ႁိူၼ်းယေးၵူၼ်းဝၢၼ်ႈ တီႈဝဵင်းပၢင်လူင် လင်ၼိုင်ႈ ၺႃးၽူႈလၵ်ႉၶဝ်ႈသွၵ်ႈ လႆႈၵႂႃႇၶမ်း 3 ၵျၢပ်ႈလႄႈ ငိုၼ်း 6 သႅၼ်ပျႃး ။
မိူဝ်ႈဝၼ်းတီႈ 24/6/2022 ယၢမ်းဝၢႆးဝၼ်း မွၵ်ႈ 3 မူင်း ႁိူၼ်းမႄႈထဝ်ႈဢွင်ႇ ဢႃယု 64 ပီ တီႈဝၢၼ်ႈၶူင်ႈလူင် ဢိူင်ႇ တၢၼ်ႇဢေ ဝဵင်းပၢင်လူင် ၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း ၺႃးၽူႈလၵ်ႉၶိုၼ်ႈ လႆႈၵႂႃႇငိုၼ်း 6 သႅၼ်ပျႃးလႄႈ ၶမ်း 3 ၵျၢပ်ႈ ၼႆယဝ်ႉ။
လုၵ်ႈၸၢႆး မႄႈထဝ်ႈဢွင်ႇ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၽွင်းမႃးလၵ်ႉၼၼ်ႉ ၽႂ်ၵေႃႈ ဢမ်ႇယူႇႁိူၼ်းၶႃႈ။ မႄႈၶႃႈ ၵႂႃႇႁဵတ်း ၵၢၼ်တၢင်းၼွၵ်ႈ ဢမ်ႇယူႇႁိူၼ်းၶႃႈ။ ယၢမ်းလဵဝ် ႁဝ်းၶႃႈ မူတ်းတူဝ်မူတ်းယဝ်ႉ ဢၼ်ႁဵတ်းႁႃမႃး ၸိူဝ်းၼၼ်ႉ ပေႃးဢမ်ႇမီး သင်ၵိၼ်ယဝ်ႉ ႁဝ်းၶႃႈ ၶႂ်ႈလႆႈၶိုၼ်းငိုၼ်းၶမ်း ဢၼ်တီႈထုၵ်ႇလၵ်ႉၵႂႃႇၼၼ်ႉၶႃႈ”- ဝႃႈၼႆ။
မႄႈထဝ်ႈဢွင်ႇၼႆႉယူႇၸွမ်းၵၼ်ဝႆႉတင်းလုၵ်ႈၸၢႆးမၼ်း။ တေႃႇထိုင်ယၢမ်းလဵဝ် ပလိၵ်ႈဢမ်ႇတီႉလႆႈၵူၼ်းလၵ်ႉၼၼ်ႉလႄႈ မႄႈထဝ်ႈဢွင်ႇသွင်ၵေႃႉမႄႈလုၵ်ႈပဵၼ်ဢၼ်ယၢပ်ႇၽိုတ်ႇၵိၼ်းၸႂ်ႁႅင်းဝႃႈၼႆ။
ဝၢႆးသေ သိုၵ်းမၢၼ်ႈ ယိုတ်းမိူင်းမႃး ၶၢဝ်း တၢင်းပီပၢႆ ၼႂ်းၸႄႈမိူင်းတႆးၼႆႉ ၽူႈလၵ်ႉၵူၼ်းၸူၼ် ယိုင်ႈၶႅၼ်းလိူင်ႇၼမ်မႃး လိူဝ်ၵဝ်ႇထႅင်ႈ ပလိၵ်ႈသိုၵ်းမၢၼ်ႈ ဢမ်ႇ တွၼ်ႉတီႉၺွပ်းလႆႈမႃးသေပွၵ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ