မၢၵ်ႇတႅၵ်ႇၵၢင်ဝဵင်းမူႇၸေႊ တိူဝ်ႉသႂ်ႇ ဢွၼ်ႇယိင်း ဢႃယု 20 ပၢႆ လူႉတၢႆ ၵေႃႉၼိုင်ႈ

မိူဝ်ႈၼႆႉ ဝၼ်းတီႈ 1/8/2022 ယၢမ်းၵၢင်ဝၼ်း 11 မူင်းပၢႆ မၢၵ်ႇတႅၵ်ႇ တီႈသီႇယႅၵ်ႈၾႆးလႅင် ၵၢင်ဝဵင်းမူႇၸေႊ ၸိုင်ႈတႆး ပွတ်း ႁွင်ႇၼၼ်ႉ တိူဝ်ႉၺႃးပႃးဢွၼ်ႇယိင်းဢႃယု 20 ပၢႆ ၵူၼ်းမိူင်းမူႇၸေႊၵေႃႉၼိုင်ႈ လူႉတၢႆ။

ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၼၢင်းမႃးသိုဝ်ႉၶူဝ်း တီႈၵၢတ်ႇ  ၺႃးၸၢၵ်ႇမၢၵ်ႇၸွမ်း ၶႃႈဢေႃႈ။ ပဵၼ် လုၵ်ႈဢွၼ်ႇယိင်း ဢႃယု 20 ပၢႆ  တၢႆၶႃႈဢေႃႈ။ ၸိုဝ်ႈဝႃႈႁိုဝ် ပဵၼ်လုၵ်ႈၽႂ် ယူႇပွၵ်ႉလႂ်ႈတႄႉ ပႆႇႁူႉ။ တူၺ်းမၼ်းၼၢင်းသႂ်ႇ  ၶူဝ်းၼုင်ႈတႄႉ ပဵၼ်ၶူဝ်း ႁဵတ်းၵၢၼ်ၼႂ်းပၢင်တေႃႇလွင်း ၶႃႈဢေႃႈ”- ဝႃႈၼႆ။

လိူဝ်ၼၼ်ႉၸၢၵ်ႇမၢၵ်ႇတိူဝ်ႉၺႃးပႃး   ပဵၼ်ပျီႇတူႉၸိတ်ႉၵေႃႉၼိုင်ႈလႄႈ မေႃႇတေႃႇပီႇၵေႇ ၵေႃႉၼိုင်ႈ။ ယၢမ်းလဵဝ် ၵူၼ်းမၢတ်ႇၸဵပ်းလႄႈ လူႉတၢႆ  မီးဝႆႉတီႈႁူင်းယႃမူႇၸေႊ ဝႃႈၼႆ။  

ဢိင်ၼိူဝ် လွင်ႈမၢၵ်ႇတႅၵ်ႇၼႆႉ ပဵၼ်ၼမ်ႉမိုဝ်းၽႂ် ၸုမ်းလႂ် မႃးႁၢင်ႈၵၢင်ဝႆႉတႄႉ ပႆႇႁူႉ။ ဢွင်ႈတီႈ ပိူင်ပဵၼ်မၢၵ်ႇတႅၵ်ႇၼၼ်ႉ တေ ပဵၼ်တီႈၵၢတ်ႇမၢႆ 1 တီႈၸဵင်ႇၸၢၼ်းၵၢတ်ႇ သီႇယႅၵ်ႇၾႆးလႅင် ၵၢင်ဝဵင်းမူႇၸေႊၼၼ်ႉၵမ်းလဵဝ် ၼႆယဝ်ႉ။