ပၢင်တေႃႇလွင်း တီႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း တုမ်ႉယွၼ်ႈၵူၼ်းမိူင်း – ၵူၼ်းၼုမ်ႇ ဢၵျၢင်ႉတၢင်းယၢမ်ႈလူႉၼမ် ႁဵတ်းႁႂ်ႈၵူၼ်း ပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ ဢုၼ်ႇၸႂ်ၸွမ်း မွင်းႁႂ်ႈၸဵဝ်းပိၵ်ႉဢိုတ်းၶၼ်ၽႂ်း။
ယၢမ်းလဵဝ် ပၢင်တေႃႇလွင်းၼႆႉ ပိုတ်ႇဝႆႉ ၼႂ်းၼႃႈတီႈၸုမ်းပျီႇတူႉၸိတ်ႉ S3 တူဝ်ၵုမ်းၵမ် တီႈဝၢၼ်ႈပႃႇမႆႉ ဝဵင်းၼမ်ႉၸၢင် တၢင်းၽႄ ၵႂႃႇ ဝဵင်းမိူင်းၼၢႆး ။ ပိုတ်ႇမႃးမီးၶၢဝ်းတၢင်းမွၵ်ႈ 3 လိူၼ်ယဝ်ႉ ပႆႇဢိုတ်းၵိုတ်းလိုဝ်ႈလႄႈ တုမ်ႉယွၼ်ႈၵူၼ်းမိူင်း ဢၵျၢင်ႉတၢင်းယၢမ်ႈလူႉ ၊ မၢင်ၵေႃႉ လွင်းသုမ်း ထိုင်တီႈဢဝ် ရူတ်ႉၵႃး ႁိူၼ်းယေးၵႂႃႇၵမ်ႉသေ သိုပ်ႇလွင်းထႅင်ႈၵေႃႈလွင်းသုမ်းထႅင်ႈ။
ၵူၼ်းၼမ်ႉၸၢင် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ပၢင်တေႃႇလွင်း တီႈၼမ်ႉၸၢင်ၼႆႉ မီးတီႈပွၵ်ႉပႃႇမႆႉ ၶွင် S3 တူဝ် ၵုမ်းၵမ် ဝႆႉၼၼ်ႉၵူၺ်း။ ၵူၼ်းၵႂႃႇတေႃႇလွင်းၼႆႉ ၵိုၼ်းၶွၼ်ႈတင်းဝၼ်း/ တင်းၶိုၼ်းၶႃႈယဝ်ႉ။ ၵူၼ်းလွင်းသုမ်းၼႆႉ ၶႂ်ႈဝႃႈမီးၵူႈဝၼ်း။ တီႈၼႆႈၼႆႉ ၶဝ်ပိုတ်ႇမႃးမီးၶၢဝ်းတၢင်း 2-3 လိူၼ်ယဝ်ႉ ပႆႇပိၵ်ႉ မွင်းႁႂ်ႈၶဝ်ပိၵ်ႉၼႃႇယဝ်ႉ။ ဢၼ်ၶဝ်ပိုတ်ႇၼႆႉ တိူဝ်ႉၶိူၵ်ႈပၢႆးမၢၵ်ႈမီး ၵူၼ်းမိူင်းတႄႉၶႃႈ မၢင်ၵေႃႉ ဢဝ်ၵႃးၵႂႃႇၵမ်ႉတေႃႇသုမ်း ပဵၼ်လမ်းပဵၼ်လမ်းၸိူဝ်းၼႆႉ မီးတင်းၼမ်ယဝ်ႉ”- ဝႃႈၼႆ။
ပၢင်တေႃႇလွင်း ၼႂ်းၼႃႈတီႈပျီႇတူႉၸိတ်ႉၼႃးယႆးလႄႈ ပၢင်ႇလႅင်းတႄႉ ပိၵ်ႉဢိုတ်းၵႂႃႇယဝ်ႉ။ ၵိုတ်းဝႆႉ ၼႂ်းၼႃႈတီႈပျီႇတူႉၸိတ်ႉ S3 တူဝ် ၵုမ်းၵမ်။ တီႈၼႂ်းပၢင်တေႃႇလွင်းၼၼ်ႉ မီး ၽၢႆႉ၊ မၢၵ်ႇတူၵ်းၶိုၼ်ႈလႆ၊ လေး ၵွင်ႇၵျိၼ်ႇ ၸိူဝ်းၼႆႉ။
ၼွၵ်ႈလိူဝ်ၼၼ်ႉ ပၢင်တေႃႇလွင်း ၵဵမ်းပႃ ၸိူဝ်းၼႆႉၵေႃႈ လိူင်ႇၼမ် ၊ပလိၵ်ႈ သိုၵ်းမၢၼ်ႈ ဢမ်ႇဢဝ်လိူင်ႈတီႉၺွပ်းသင် ယွၼ်ႉလႆႈၵိၼ်ငိုၼ်းၸွမ်း- ၵူၼ်းၼမ်ႉၸၢင်လၢတ်ႈ။
