ၾူၼ်တူၵ်းထပ်းၵၼ်လၢႆဝၼ်း ၼမ်ႉမႄႈၶၢဝ်၊ ၼမ်ႉမႄႈသၢႆ ၼွင်းလုပ်ႇတွင်ႈလေႃႇလႄႈ ပႃးၵူၼ်းၼႂ်းၸုမ်းပလိၵ်ႈ တႃႈၶီႈလဵၵ်း တႂ်ႈၸုမ်းသိုၵ်းမၢၼ်ႈယိုတ်းမိူင်း ၵေႃႉၼိုင်ႈ လွင်ႈလႆၸူမ်တၢႆ။

ၾူၼ်တူၵ်းထပ်းၵၼ်လၢႆဝၼ်းလႄႈ ဝၼ်းတီႈ 8/8/2022 ယၢမ်းဝၢႆးဝၼ်း မွၵ်ႈ 3 မူင်းၶိုင်ႈၼၼ်ႉ ပလိၵ်ႈ မၢၼ်ႈ ဢႃယု 44 ပီ ၵေႃႉၼိုင်ႈ လွင်ႈလႆၵႂႃႇၸွမ်းၵႃးမၼ်းၸၢႆးသေ လႆႈတၢႆၵႂႃႇ ႁိမ်းၶူဝ်ဢူးထုၼ်းဢွင်ႇ ပွၵ်ႉသိူဝ်ၶမ်း ၼႂ်းဝဵင်းတႃႈၶီႈလဵၵ်း မိူင်းတႆးပွတ်းဢွၵ်ႇၶူင်း။

ၼၢင်းယိင်းသႅၼ်းဢႃႇယု 30 ၶၢႆတၢင်းၶၢႆ ၵၢင်ဝဵင်းတႃႈၶီႈလဵၵ်းၵေႃႉၼိုင်ႈလၢတ်ႈဝႃႈ – “မိူဝ်ႈဝႃး ဝၢႆးဝၼ်း ပလိၵ်ႈမၢၼ်ႈ ပိုၼ်ႉတီႈ ဢႃႇယု 44 ပီ ၵေႃႉၼိုင်ႈ တင်းၵႃးသေ လွင်ႈလႆ ၸူမ်ၼမ်ႉၵႂႃႇ တီႈပွၵ့်သိူဝ်ၶမ်းဢေႃႈ။ ၶိုၼ်းထူပ်းႁၼ် တူဝ်တၢႆ မၼ်းၸၢႆး ယၢမ်းႁူဝ်ၶမ်ႈ” –  ဝႃႈၼႆ။

ထုင်ႉဢၼ်ၼမ်ႉၼွင်းလုပ်ႇၼႆႉ ဝၢၼ်ႈမႂ်ႇ၊ တေႃႇၵေႃႉၼွၵ်ႈ၊ တေႃႇၵေႃႉၼႂ်း၊ ပွၵ်ႉမႄႈၶၢဝ် သဵၼ်ႈတၢင်းလူင်ႁူဝ်ၶူဝ်မၢႆသွင် (ၶူဝ်လႅၼ်လိၼ်တႆး-ထႆး) ဢၼ်ယူႇၶၢင်ႈၼမ်ႉမႄႈၶၢဝ်၊ လိူဝ်ၼၼ်ႉ ပွၵ်ႉပုင်းထုၼ်၊ ၵၢတ်ႇတႃႈလေႃႉ ပွၵ်ႉတႃႈလေႃႉ ၸိူဝ်းၼႆႉၵေႃႈ ၼမ်ႉမႄႈသၢႆၼွင်းထူမ်ႈ။ ၸိူင်ႉၼၼ်ၼင်ႇၵဝ်ႇ ၼမ်ႉႁူၺ်ႈယုင်းၵေႃႈ ထူမ်ႈၵၢတ်ႇႁူၺ်ႈယုင်း၊ ထူမ်ႈပွၵ်ႉမၢၵ်ႇၵႃႇႁူဝ်ၶမ်း။

ၾူၼ်တူၵ်းထပ်းၵၼ်ၵမ်းၼႆႉ တၢင်းၾင်ႇထႆး သၢပ်ႇၼမ်ႉမႄႈသၢႆ ဝဵင်းမႄႈသၢႆၵေႃႈ ၼမ်ႉထူမ်ႈလၢႆတီႈ။

 “ၶႂ်ႈဝႃႈ ထူမ်ႈတင်းၼမ်ယဝ်ႉ ၼႂ်းဝဵင်းတႃႈၶီႈလဵၵ်းၼႆႉ မၢင်တီႈ ထူမ်ႈထိုင်ဢႅဝ်၊ ၼႃႈဢူၵ်း ၸိူဝ်းၼႆႉ။ တၢင်းပွၵ်ႉမႄႈၶၢဝ်ၼႆႉ ထူမ်ႈႁႅင်းၶႃႈဢေႃႈ။ ၾူၼ်မႃးတင်းဝၼ်း မိူဝ်ႈၵၢင်ဝၼ်းၼၼ်ႉ ၼမ်ႉၶိုၼ်ႈႁႅင်း။ ထိုင်ယၢမ်းႁူဝ်ၶမ်ႈ ၼမ်ႉၸင်ႇယွမ်းၽွင်ႈ” –  ၵူၼ်းတႃႈၶီႈလဵၵ်း လၢတ်ႈ။

တႄႇႁူဝ်လိူၼ်ဢေႃးၵတ်ႉၼႆႉမႃး ၾူၼ်တူၵ်းထပ်းၵၼ်လၢႆတီႈလၢႆဝဵင်းလႄႈ တၢင်းမိူင်းတႆးပွတ်းၸၢၼ်း ထုင်ႉသၢပ်ႇၼမ်ႉတဵင်း၊ ၼမ်ႉပွၼ်၊ ၼမ်ႉမႄႈၸေႃႇၵျီႇ တၢင်းဝဵင်းလွၵ်းၸွၵ်ႇ ၸိူဝ်းၼႆႉၵေႃႈ ၼမ်ႉထူမ်ႈ လၢႆတီႈ။ ၸိူင်ႉၼၼ်ၼင်ႇၵဝ်ႇ တၢင်းဝဵင်းသီႇပေႃႉ၊ ၵျွၵ်ႉမႄး ၸိူဝ်းၼႆႉၵေႃႈ ယွၼ်ႉၾူၼ်ႁႅင်းသေ ထူပ်းၽေး ၼမ်ႉထူမ်ႈလၢႆပိုၼ်ႉတီႈ။