ဝတ်ႉပႃႇပဝ်ႈ ၵဵင်းမႆႇ တေၸတ်း ပၢင်သုတ်ႇမုၼ်း ၽႄမဵတ်ႉတႃႇ ႁပ်ႉၶူးဝႃးဝုၼ်းၸုမ်ႉ ဢွၵ်ႇထမ်ႈ

ပေႃးထိုင်မႃး ဝၼ်းတီႈ 31/7/2022 ယၢမ်းၵၢင်ၼႂ် 9 မူင်းၶိုင်ႈ ထိုင် 3 မူင်းဝၢႆးဝၼ်း ယူႇတီႈ သင်ၶၸဝ်ႈဢွၼ်ႁူဝ် တၵ်ႉၵႃႇ သတ်ႉထႃး ပီႈၼွင်ႉႁႅင်းၵၢၼ်တႆးသေ တေၸတ်းႁဵတ်း ပၢင်သုတ်ႇမုၼ်း ၽႄမဵတ်ႉတႃႇ ႁပ်ႉၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢွၵ်ႇထမ်ႈ တီႈမိူင်းၵႅတ်ႇ ၶွပ်ႈတဵမ် 3 ပီ 3 လိူၼ် 3 ဝၼ်း ပၢင်သုတ်ႇမုၼ်းၼႆႉ တေၸတ်းတီႈ ဝတ်ႉပႃႇပဝ်ႈ ဢိူင်ႇသီၽုမ်း ၸႄႈဝဵင်းၵဵင်းမႆႇ ၸိုင်ႈထႆး။

ၸဝ်ႈၶူး မႁႃႇသႅင်ၾႃႉ ၽူႈဢွၼ်ႁူဝ်တူင်ႉၼိုင် တီႈဝတ်ႉပႃႇပဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈတူင်ႉၼိုင် ဢၼ်တေ ၸတ်းႁဵတ်း ၼႂ်းဝၼ်းတီႈ 31 ၼႆႉ တေမီးလွင်ႈတူင်ႉၼိုင် ႁပ်ႉသိလ်၊ သုတ်ႇမုၼ်း လမ်ႇသဵင်ၶူးဝႃးၸဝ်ႈ၊ ၼင်ႈသမႃႇထိၽႃႇ ဝၼႃႇ၊ ၵၢပ်ႈသွမ်း သင်ႇၶႃႇၸဝ်ႈလႄႈ လဵင်ႉလူၽူႈမႃးႁူမ်ႈ၊ လဵပ်ႈႁဵၼ်းလွၼ်ႉၵႅၼ်ထမ်ႇမၶူးဝႃး ၸဝ်ႈသင်ႇသွၼ်၊ ၽႄမဵတ်ႉ တႃႇယွၼ်းသူး ထိုင် သိလ်ထမ်းၸဝ်ႈလႄႈ ဢတိၵ်ႉထၢၼ်ႇ ႁပ်ႉၶၢမ်ႇဢဝ်ထၢတ်ႈသိၼ်ထၢတ်ႈထမ်းၶူးဝႃးပေႃႈ ၸိူဝ်းၼႆႉ”- ဝႃႈ ၼႆ။

လိူဝ်ၼၼ်ႉ ယၢမ်းၵၢင်ၶမ်ႈ 7:30 မူင်း – 8:00 မူင်းသမ်ႉ တေမီးပၢင်တႆႈတဵၼ်းယွၼ်း သူးႁူမ်ႈၵၼ်ထႅင်ႈ ၼႆယဝ်ႉ။

ထိုင်မႃး ဝၼ်းတီႈ 1/8/2022 ယၢမ်းဝၢႆးဝၼ်း 3 မူင်းပၢႆ ၸဝ်ႈသိလ်ထမ်းၶူးဝႃးဝုၼ်းၸုမ်ႉ တေၵႂႃႇတီႈထမ်ႈလူင်သေ လူႇ တၢၼ်းသင်ႇၶႃႇၸေႉ။   တေယၢတ်ႇၼမ်ႉလႄႈ တင်ႈထမ်းသုၸဝၼ်းၼ ဝူဝ်းလူင် တီႈၵုၼ်ၼမ်ႉႁူး ၸမ်ၶူဝ်ၼမ်ႉသိမ်။ လိူဝ် ၼၼ်ႉ တေၵိင်းလိုဝ်ႈတီႈၵုတိ သႃလႃးဢွၼ်ႇ ၾၢႆႇၼိူဝ်ၼမ်ႉသိမ် 2 ၶိုၼ်း၊ တေၵႂႃႇၵိင်းတီႈမိူင်းသၢတ်ႇ 1 ၶိုၼ်းယဝ်ႉ ၸင်ႇတေ ၵႂႃႇ မိူင်းၽူင်း၊ ဝဵင်းတႃႈၶီႈလဵၵ်း။    

ၸဝ်ႈသိလ်ထမ်းၶူးဝႃး ဝုၼ်းၸုမ်ႉ ၶဝ်ႈတိုဝ်းၵမ်သိလ် တီႈထမ်ႈလူင် မိူင်းၵႅတ်ႇ ဢတိတ်ႉထၢၼ်ႇဝႆႉ တႃႇၶၢဝ်းတၢင်း 3 ပီ 3 လိူၼ် 3 ဝၼ်း ၸဝ်ႈတႄႇၶဝ်ႈထမ်ႈ မိူဝ်ႈဝၼ်းတီႈ 28/4/2019 ၼၼ်ႉမႃး ၼႆယဝ်ႉ။