ၶွင်ႇသီႇသိုၵ်းမၢၼ်ႈ ယိုတ်းမိူင်း ဢၼ်ၵႂႃႇတူင်ႉၼိုင်တၢင်းလွႆၼၢႆး ၾၢႆႇႁွင်ႇမိူင်းသူႈၼၼ်ႉ ယိုဝ်းၵူၼ်းမိူင်းသူႈ 3 ၵေႃႉ ပေႃႈမႄႈလုၵ်ႈတၢႆ ၼႂ်းၵႄႈသဵၼ်ႈတၢင်ႉယၢၼ်း – မိူင်းသူႈ ။
မိူဝ်ႈဝႃး ဝၼ်းတီႈ 18/7/2022 ယၢမ်းၵၢင်ၶမ်ႈ 7 မူင်းပၢႆ သိုၵ်းမၢၼ်ႈႁႄႉၵႃး ၸၢႆးသီႇႁႃႉလႄႈ ၼၢင်းသႅင်လူႇ ပႃးတင်းလုၵ်ႈဢွၼ်ႇၶဝ် ၊ ၶီႇမႃးၸွမ်းၵၼ် 3 ၵေႃႉပေႃႈမႄႈလုၵ်ႈ၊ တီႈၼႂ်းၵႄႈဝၢၼ်ႈႁူၺ်ႈလွတ်ႇ – တွင်ႁဵဝ်း ၾၢႆႇႁွင်ႇဝဵင်းမိူင်းသူႈ၊ ၾၢႆႇသိုၵ်းမၢၼ်ႈလၢၵ်ႈၵွင်ႈ ယိုဝ်းသႂ်ႇၼႂ်းၵႃးၵမ်းလဵဝ် ၵေႃႉပဵၼ်ၼၢင်းသႅင်လူႇလႄႈ လုၵ်ႈၸၢႆးဢွၼ်ႇ ဢႃယု 3 ၶူပ်ႇပၢႆ လႆႈလူႉတၢႆထင်တီႈၼႂ်းၵႃး ၸၢႆးသီႇႁႃႉသမ်ႉ မၢတ်ႇမၢၵ်ႇၵွင်ႈႁၢဝ်ႈႁႅင်း မႃးတၢႆ တီႈႁူင်းယႃမိူင်းသူႈ။
ၵူၼ်းမိူင်းသူႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈယဝ်ႉ ၸႂ်ဢမ်ႇလီၸွမ်း မုင်ႉႁေႃႁိူၼ်း ၸၢႆးသီႇႁႃႉ ၶဝ်တႄႉတႄႉၶႃႈ။ တူဝ်ၸၢႆးသီႇႁႃႉတႄႉ လႆႈမႃးတၢႆ တီႈႁူင်းယႃၼႆႉ မိူဝ်ႈဝႃး ယၢမ်းၵၢင်ၶိုၼ်းဢေႃႈ။ တေပူၼ်ႉၶၢပ်ႈတူဝ် မၼ်းၸၢႆး မိူဝ်ႈၼႆႉၶႃႈ။ မိူဝ်ႈဝႃးတႄႉ လႆႈပူၼ်ႉၶၢပ်ႈတူဝ်မေးမၼ်း ၼၢင်းသႅင်ႇလူႇလႄႈ လုၵ်ႈၸၢႆးဢွၼ်ႇမၼ်း ဢႃယု 3 ၶူပ်ႇပၢႆၼၼ်ႉဢေႃႈ။ တူဝ်မၢတ်ႇၸဵပ်းၸၢႆးသီႇႁႃႉတႄႉ ၵူၼ်းဝၢၼ်ႈၸွႆႈၵၼ်ဢဝ်သူင်ႇႁူင်းယႃ။ မၢတ်ႇမၢၵ်ႇၵွင်ႈဝႆႉ လိူၼ်ႈပေႃးလႆၼွင်းဝႆႉၶႃႈဢေႃႈ ”- ဝႃႈၼႆ။
သိုၵ်းမၢၼ်ႈဢၼ်ယိုဝ်းၸၢႆးသီႇႁႃႉၶဝ် 3 ၵေႃႉပေႃႈမႄႈလုၵ်ႈၼၼ်ႉပဵၼ်တပ်ႉလႂ်ၼႆတႄႉ ၵူၼ်းမိူင်းသူႈတိုၵ်ႉၸွပ်ႇတူၺ်းယူႇ။ မိူဝ်ႈၶမ်ႈဝႃးၼႆႉတႄႉ သိုၵ်းမၢၼ်ႈၼႂ်းဝဵင်းမိူင်းသူႈမႃးတူၺ်းတီႈႁူင်းယႃယူႇၵမ်းၼိုင်ႈ။ ၵူၺ်းၵႃႈဢမ်ႇဝႃႈ ဢမ်ႇတၵ်းသဵင်သင်။ တေႃႇထိုင်ယၢမ်းလဵဝ်ယူႇတီႈၵူၼ်းမိူင်းၵေႃႈ ဢမ်ႇၸၢင်ႈၵႂႃႇတိူင်ႇၵႂႃႇလၢတ်ႈၸူးၽႂ်တီႈလႂ်ဝႃႈၼႆ။
ၸၢႆးသီႇႁႃႉတင်း ၼၢင်းသႅင်လူႇၼႆႉ ပဵၼ်ၵူၼ်းဝၢၼ်ႈတွင်ႁဵဝ်း ၶဝ်သွင်ၵေႃႉၽူဝ်မေး လုၵ်ႉတၢင်းမိူင်းသူႈ တေပွၵ်ႈမိူဝ်းႁိူၼ်း တီႈဝၢၼ်ႈၼႆသေ ၺႃးသိုၵ်းမၢၼ်ႈ ယိုဝ်းတၢႆ။
ယၢမ်းလဵဝ် တၢင်းမိူင်းဢွတ်ႇလႄႈ ႁိမ်းလွႆၼၢႆးၸိူဝ်းၼႆႉ သိုၵ်းမၢၼ်ႈထႅမ်ႁႅင်းသိုၵ်းဝႆႉမီးၼမ်။ လုၵ်ႉမိူင်းသူႈၶိုၼ်ႈၵႂႃႇမီးၵူႈဝၼ်း မိူင်းသူႈလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ