပၼီႊ 13 ဢၼ်လႆႈ (ထိုင်ၶွမ်ႊပၼီႊ 8 ဢၼ်) လႆႈဝႂ်ၶႂၢင်ႉၼႂ်းၵၢင်ပီ 2020 သေတႃႇ ၶွမ်ႊပၼီႊ 7 ဢၼ် (ထိုင်ၶွမ်ႊပၼီႊ 5 ဢၼ်) သမ်ႉ လႆႈၶႂၢင်ႉၼႂ်းပီ 2021 ဝၢႆးသိုၵ်းမၢၼ်ႈယိုတ်း ဢႃႇၼႃႇ ၸိုင်ႈ မိူင်း မိူဝ်ႈဝၼ်းတီႈ 1/2/2021။ ၼႂ်းဝႂ် ပၼ်ၶႂၢင်ႉၼၼ်ႉ ၼိုင်ႈၶွမ်ႊပၼီႊလႂ် လႆႈဝႆႉပိုၼ်ႉတီႈ လွၵ်းၶုတ်းမၼ်း 20 ဢေႊၵႃႊ SHRF တင်း TSU ဢွၵ်ႇၽိုၼ်တၢမ်းငဝ်းလၢႆးဝဵင်းၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ