မိူဝ်ႈၽုၵ်ႈ ဝၼ်းတီႈ 11/8/2022 ယၢမ်းၵၢင်ၼႂ် 8 မူင်း ယူႇတီႈ သင်ၶၸဝ်ႈ တေဢွၼ်ႁူဝ်ၼမ်းၼႃႈ တၵ်ႉၵႃႇသတ်ႉထႃးသေ သုတ်ႇမုၼ်းဝၢၼ်းပရိတ်ႈ/ သိုပ်ႇၸႆးတႃ ယိူင်းၸူးထိုင် ၸဝ်ႈသိလ်ထမ်းၶူးဝႃးဝုၼ်းၸုမ်ႉ ႁႂ်ႈပၢႆးယူႇလီတဵမ်ထူၼ်ႈ ၵတ်းယဵၼ် ။

ပၢင်သုတ်ႇမုၼ်းၼႆႉတေၸတ်းႁဵတ်း တီႈၵျွင်းၽြႃးဢိၼ်းသၢၼ် ဝတ်ႉၽထၢတ်ႈသီၻွၼ်းႁိူင်း ဢိူင်ႇမိူင်းၽူင်း ၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း။ တိုၵ်းသူၼ်းထိုင်ပႃး တၵ်ႉၵႃႇသတ်ႉထႃးၵူႈဝၢၼ်ႈၵူႈဝဵင်းႁႂ်ႈၽႃႇဝၼႃႇ သူင်ႇမဵတ်ႉတႃႇ သုတ်ႇမုၼ်းယွၼ်းသူးပၼ်ႁႂ်ႈၶူးဝႃးၸဝ်ႈယူႇလီသုင်းဝၢၼ် – ႁႂ်ႈပွင်သၢင်ႈၵႂႃႇတီႈၽႂ် ႁင်းမၼ်း ဝႃႈၼႆ။

ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈၵိင်ႇၽႄငဝ်ႈငုၼ်းမုၵ်ႉ ၸုမ်းလူင်သင်ႇၶႃႇ ၸိုင်ႈတႆး ပွတ်းဢွၵ်ႇ ၶူင်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၽုၵ်ႈ ယၢမ်းၵၢင်ၼႂ် 8 မူင်း တေသုတ်ႇမုၼ်းဝၢၼ်းပရိတ်ႈ/ သိုပ်ႇၸႆးတႃ ယိူင်းၸူးထိုင် ၶူးဝႃးပေႃႈ။ ယဝ်ႉၵေႃႈ တုၵ်းသူၼ်းထိုင် သင်ၶၸဝ်ႈလႄႈ တၵ်ႉၵႃႇသတ်ႉထႃး တီႈၸမ်/ၵႆ ယူႇတီႈဝၢၼ်ႈၽႂ်မိူင်းမၼ်းသေ ဢွၼ် ၵၼ်သုတ်ႇမုၼ်းဝၼ်းပရိတ်ႈ ၽႃႇဝၼႃႇ သူင်ႇမဵတ်ႉတႃႇထိုင် ၶူးဝႃးပေႃႈ ယၢမ်းၸဝ်ႉၵေႃႈလီ၊ ၵၢင်ဝၼ်းၵေႃႈလီ၊ ယၢမ်းႁူဝ်ၶမ်ႈၵေႃႈလီ”- ဝႃႈၼႆ။

ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢတိတ်ႉထၢၼ်ႇ တိုဝ်းၵမ်သိလ် တီႈထမ်ႈမိူင်းၵႅတ်ႇ 3 ပီ 3 လိူၼ် 3 ဝၼ်း တဵမ်မိူဝ်ႈဝၼ်း တီႈ 28/4/2019 ၼၼ်ႉသေ ဝၼ်းတီႈ 1/8/2022 ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢွၵ်ႇထမ်ႈ ႁူပ်ႉတၵ်ႉၵႃႇသတ်ႉထႃး မဵတ်ႉ တႃႇတြႃးမႃး ။ တင်ႈတႄႇဝၼ်းတီႈ 4/8/2022  ဢွၵ်ႇၶၢဝ်းတၢင်း မဵတ်ႉတႃႇတြႃးလႄႈ တၢင်ႇထီးထၢတ်ႈ တၢင်းမိူင်းသၢတ်ႇ၊ မိူင်းတူၼ်၊ မိူင်းပၼ်ႇ၊ လၢင်းၶိူဝ်း၊ မိူင်းၼၢႆး လႄႈ ၵဵင်းတွင်း။

ထိုင်မႃး ဝၼ်းတီႈ 8/8/2022 ယၢမ်းၵၢင်ၼႂ် ၸဝ်ႈသိလ်ထမ်းၶူးဝႃး ဝုၼ်းၸုမ်ႉ လုၵ်ႉတီႈၵဵင်းတွင်း ဢွၵ်ႇၶၢဝ်းတၢင်း မုင်ႈၸူး မိူင်းၽူင်း ဝဵင်းတႃႈၶီႈလဵၵ်းၵမ်ႈသိုဝ်ႈ ႁွတ်ႈထိုင် ၼႂ်းဝၼ်းၼၼ်ႉ ယၢမ်းၵၢင်ၶိုၼ်း 11:50 ပၢႆ။

ၽွင်းလုၵ်ႉဢဝ်လၢင်းၶိူဝ်းမႃးထိုင်မိူင်းၽူင်း ၶူးဝႃးၸဝ်ႈမဵတ်ႉတႃႇတြႃးပၼ်ၵေႃႈ ၼႄမိုဝ်းသေႁေႃးၵႂႃႇၵူၺ်း ။ ၸဝ်ႈၶူးသုၶမ်း မဵတ်ႉ တႃႇပိၼ်ႇၽႃႇသႃႇသေ ၶိုၼ်းႁေႃးပၼ် တၵ်ႉၵႃႇသတ်ႉထႃးၵႂႃႇ။

ၽွင်းထိုင်မိူင်းၽူင်းၼၼ်ႉ ၶူးဝႃးၸဝ်ႈသိလ်ထမ်း ဢမ်ႇယူႇလီႁႅင်း လႆႈပၢင်းမေႃယႃ မႃးယူႇႁိမ်းၸမ်ယူတ်းယႃတူဝ်ပၼ်ဝႆႉ။

တၵ်ႉၵႃႇသတ်ႉထႃးတၢင်းမိူင်းထႆးၵေႃႈ ၽိတ်ႈပၢင်းၸဝ်ႈသိလ်ထမ်း ႁႂ်ႈယေႃးမုၼ် ၵႂႃႇၵူတ်ႇထတ်းပၢႆးယူႇလီ ယူတ်းယႃတူဝ်တၢင်းမိူင်းထႆး ၼႆယူႇ။