မိူဝ်ႈၼႆႉ ဝၼ်းတီႈ 12/8/2022 ယၢမ်းၵၢင်ၼႂ် ၼမ်ႉႁူၺ်ႈ/ လွႆ လႆလုပ်ႇထူမ်ႈ ႁိူၼ်းယေး ၵူၼ်းဝၢၼ်ႈ ႁၢဝ်ႈႁႅင်း တႄႇဢဝ် မႄႈၵႅၼ်း၊ မိူင်းႁၢင်၊ ၼႃးၵွင်းမူး၊ ဝၢၼ်ႈလူင်၊ ၼႃးၶႃး၊ ပုင်ႇပႃႇၶႅမ်၊ ႁူၺ်ႈဢေႃႈ၊ မိူင်းႁၢင်၊ မိူင်းၵျွတ်ႈ ဢိၵ်ႇထႅင်ႈလၢႆပိုၼ်ႉတီႈ ၼႂ်း ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ယွၼ်ႉၾူၼ်တူၵ်းထပ်းၵၼ် ႁၢဝ်ႈႁႅင်းလၢႆဝၼ်း ၼႆ ယဝ်ႉ။

ၵူၼ်းမိူင်းတူၼ် လၢတ်ႈတီႈၽူႈတွႆႇႁွၵ်ႈဝႃႈ – “ၾူၼ်တူၵ်းႁႅင်းတင်းဝၼ်းတင်းၶိုၼ်းသေ ၼမ်ႉႁူၺ်ႈလွႆ လႆလုပ်ႇထူမ်ႈၶႃႈ ဢေႃႈ။ ၼမ်ႉဢၼ်လုပ်ႇထူမ်ႈ မိူဝ်ႈၼႆႉ ပဵၼ်ဢၼ်လၢၵ်ႇလၢႆးဝႆႉ ဢွင်ႈတီႈထူမ်ႈၸိူဝ်းၼၼ်ႉ ပဵၼ်ပိုၼ်ႉတီႈသုင် ၼမ်ႉဢမ်ႇတွၼ်ႉ ယၢမ်ႈထူမ်ႈႁႅင်းၸိူင်ႉၼႆ မႃးသေပွၵ်ႈ မီးၶၢဝ်းတၢင်း 20-30 ပီယဝ်ႉ”- ဝႃႈၼႆ။

သိုပ်ႇလၢတ်ႈဝႃႈ – “မိူဝ်ႈၶူးဝႃးပေႃႈ မႃးတၢင်ႇထီးတီႈမိူင်းတူၼ်ၼႆႉၵေႃႈ ၸဝ်ႈႁဝ်းယင်းတၵ်ႉပၼ်ၾၢင်ႉဝႆႉ ယူႇၼႆၶႃႈဢေႃႈ တီႈမိူင်းတူၼ်ၼႆႉ ၾူၼ်တေယႂ်ႇ၊ ၼမ်ႉတေယႂ်ႇ ၼႆၶႃႈ။ တီႈမိူင်းႁၢင်၊ မႄႈၵႅၼ်းၼၼ်ႉ ယွၼ်ႉမႄႈၼမ်ႉႁၢင်လူၼ်ႉၾင်ႇသေ လုပ်ႇထူမ်ႈၶႃႈဢေႃႈ” – ဝႃႈၼႆ။

မိူဝ်ႈၼႆႉ ၵၢင်ၼႂ်ၵူၺ်း ၼင်ႇၵဝ်ႇ တီႈႁူဝ်ၶူဝ် ဢၼ်ၵၢႆႇၸူးၵၼ် ၼႂ်းၵႄႈၼႃးၵွင်းမူး – မိူင်းတူၼ် တီႈလွႆဢႃႇလူး (အာလူး တောင်) ၼၼ်ႉၵေႃႈ လိၼ်ယၢတ်ႇလူင်း သဵၼ်ႈတၢင်းၶၢတ်ႇဝႆႉ ၵူၼ်းမိူင်းတူၼ်လၢတ်ႈ။

ၼႂ်းဝူင်ႈၼႆႉၾူၼ်တူၵ်းထပ်းၵၼ်ဢမ်ႇထၢတ်ႇ​လႄႈ လၢႆလၢႆဝဵင်းဢမ်ယူႇၵိုၵ်းၸပ်း​မႄႈၼမ်ႉၼၼ်ႉ ၼမ်ႉထူမ်ႈ ၼမ်ႉယိုင်ႈႁႅင်း။ တီႈမိူင်းၼၢႆး​​​ၵေႃႈၼမ်ႉထူမ်ႈတူင်ႈၼႃးလႆႈဝူင်ႈပၢႆယဝ်ႉပႆႇလူတ်းယွမ်း​တေႃႇထိုင်ဝၼ်းမိူဝ်ႈၼႆႉ။

မိူၼ်ၼင်ႇတီႈ လၢင်းၶိူဝ်း ၼမ်ႉတဵင်းယိုင်ႈသုင်ဝႆးႁႅင်း။ ​ပေႃးၾူၼ်သိုပ်ႇတူၵ်းထႅင်ႈဢမ်ႇထၢတ်ႇထႅင်ႈဝၼ်းသွင်ဝၼ်း​တႄႉ ၼမ်ႉၸၢင်ႈၶဝ်ႈထိုင်ၼႂ်းဝဵင်း ၵူၼ်းလၢင်းၶိူဝ်းလၢတ်ႈၼင်ႇၼႆ။

ၼွၵ်ႈလိူဝ်ၼၼ်ႉ မိူဝ်ႈၼႆႉ ၵၢင်ၼႂ် မႄႈၼမ်ႉသၢႆၼွင်းႁႅင်း လႆလူၼ်ႉၾင်ႇ လုပ်ႇထူမ်ႈ ၸွမ်းၼႂ်းၵၢတ်ႇတႃႇလေႃႉ တင်းၼမ် ယဝ်ႉ ၵေႃႈ ၸွမ်းပိုၼ်ႉတီႈ ၼႂ်းပွၵ်ႉ/ ယွမ်ႇ ၵၢင်ဝဵင်း တႃႈၶီႈလဵၵ်းထႅင်ႈ လၢႆလၢႆတီႈ ။