Friday, March 29, 2024

SHRF ၸီႉၸမ်ႈ ႁႂ်ႈသိုၵ်းမၢၼ်ႈႁပ်ႉပုၼ်ႈၽွၼ်း လွင်ႈၶဝ်ပူၼ်ႉပႅၼ်သုၼ်ႇလႆႈၵူၼ်းမိူင်း ၾၢႆၶုၼ်

Must read

ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး ဢွၵ်ႇၽိုၼ်တၢမ်းငဝ်းလၢႆး တုၵ်းယွၼ်း လူင်ပွင်ၸိုင်ႈ တႂ်ႈသိုၵ်းမၢၼ်ႈ ၵုမ်းၵမ် ႁႂ်ႈႁပ်ႉဢဝ် ပုၼ်ႈၽွၼ်းတင်းမူတ်း လွင်ႈၵူၼ်းမိူင်ၾၢႆၶုၼ် လႆႈပၢႆႈ လႆႈလူႉသုမ်းႁိူၼ်းယေး ယွၼ်ႉသိုၵ်းမၢၼ်ႈ ပူၼ်ႉပႅၼ် သုၼ်ႇလႆႈ ၵူၼ်း ၼႆယဝ်ႉ။

Map by SHRF – ၽႅၼ်ႈတီႈဝဵင်းၾၢႆၶုၼ်

မိူဝ်ႈၼႆႉ ဝၼ်းတီႈ 27/7/2022 ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆးၽိုၼ်ၼိုင်ႈ။ ၼႂ်းၼၼ်ႉၸီႉၸမ်ႈဝႆႉဝႃႈ တင်ႈတႄႇ ၵၢင်လိူၼ်မေႊ 2022  မႃး သိုၵ်းမၢၼ်ႈ ၸႂ်ႉဢဵၼ်ႁႅင်းသိုၵ်း ၽဵဝ်ႈမူၺ်ႉၸုမ်းမႅၵ်ႇၵွင်ႈလုၵ်ႉၽိုၼ်ႉ ၸိူဝ်းတူင်ႉၼိုင်ၾၢႆႇဢွၵ်ႇ ၼွင် လူင်မိူင်းပၢႆး ၼႂ်းၸႄႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း။ သိုၵ်းမၢၼ်ႈ ၽဝ်ပႅတ်ႈႁိူၼ်းၵူၼ်းဝၢၼ်ႈ 100 ပၢႆ၊ ႁဵတ်းႁႂ်ႈၵူၼ်း ဝၢၼ်ႈ 4000 ပၢႆ လႆႈႁၢမ်းႁိူၼ်းယေး တီႈယူႇ  ၽွင်းၶဝ်ပိုတ်ႇၼႃႈသိုၵ်း တေႃႇၸုမ်းၵႅတ်ႇၶႄၵူၼ်းမိူင်း PDF ၼႆယဝ်ႉ။

- Subscription -

ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉသိုၵ်းမၢၼ်ႈ ပူၼ်ႉပႅၼ် ၵူၼ်းမိူင်း ႁဝ်းၶႃႈ တၢင်းမူႇဝၢၼ်ႈပီႈၼွင်ႉတႆး တၢင်းဝဵင်းၾၢႆၶုၼ်ၼႆႉ သိုၵ်းမၢၼ်ႈ ၽဝ်ႁိူၼ်းယေးၵူၼ်းဝၢၼ်ႈ လူႉသုမ်းၼမ်။ ႁဵတ်းႁႂ်ႈၵူၼ်းဝၢၼ်ႈ ၼပ်ႉႁူဝ်ႁဵင် လႆႈပၢႆႈယၢၼ်ႁိူၼ်းယေး  တေႃႇထိုင်ယၢမ်းလဵဝ်။ ဢၼ်ၼႆႉ မၼ်းပဵၼ်ၵၢၼ်ပူၼ်ႉပႅၼ်သုၼ်ႇလႆႈၵူၼ်းမိူင်း ႁဝ်းၶႃႈ ႁၢဝ်ႈ ႁႅင်း”- ဝႃႈၼႆ။

Photo CJ-သိုၵ်းမၢၼ်ႈႁၢင်ႈၵၢင်မၢၵ်ႇဝႆႉၸွမ်းတႃႈၸွမ်းတၢင်း တၢင်းဝဵင်းၾၢႆၶုၼ်

ယၢမ်းလဵဝ် ၵူၼ်းပၢႆႈၽေးသိုၵ်း လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ထူပ်းတၢင်းယၢပ်ႇၽိုတ်ႇ ၵူႈၾၢႆႇၵူႈတၢင်းလႄႈ ငဝ်းလၢႆး ၼႂ်းပိုၼ်ႉတီႈၵေႃႈ ယၢပ်ႇၽိုတ်ႇႁႅင်း ဢမ်ႇၸၢင်ႈပွၵ်ႈမိူဝ်းႁဵတ်း သူၼ်ႁႆႈၼႃး။ ၵွပ်ႈၼႆလႄႈ တုၵ်းယွၼ်းထိုင် ႁႂ်ႈလူင်ပွင်ၸိုင်ႈ တႂ်ႈသိုၵ်းမၢၼ်ႈ ႁပ်ႉပုၼ်ႈၽွၼ်းၵႄႈၶႆပၼ် တင်းသဵင်ႈတင်းမူတ်း ၼႆယဝ်ႉ။

“ယွၼ်ႉၶဝ်ထိုဝ်တူဝ်ၶဝ်ဝႃႈ ပဵၼ်လူင်ပွင်ၸိုင်ႈၼႆလႄႈ ပေႃးဝႃႈ ၶဝ်ပဵၼ်လူင်ပွင်ၸိုင်ႈၼႆ ပွင်ႇဝႃႈ ၶဝ်တေလႆႈႁပ်ႉပုၼ်ႈၽွၼ်း ႁႄႉၵင်ႈပၼ် ၵူၼ်းမိူင်း ၼင်ႇႁိုဝ် ၵူၼ်းမိူင်း တေဢမ်ႇလႆႈထူပ်းၽေးၶဵၼ် ။ ယၢမ်းလဵဝ် ၵူၼ်းမိူင်းထူပ်းၽေးၶဵၼ် ယူႇၸိူင်ႉၼႆ ၼႆႉ ၶဝ်တေလႆႈႁပ်ႉပုၼ်ႈၽွၼ်းမူတ်းမူတ်း ။ ယွၼ်ႉၶဝ်မၵ်းမၼ်ႈတူဝ်ၶဝ်ပဵၼ်လူင်ပွင်ၸိုင်ႈလူး” – ၸၢႆးႁေႃသႅင် သိုပ်ႇလၢတ်ႈၼႄ ၼင်ႇၼႆ။

သိုၵ်းမၢၼ်ႈၽဝ်ႁိူၼ်းယေးၵူၼ်းဝၢၼ်ႈၼႂ်းၸႄႈဝဵင်းၾၢႆၶုၼ်

ယၢမ်းလဵဝ် သိုၵ်းမၢၼ်ႈတိုၵ်ႉယူႇၸွမ်းၼႂ်းဝၢၼ်ႈ၊ ႁိူၼ်းၵူၼ်းဝၢၼ်ႈ ၼႂ်းဢိူင်ႇလွႆပဝ်းသေ ၵူၼ်းဝၢၼ်ႈပႆႇႁတ်းပွၵ်ႈၶိုၼ်းႁိူၼ်း ၽႂ်မၼ်း။ သိုၵ်းမၢၼ်ႈ ယူႇၸွမ်းၼႂ်းဝၢၼ်ႈ ၼႂ်းႁိူၼ်း ၵူၼ်းဝၢၼ်ႈသေ သွၵ်ႈတဝ် ဢဝ်လၢႆၶူဝ်းၶွင်ၵူၼ်းဝၢၼ်ႈပႃး။

လိူဝ်ၼၼ်ႉ ၶဝ်ယင်း ႁၢင်ႈမၢၵ်ႇဝႆႉၸွမ်းဝၢၼ်ႈ၊   ပေႃးႁၼ် ၵူၼ်းၵႂႃႇမႃး   ၵႆႉလၢမ်းလိမ်းယိုဝ်းလူင်ၵႂႃႇ ၵူႈႁူးၵူႈတၢင်းလႄႈ ဢမ်ႇပေႃးသူႈမီး ၵူၼ်းႁတ်း ၸႂ်ႉသဵၼ်ႈတၢင်း ၼၼ်ႉယဝ်ႉ။

ၵူၼ်းမိူင်းဢၼ်ယူႇၼႂ်းထုင်ႉဢိူင်ႇလွႆပဝ်းၼႆႉ ၵမ်ႈၼမ်ပဵၼ်ပီႈၼွင်ႉတႆး။ ႁဵတ်းႁႆႈ၊ ၼႃး၊ ၽုၵ်ႇၶဝ်ႈၵၢပ်ႇတင်း မၢၵ်ႇထေႃးပၢတ်ႈ လဵင်ႉၼႃႈႁိူၼ်းၽႂ်မၼ်း။ ၵူၺ်းၵႃႈ ပီၼႆႉ ယွၼ်ႉလႆႈပၢႆႈၽေးသိုၵ်းသိူဝ်သေ ဢမ်ႇၸၢင်ႈႁဵတ်းႁိုဝ် ၽုၵ်ႇသွမ်ႈလႄႈ ထူပ်းတၢင်း ယၢပ်ႇၽိုတ်ႇၵပ်ႉၵိၼ်း ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး ဢွၵ်ႇဝႆႉၼင်ႇၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း