ၵေႃႉပဵၼ်ပေႃႈ မဝ်းလဝ်ႈသေထုပ်ႉ/ ပေႃႉႁႅမ် လုၵ်ႈယိင်းၸဝ်ႈၵဝ်ႇ ဢႃယုမွၵ်ႈ 20 ပီ မၢတ်ႇ ၸဵပ်းႁၢဝ်ႈႁႅင်းထိုင်တၢႆ။
မိူဝ်ႈဝၼ်းတီႈ 17/7/2022 ၼၼ်ႉ ၵေႃႉပဵၼ်ပေႃႈ ဢႃယုမွၵ်ႈ 60 ပီ ၵိၼ်လဝ်ႈမဝ်း ပေႃႉႁႅမ်လုၵ်ႈယိင်းၸဝ်ႈၵဝ်ႇၶိုၼ်း တီႈ ဝၢၼ်ႈလေးဢဵင်ႇၵူင်း(လေးအိမ်ကုန်းကျေးရွာ) ဝဵင်းဢွင်ႇပၢၼ်း ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ။ ၵေႃႉပဵၼ်လုၵ်ႈၸဵပ်းႁႅင်းသေ ထိုင်မႃးဝၼ်းတီႈ 19 ၼႆႉ တၢႆပႅတ်ႈ။
ၵူၼ်းဢွင်ႇပၢၼ်း ၽူႈယိင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ပေႃႈမၼ်းသမ်ႉ မဝ်းလဝ်ႈသေ မႃးပေႃႉႁႅမ်လုၵ်ႈယိင်းမၼ်း။ မိူဝ်ႈဝၼ်းၼၼ်ႉ ႁဝ်းၶႃႈ လႆႈငိၼ်းသဵင်ၶဝ်ပေႃႉႁႅမ်ၵၼ်ယူႇ။ ၵူၺ်းၵႃႈ ဢမ်ႇမီး ၽႂ်ၶဝ်ႈၵႂႃႇတူၺ်း။ လႆႈမႃးမွၵ်ႈ 2 ဝၼ်းၼႆႉ ဢမ်ႇႁၼ်လုၵ်ႈယိင်းမၼ်း ဢွၵ်ႇႁိူၼ်းမႃးလႄႈ ႁဝ်းၶႃႈ ဢွၼ်ၵၼ်ၵႂႃႇတူၺ်း လႆႈ ႁၼ်တူဝ်တၢႆလုၵ်ႈယိင်းမၼ်းတီႈၼႂ်းႁိူၼ်းၼၼ်ႉယဝ်ႉ”- ဝႃႈၼႆ။
လုင်းမဝ်းလဝ်ႈပေႃႉထုပ်ႉပိတ်ႉထိပ်ႇႁႅင်းလႄႈ လုၵ်ႈယိင်းမၢတ်ႇၸဵပ်း ၸွမ်းမိုဝ်း၊ ၸွမ်းတူဝ်၊ ၸွမ်းၵွၵ်းႁူဝ် ၸိူဝ်းၼႆႉ။ ယူႇတီႈၸုမ်းၸွႆႈထႅမ်တူင်ႇဝူင်းၵူၼ်း ဝဵင်းဢွင်ႇပၢၼ်း လႆႈဢဝ်တူဝ်တၢႆၼၢင်းယိင်းဢွၼ်ႇၼၼ်ႉ သူင်ႇႁူင်းယႃ မိူဝ်ႈဝႃး ဝၼ်းတီႈ 19 ၼႆႉ တႃႇ ၵူတ်ႇထတ်း လွင်ႈပိူင်ပဵၼ်ၵၢၼ်တၢႆ မၼ်းၼၢင်း ၼႆယဝ်ႉ။
ဢိင်ၼိူဝ် လွင်ႈၼႆႉ ၵေႃႉပဵၼ်ပေႃႈ ဢႃယုမွၵ်ႈ 60 ပီ ဢၼ်ၶႃႈႁႅမ်လုၵ်ႈယိင်း ၸဝ်ႈၵဝ်ႇတၢႆၼၼ်ႉ ယူႇတီႈ ၽူႈမီးပုၼ်းၽွၼ်း ပလိၵ်ႈၶဝ် လႆႈၵုမ်းတူဝ်ၵႂႃႇ ပိုတ်ႇလိူင်ႈၸွႆးတြႃးမၼ်းၸၢႆးၵႂႃႇ ၸွမ်းၼင်ႇပၵ်းပိူင်မၢႆမီႈ မီးၼၼ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ