Wednesday, July 17, 2024

တႆးႁွတ်ႈမိူင်းၵွၵ်ႇၵေႃႉၼိုင်ႈ ၺႃးလွၵ်ႇလႅၼ် သုမ်းငိုၼ်းထႆးၼပ်ႉမိုၼ်ႇ

Must read

ႁႅင်းၵၢၼ်တႆး ႁွတ်ႈမိူင်းၵွၵ်ႇၵေႃႉၼိုင်ႈ သႂ်ႇငိုၼ်းၼပ်ႉမိုၼ်ႇသေ ႁူမ်ႈလူင်းၵေးလၢင်းၵႃႉၶၢႆ တၢင်း ဢွၼ်ႊလၢႆႊ ဢမ်ႇလႆႈၶိုၼ်းငိုၼ်းသေပႅၵ်ႉ။

ၵၢၼ်ၵႃႉၶၢႆ ဢွၼ်ႊလၢႆႊ

ဝၼ်းတီႈ 16-17/8/2022 ပူၼ်ႉမႃးၼႆႉ ယိင်းတႆး ၵေႃႉၼိုင်ႈ ႁဵတ်းၵၢၼ် တူၺ်းလူလုၵ်ႈဢွၼ်ႇ တီႈဝဵင်း ၵုင်းထဵပ်ႈ (မိူင်းၵွၵ်ႇ) ၸိုင်ႈထႆးၼၼ်ႉ ႁၼ်ၼိူဝ်ၽဵတ်ႉပုၵ်ႉ ပိူၼ်ႈပိုၼ်ၽၢဝ်ႇ ႁႂ်ႈႁူမ်ႈၵေးလၢင်းတႃႇၶၢႆၶူဝ်း ဢွၼ်ႊလၢႆႊ၊ မၼ်းၼၢင်းၵေႃႈ  ၶဝ်ႈလူင်း ၵေးလၢင်း ၵႃႉၶၢႆၸွမ်း လႄႈ  သုမ်းငိုၼ်းၵႂႃႇ 12,900 ဝၢတ်ႇ။

- Subscription -

ၵေႃႉထုၵ်ႇလႅၼ်ၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ၶႃႈဝႃႈ ဢမ်ႇမီးငိုၼ်းယဝ်ႉ။ ၶႃႈတေဢဝ် ငိုၼ်းဢၼ် ၶႃႈဢူၼ်းပၼ်ဝႆႉ တင်းမူတ်း 12,900 ဝၢတ်ႇၼၼ်ႉၶိုၼ်း။ ၶဝ်ဝႃႈ တေလႆႈဢူၼ်းပၼ် 25,800 ဝၢတ်ႇ ၵွၼ်ႇ ပေႃး ၶႂ်ႈ လႆႈငိုၼ်း ၸိူဝ်းၼၼ်ႉၼႆသေ ၶဝ်မွတ်ႇ/ လူပ်းၶႃႈဢွၵ်ႇ ၼႂ်းၵုမ်ႇၶဝ်ၼၼ်ႉပႅတ်ႈဢေႃႈ။ ဢမ်ႇၸၢင်ႈၵပ်း သိုပ်ႇလႆႈၶိုၼ်းယဝ်ႉၶႃႈ ငိုၼ်းၼၼ်ႉၵေႃႈ သုမ်းပႅတ်ႈလၢႆလၢႆယဝ်ႉ”- ဝႃႈၼႆ။

ၵမ်းဢွၼ်တၢင်း မၼ်းၼၢင်းတႄႇလူင်းၵေးလၢင်း 200 ဝၢတ်ႇ လႆႈၶိုၼ်း 270 ဝၢတ်ႇ၊ ဝၼ်းတီႈ 16/8/2022 ၵမ်းတီႈ 2  သႂ်ႇငိုၼ်းထႅင်ႈ 2,000 ဝၢတ်ႇ လႆႈၶိုၼ်း 2,400 ဝၢတ်ႇ။ ဝၼ်းတီႈ 17/8/2022 ပိူၼ်ႈႁႂ်ႈသႂ်ႇ 4,300 ဝၢတ်ႇ ။  ဝၢႆးၼၼ်ႉဢမ်ႇႁိုင် ၸႂ်ႉမၼ်းၼၢင်းသႂ်ႇထႅင်ႈ 8,600 ဝၢတ်ႇ ႁူမ်ႈသဵင်ႈ မႅၼ်ႈၵႂႃႇ 12900 ဝၢတ်ႇ။  မၼ်းၼၢင်းယွၼ်းငိုၼ်းၶိုၼ်း ၶဝ်သမ်ႉဢမ်ႇပၼ်မၢၼ်းၼၢင်းသေ ၸႂ်ႉသႂ်ႇငိုၼ်းထႅင်ႈ 25,800 ဝၢတ်ႇ။ မၼ်းၼၢင်းဢမ်ႇသႂ်ႇထႅင်ႈလႄႈ ၾၢႆႇၸုမ်းၵုမ်းငိုၼ်း တတ်းၶၢတ်ႇလွင်ႈၵပ်းသိုပ်ႇမၼ်းၼၢင်းပႅတ်ႈ ဢဝ်သုမ်းလၢႆ ပႅတ်ႈမူတ်း။

ႁႅင်းၵၢၼ် ၵေႃႉၺႃးလႅၼ်ၼႆႉ ပဵၼ်ၵူၼ်းၸႃတိ ဝဵင်းလွႆလႅမ် ၶဝ်ႈႁဵတ်းၵၢၼ်မိူင်းထႆး မီး10 ပီ  ပၢႆ။ ယၢမ်းလဵဝ် ႁဵတ်းၵၢၼ်လုမ်းလႃးတူၺ်းထိုင်လုၵ်ႈဢွၼ်ႇဝႆႉ တီႈဝဵင်းၵုင်းထဵပ်ႈ(မိူင်းၵွၵ်ႇ)  ။

ၸုမ်းလႅၼ်ငိုၼ်းတီႈမၼ်းၼၢင်းၼၼ်ႉ ဝႃႈပဵၼ် ၶွမ်ႊပၼီႊ ႁႂႃႊဝူၺ်ႊ ဢၼ်ပၵ်းလုမ်းဝႆႉ မိူင်းၵူဝ်းလီးယႃးၸၢၼ်း ဝႃႈၼႆ။

ဝၼ်းတီႈ 12/8/2022 ပူၼ်ႉမႃးၼႆႉၵေႃႈ ႁႅင်းၵၢၼ်တႆး မႄႈလုၵ်ႈဢွၼ်ႇ ၵေႃႉၼိုင်ႈ ဢၼ်ယူႇသဝ်းဝႆႉ တီႈၸႄႈဝဵင်း သၼ်ၵမ်ႊၽႅင်း ၸႄႈတွၼ်ႈၵဵင်းမႆႇၼၼ်ႉၵေႃႈ ၺႃးၵူၼ်းဢမ်ႇႁူႉၾၢႆႇ ၵပ်းၾူၼ်းၸူး လႅၼ်လၢတ်ႈဝႃႈ ပဵၼ်ပလိၵ်ႈၼႆသေ ႁႂ်ႈဢူၼ်းငိုၼ်းပၼ် ။ သင်ဢမ်ႇဢူၼ်းပၼ်ၸိူင်ႉၼင်ႇၶဝ်ယွၼ်းၼႆ တေမႃးတီႉၽႅဝ်တီႈႁိူၼ်း လွၵ်ႇငိုတ်ႈပႃးၸိူင်ႉၼႆလႄႈ ႁႅင်းၵၢၼ်တႆး မႄႈလုၵ်ႈ ဢွၼ်ႇ လႆႈဢူၼ်းပၼ်ငိုၼ်း 25,814 ဝၢတ်ႇ ၼၼ်ႉၵေႃႈ သုမ်းလၢႆ ဢမ်ႇလႆႈၶိုၼ်းငိုၼ်းသေပႅၵ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း