ၶၼ်ၼမ်ႉမၼ်းၸိူဝ်ႉၾႆး ၼႂ်းမိူင်းတႆး လၢႆၸႄႈဝဵင်း ၵိုင်ႉၵၢင်ႉပုင်ႈၶိုၼ်ႈႁႅင်း 1 လိတ်ႊလႂ် 3,500 ပျႃး ထိုင် 4,000 ပျႃး မၢင်တီႈႁႃ သိုဝ်ႉယၢပ်ႇ ၊ မၢင်တီႈ ဢမ်ႇမီးၼမ်ႉမၼ်းၶၢႆ ၸိူဝ်းၼႆႉ။

တႄႇဢဝ် ၵၢင်လိူၼ်ဢေႃႊၵတ်ႊသ်ၼႆႉမႃး ၶၼ်ၼမ်ႉမၼ်းၸိူဝ်ႉၾႆး တၢင်းၸႄႈဝဵင်းမူႇၸေႊ (92) 1 လိတ်ႊ 4,000 ပျႃး၊ လၢင်းၶိူဝ်း 1 လိတ်ႊ 3,500 ပျႃး၊ ဝဵင်းပၢင်လွင်း 1 တဝ်ႈ 3,500 ပျႃး။ လိူဝ်ၼၼ်ႉ ၵုၼ်လူင်၊ ၵႃလီႉ၊ မိူင်းသူႈ၊ လၢႆးၶႃႈ၊ မိူင်းၵိုင်လႄႈ ၵဵင်းတုင် ၸိူဝ်းၼႆႉ ဢိၵ်ႇထႅင်ႈ လၢႆၸႄႈဝဵင်း 1 လိတ်ႊ ဢမ်ႇယွမ်း 3,000 ပျႃး ႁဵတ်းႁႂ်ႈ ၵူၼ်းမိူင်းပိုၼ်ႉတီႈ ဢွၼ်ၵၼ် ထူပ်း တၢင်းယၢပ်ႇၽိုတ်ႇႁႅင်း။

ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ 1 လိတ်ႊ 4,000 ပျႃး။ မိူဝ်ႈၼႆႉၵေႃႈ ၶၼ်မၼ်းပႆႇလူင်း တေမီးမွၵ်ႈ ၼၼ်ႉယူႇ။ ပမ်ႉၼမ်ႉမၼ်း မၢင်ႁၢၼ်ႉ ပေႃးပိၵ်ႉဢိုတ်းၶႃႈဢေႃႈ ယွၼ်ႉၶၼ်ၼမ်ႉမၼ်းၶိုၼ်ႈႁႅင်း။ ၸိူဝ်းဢဝ်ပုင်းၵႂႃႇသိုဝ်ႉ ၸိူဝ်းၼႆႉတႄႉ ၶဝ် ဢမ်ႇၶၢႆပၼ်ယဝ်ႉ  ”- ဝႃႈၼႆ။

ၼႂ်းၸႄႈဝဵင်းမိူင်းၵိုင်သမ်ႉ 1 ပုင်းပီႇပႃႇလႂ် 6 သႅၼ်ပျႃး ၼိုင်ႈပီႇပႃႇသမ်ႉ မီး 50 ၵႃႊလၼ်ႊ (1 ၵႃႊလၼ်ႊ မီး 4 လိတ်ႊၶိုင်ႈ) ။ ၽွင်းၶၼ်ၼမ်ႉမၼ်းၸိူဝ်ႉၾႆး  ၶိုၼ်ႈသုင်၊ ႁႃသိုဝ်ႉယၢပ်ႇမႃးၼႆႉ  ၵူၼ်းၸႂ်ႉရူတ်ႉၵႃး ယွမ်း လူင်းၵႂႃႇၼမ်။

ၵူၼ်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၼႂ်းဝဵင်းမိူင်းၵိုင်ၼႆႉ သဵင်ရူတ်ႉ ပေႃးယဵၼ် လူင် ဝႆႉယဝ်ႉ။ ၵူၼ်းၸႂ်ႉရူတ်ႉၵႃး ယွမ်းလူင်းဢေႃႈ။ ၵူႈပွၵ်ႈၼမ်ႉမၼ်း 1 ပီႇပႃႇၼႆႉၶၢႆ 4-5 ဝၼ်း ၵေႃႈမူတ်းယဝ်ႉ။ တေႃႈလဵဝ် ၸႂ်ႉၶၢဝ်းယၢမ်း လိူၼ်ၼိုင်ႈ ၶၢႆၵေႃႈ ပႆႇမူတ်း။ ၵူၼ်းမိူင်းတႄႉ တုၵ်ႉၶႁႅင်းဢေႃႈ”- ဝႃႈၼႆ။

မိူဝ်ႈၼႆႉ တီႈဝဵင်းတူၼ်ႈတီး ၶၼ်ၼမ်ႉမၼ်းၸိူဝ်ႉၾႆး  တီႈပမ်ႉၼမ်ႉမၼ်း  BOC – တီႇၸေႇ 1 လိတ်ႊ 2,785 ပျႃး၊ တီႇၸေႇပရီႊမီႊယမ်ႊ 2,860 ပျႃး၊ (92) 2,450 ပျႃး၊ (95) 2,530 ပျႃးလႄႈ (97) 2,360 ပျႃး ။  

ဝဵင်းလႃႈသဵဝ်ႈသမ်ႉ (92) 1 လိတ်ႊ 2,445 ပျႃး၊ (95) 2,525 ပျႃး၊ တီႇၸေႇ 1 လိတ်ႊ 2,740 ပျႃး။ ၼမ်ႉၸၢင် 1 လိတ်ႊ 2,700 ထိုင် 2,900 ပျႃး။ ၵုၼ်လူင် 1 လိတ်ႊ 3,100 ပျႃး။ မိူဝ်းသူႈ (92) 2,750 ပျႃး၊ (95) 3,100 ပျႃး။ ၵႃလီႉ 1 လိတ်ႊ 3,000 ပျႃး။ လၢႆးၶႃႈ မၢင်ႁၢၼ်ႉၶၢႆထိုင် 1 လိတ်ႊ 3,000 ပျႃး၊ မၢင်ႁၢၼ်ႉၶၢႆ 2,700 – 2,900 ပျႃးၸိူဝ်းၼႆႉ။