ပၢင်တိုၵ်းသိုၵ်းသိူဝ်ၼႂ်းမိူင်းတႆး ဢမ်ႇၵိုတ်းဢမ်ႇထၢတ်ႇ ၼႂ်းလိူၼ်ၵျူႊလၢႆႊၼႆႉၵူၺ်းလုၵ်ႈဢွၼ်ႇလဵၵ်ႉတၢႆယွၼ်ႉပၢင်တိုၵ်း 2 ၵေႃႉယဝ်ႉ။
မိူဝ်ႈဝၼ်းတီႈ 18/7/2022 ယၢမ်းၵၢင်ၶမ်ႈ 7 မူင်းပၢႆ ဢွၼ်ႇၸၢႆး ဢႃယု 3 ၶူပ်ႇပၢႆ ၵေႃႉၼိုင်ႈ ထုၵ်ႇသိုၵ်းမၢၼ်ႈ ယိုဝ်းတၢႆ ၸွမ်း ပေႃႈမႄႈ ၼႂ်းၵႄႈဝၢၼ်ႈႁူၺ်ႈလွတ်ႇ – တွင်ႁဵဝ်း ၾၢႆႇႁွင်ႇဝဵင်းမိူင်းသူႈ ၸိုင်ႈတႆး ပွတ်းၸၢၼ်း။ ဝၼ်းတီႈ 25/7/2022 ယၢမ်း ၵၢင်ၼႂ် မွၵ်ႈ 7 မူင်းၼၼ်ႉ ဢွၼ်ႇၸၢႆး ဢႃယုမွၵ်ႈ 4 ၶူပ်ႇ လူႉတၢႆ ယွၼ်ႉသိုၵ်းမၢၼ်ႈတင်း သိုၵ်းၶၢင် KIA ယိုဝ်းၵၼ် ႁၢဝ်ႈႁႅင်း ထုၵ်ႇသိုၵ်းမၢၼ်ႈ ဢဝ်ယိုဝ်းၵွင်းလူင်သႂ်ႇ ၸၢၵ်ႇမၢၵ်ႇသဵၼ်တိူဝ်ႉသႂ်ႇ တီႈၵွၵ်းႁူဝ် တီႈမၢၼ်ႈၼွင် ၼႂ်းၸႄႈဝဵင်းၵူတ်ႉၶၢႆ။
ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး လၢတ်ႈတီႈၽူႈတွႆႇႁွၵ်ႈ ဝႃႈ – “ပေႃးဢဝ်ပိူင်သိုၵ်းဝႃႈၸိုင် ၶဝ် ပူၼ်ႉပႅၼ်ပိူင်သိုၵ်းၶဝ် ၶဝ်မႃးတိုၵ်းၵၼ်ႁႅမ်ၵၼ် ၼႂ်းၵႄႈၵူၼ်းမိူင်းယူႇၸိူင်ႉၼႆၼႆႉ မၼ်းၼႄဝႃႈ ၶဝ်တိုၵ်းၵၼ်ၼႆႉ ဢမ်ႇၸႂ်ႈ ပၢင်တိုၵ်းတၢင်းႁတ်းႁၢၼ် ၸႅတ်ႈၸၢင်ႇ ဢၼ်လမ်ႇလွင်ႈ ႁဵတ်းႁႂ်ႈၵူၼ်းမိူင်းလုၵ်ႈဢွၼ်ႇ လႆႈမၢတ်ႇၸဵပ်းလူႉတၢႆ ၸိူင်ႉၼႆၼႆႉ”- ဝႃႈၼႆ။
လုၵ်ႈဢွၼ်ႇ ၼႂ်းမိူင်းတႆး 2 ၵေႃႉ ဢၼ်လႆႈလူႉတၢႆယွၼ်းၼႂ်းၵႄႈပၢင်တိုၵ်း တီႈမိူင်းသူႈလႄႈ တင်းၵူတ်ႉၶၢႆၼၼ်ႉ ဢမ်ႇႁၼ် ၸုမ်းသိုၵ်းလႂ် ဢွၵ်ႇမႃးယွမ်းႁပ်ႉ ဢဝ်ပုၼ်ႈၽွၼ်းသင်။ ၵွပ်ႈၼႆလႄႈ တုၵ်းယွၼ်းႁႂ်ႈသိုၵ်း ၸိူဝ်းၼၼ်ႉ ဢွၵ်ႇမႃးယွမ်းႁပ်ႉၸွႆႈ ထႅမ် ၼႂ်းမုင်ႉႁေႃႁိူၼ်း တီႈဢၼ်လႆႈလူႉသုမ်းၵႂႃႇၼၼ်ႉ ယွၼ်ႉမၼ်းပဵၼ်ၵၢၼ်ပူၼ်ႉပႅၼ် တေႃႇၵူၼ်းမိူင်းႁၢဝ်ႈႁႅင်း ၼႆယဝ်ႉ။
“ပေႃးၶဝ်မီးတၢင်းႁတ်းႁၢၼ်တႄႉၼႆ တီႈဢမ်ႇမီးၵူၼ်းမိူင်း တီႈၵႆၵူၼ်းမိူင်း ၵူၼ်းၵေႃႉလႂ် ဢမ်ႇၵဵဝ်ႇၶွင်ႈၸွမ်း ဢမ်ႇလႆႈႁပ်ႉ မၢတ်ႇၸဵပ်းၸွမ်းၼႆ ဢၼ်ၼၼ်ႉ ၸင်ႇဝႃႈပဵၼ်ပၢင်တိုၵ်းၸႅတ်ႈၸၢင်ႇ။ ဢၼ်ၶဝ်ယိုဝ်းၵၼ်ၼႆႉ ဢမ်ႇၸႂ်ႈၸိူင်ႉၼၼ် သမ်ႉမႃး ယိုဝ်းၵၼ် ႁိမ်းၸမ်ဝၢၼ်ႈၵူၼ်းယူႇသဝ်း ၸိူင်ႉၼႆ ႁဵတ်းႁႂ်ႈၵူၼ်းမိူင်း လႆႈမၢတ်ႇၸဵပ်းလူႉတၢႆ ပွင်ႇဝႃႈ ၶဝ်ပဵၼ်ပၢင်တိုၵ်း ဢမ်ႇ မီးၶွပ်ႇမီးပေၵူၺ်း”- ၸၢႆးႁေႃသႅင် သိုပ်ႇလၢတ်ႈၼႄၼင်ႇၼႆ။
ဢွၼ်ႇၸၢႆး 2 ၵေႃႉ ဢၼ်လႆႈလူႉတၢႆၵႂႃႇ ၼႂ်းႁၢင်လိူၼ်ၵျုႊလၢႆႊၼႆႉ တီႈၸႄႈဝဵင်းမိူင်းသူႈ ဢွၼ်ႇၸၢႆး ဢႃယု 3 ၶူပ်ႇပၢႆ ပဵၼ် လုၵ်ႈၸၢႆး ၸၢႆးသီႇႁႃႉလႄႈ ၼၢင်းသႅင်လူႇ ၼၼ်ႉတႄႉ ထုၵ်ႇသိုၵ်းမၢၼ်ႈ ယိုဝ်းတၢႆ တင်းသၢမ်ၵေႃႉပေႃႈမႄႈလုၵ်ႈ။ ယဝ်ႉၵေႃႈ တီႈၸႄႈဝဵင်းၵူတ်ႉၶၢႆ ဢွၼ်ႇၸၢႆး ဢႃယုမွၵ်ႈ 4 ၶူပ်ႇ ပဵၼ်လုၵ်ႈၸၢႆး ဢူးယီႇၼီႇ(ႁွင်ႉ) လွႆၶမ်းလႄႈ တေႃႇဢေးတုၼ်ႇ ၼႆယဝ်ႉ။
