တၵ်ႉၵႃႇသတ်ႉထႃး တၢင်းလၢႆးၶႃႈ၊ မိူင်းၵိုင်၊ ၵေးသီး၊ လွႆလႅမ်၊ ၼမ်ႉလၼ်ႈ လႄႈ လွၵ်ႉၸွၵ်ႇ ဢိၵ်ႇထႅင်ႈလၢႆ ၸႄႈဝဵင်း ဢွၼ် ၵၼ်ႁူမ်ၸူမ်း မႃးပႂ်ႉႁပ်ႉတွၼ်ႈ ဝႆႈသႃ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တီႈဝဵင်းပၢင်လူင် သတ်ႉၼႅၼ်ႈ။

မိူဝ်ႈၼႆႉ ဝၼ်းတီႈ 8/8/2022 ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢွၵ်ႇၶၢဝ်းတၢင်း လုၵ်ႉဝဵင်းၵဵင်းတွင်း – ၶိုၼ်ႈၼမ်ႉၸၢင် – မီးၶၢဝ်ႇဝႃႈ တေၶိုၼ်ႈၵႂႃႇတၢင်းလွႆလႅမ် လႄႈ ပၢင်လူင် ၼႆလႄႈတၵ်ႉၵႃႇတီႈၸမ်ၵႆ ဢွၼ်ၵၼ် မႃးပႂ်ႉဝႆႈသႃ တီႈၵွင်းမူးၼၢင်းၵိၼ် ပူလႄႈ ဝတ်ႉမူၺ်ႇတေႃႇ ဝဵင်း ပၢင်လူင် ၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း  ။  

ၵူၼ်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ – “ၶၢဝ်းတၢင်းဝၼ်းသွင်ဝၼ်းမႃးၼႆႉ ပီႈၼွင်ႉလၢႆးၶႃႈ၊ မိူင်းၵိုင်၊ ၵေးသီး၊ မိူင်းၼွင်၊ ၼမ်ႉလၼ်ႈလႄႈ လွၵ်ႉၸွၵ်ႇ ဢွၼ်ၵၼ် မႃးပႂ်ႉဝႆႉသႃ တင်းၼမ်လၢႆ။ ၸွမ်းဝဵင်းပၢင်လူင် ၼႂ်းၵၢတ်ႇ ၸိူဝ်းၼႆႉ ၵူၼ်းပေႃးတဵမ် လူင်ဝႆႉယဝ်ႉ။ တီႈၵွင်းမူးၼၢင်းၵိၼ်ပူႇၼၼ်ႉၵေႃႈ ၵိုၼ်းဝႃႈၵိုၼ်း ယဝ်ႉ။ ပိူၼ်ႈသေႃႇၸဵမ်မိူဝ်ႈၸဝ်ႉဝႃႈ ၸဝ်ႈႁဝ်း တေမႃးႁွတ်ႈထိုင်ပၢင်လူင် မိူဝ်ႈၼႆႉ ၼႆလႄႈ”- ဝႃႈၼႆ။

မိူဝ်ႈၼႆႉယၢမ်းဝၢႆးဝၼ်းမွၵ်ႈ 2 မူင်းၶိုင်ႈ လႆႈငိၼ်းဝႃႈ ၶူးဝႃးဝုၼ်းၸုမ်ႉ ဢမ်ႇၶဝ်ႈဝဵင်းပၢင်လူင်သေ လုၵ်ႉၼမ်ႉၸၢင် ၶိုၼ်ႈမိူဝ်းတၢင်းၶူဝ်လမ်။ ၵူၺ်းၵႃႈ ဢမ်ႇၵိုတ်းတီႈၶူဝ်လမ် သိုပ်ႇပူၼ်ႉၶိုၼ်ႈၵႂႃႇတၢင်းဝဵင်းၵုၼ်ႁဵင်ပုၼ်ႉယဝ်ႉဝႃႈၼႆ။

ဝၼ်းတီႈ 4/8/2022 ၼၼ်ႉမႃး ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢွၵ်ႇ ၶၢဝ်းတၢင်း ယေႃးမုၼ် မဵတ်ႉတႃႇတြႃးပၼ်တၵ်ႉၵႃႇလႄႈ တၢင်ႇထီးထၢတ်ႈ/ ၵွင်းမူး တၢင်းမိူင်းသၢတ်ႇ၊ မိူင်းတူၼ်၊ မိူင်းပၼ်ႇ၊ လၢင်းၶိူဝ်း၊ မိူင်းၼၢႆး။ ဝၼ်းတီႈ 7/8/2022 ယၢမ်းၵၢင်ၶမ်ႈ မွၵ်ႈ 8 မူင်း ႁွတ်ႈထိုင် ဝဵင်းၵဵင်းတွင်းသေ ၵိင်းတီႈတၢတ်ႇလူင်ၵဵင်းတွင်းၶိုၼ်းၼိုင်ႈ။

တၵ်ႉၵႃႇ ၵဵင်းတွင်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၸဝ်ႈၶူးဝႃးပေႃႈ သိုပ်ႇၶၢဝ်းတၢင်းၵႂႃႇတၢင်း ၼမ်ႉၸၢင်၊ ဝႃႈတေၵႂႃႇ လွႆလႅမ်လႄႈ ပၢင်လူင်။ မၢင်ပွၵ်ႈၶၢဝ်းတၢင်း ၸဝ်ႈႁဝ်းၶႃႈၼႆႉ ပႆႇတႅတ်ႈတေႃး  ။ တေႃႈၼင်ႇလုၵ်ႈၼွင်ႉပွင်ႈပၢႆ ၸဝ်ႈႁဝ်း ယင်းဢမ်ႇႁူႉၶၢဝ်းတၢင်း ၸဝ်ႈႁဝ်း တႅတ်ႈတေႃးၶႃႈ။ ဢၼ်လႆႈႁူႉထႅင်ႈတႄႉ ၸဝ်ႈႁဝ်း တေမိူဝ်း ၶဝ်ႈ ဝႃႇသႃ တီႈမိူင်းၽူင်း ဝဵင်းတႃႈၶီႈလဵၵ်း ၼႂ်းဝၼ်းလိူၼ် 9 မူၼ်းၼႆႉၼႆဢေႃႈ”- ဝႃႈၼႆ။

ယၢမ်းလဵဝ် တီႈထၢတ်ႈသီၻွၼ်ႊႁိူင်း ဢိူင်ႇမိူင်းၽူင်း ၸႄႈဝဵင်းတႃႈၶီႈလဵၵ်း ၼၼ်ႉၵေႃႈ တၵ်ႉၵႃႇသတ်ႉထႃး ဢွၼ်ၵၼ် ၵႂႃႇပႂ်ႉ ႁူမ်ၸူမ်းႁပ်ႉတွၼ်ႈ ဝႆႈသႃ သတ်ႉၼႅၼ်ႈလူင်ဝႆႉယဝ်ႉ။

ၸဝ်ႈသိလ်ထမ်း ၶူးဝႃးဝုၼ်းၸုမ်ႉၼႆႉ ဢတိတ်ႉထၢၼ်ႇ ၶဝ်ႈတိုဝ်းၵမ်သိလ် တီႈထမ်ႈလူင် မိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်း မိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း တႃႇၶၢဝ်းတၢင်း 3 ပီ 3 လိူၼ် 3 ဝၼ်း မိူဝ်ႈဝၼ်းတီႈ 28/4/2019 ၼၼ်ႉသေ ဝၼ်းတီႈ 1/8/2022 ၶွပ်ႈတဵမ် ၸွမ်းၼင်ႇ ဢတိတ်ႉထၢၼ်ႇၸဝ်ႈမီးဝႆႉၼၼ်ႉ ၼႆယဝ်ႉ။