ၽွင်းၶၢဝ်း လူဝ်ႇႁဵတ်းၵၢၼ်သူၼ်ႁႆႈၼႃးၼႆႉ သိုၵ်းၶၢင် KIA တင်း PDF ႁၢမ်ႈၵူၼ်းမိူင်းမိတ်ႈ ၼူဝ်းၸၢၵ်ႈ လူင်းထႆၼႃး ယွၼ်ႉ ၵူဝ်ဢမ်ႇလႆႈငိၼ်းသဵင် ႁိူဝ်းမိၼ်သိုၵ်းမၢၼ်ႈမႃး ဝႃႈၼႆ။
သိုၵ်းၶၢင် KIA, တင်း ၸုမ်းၵႅတ်ႇၶႄၵူၼ်းမိူင်း PDF ႁၢမ်ႈၵူၼ်းဝၢၼ်ႈသၢႆးလႅင်၊ ဝၢၼ်ႈၸၢင်ႈၵၢင်ႇလႄႈ ဝၢၼ်ႈမၢၵ်ႇမူင်ႈဝၢၼ် ၼႂ်းၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇဝႃႈ ၼႂ်းဝူင်ႈဝၢင်ႈၼႆႉ ၽႂ်တေ ဢမ်ႇလႆႈပၼ်သဵင်ၸၢၵ်ႈထႆၼႃးဢွၵ်ႇ ၵူဝ်ဢမ်ႇလႆႈငိၼ်းသဵင် ႁိူဝ်းမိၼ် သိုၵ်းမၢၼ်ႈမႃး ဝႃႈၼႆ။
ၵူၼ်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “တၢင်းဝၢၼ်ႈသၢႆးလႅင်ၼႆႉ ၼမ်ႉသမ်ႉမႃးထူမ်ႈၶဝ်ႈ။ မၢင်ႁိူၼ်းဢမ်ႇ တၼ်းလႆႈသိမ်းၶဝ်ႈ တေၶိုၼ်းသိုပ်ႇႁဵတ်းၼႃးမႂ်ႇမႂ်ႇထႅင်ႈၵေႃႈ သိုၵ်းၶၢင်တင်း PDF သမ်ႉ ဢမ်ႇပၼ်သဵင်ၸၢၵ်ႈထႆၼႃးဢွၵ်ႇ ။ၵူၼ်းဝၢၼ်ႈတႄႉ ဢမ်ႇၸၢင်ႈႁဵတ်းၸိူင်ႉႁိုဝ်ယဝ်ႉ ၵႃႈလႆႈၵိုတ်းဝႆႉ။ သင်ႇႁၢမ်ႈမႃး မီး 2-3 ဝၼ်းၼႆႉယဝ်ႉ။ ၶဝ်ဝႃႈ ၼႂ်းဝူင်ႈဝၢင်ႈၼႆႉ ယႃႇပေႁႂ်ႈသဵင်ၸၢၵ်ႈထႆၼႃးဢွၵ်ႇ”- ဝႃႈၼႆ။
တီႈဝၢၼ်ႈၸၢင်ႈၵၢင်ႇ သမ်ႉ မီးဝႆႉတပ်ႉသိုၵ်းမၢၼ်ႈယူႇဝႆႉလႄႈ မိူဝ်ႈလဵဝ် သိုၵ်းၶၢင် KIA တင်း PDF သမ်ႉ လွမ်ႉႁွပ်ႈတပ်ႉသိုၵ်းမၢၼ်ႈ တီႈဝၢၼ်ႈၸၢင်ႈ ၵၢင်ႇဝႆႉ ပေႃးႁိူဝ်းမိၼ်မၢၼ်ႈမႃးၸွႆႈၼႆ ၵူဝ်ဢမ်ႇလႆႈငိၼ်းသဵင်ႁိူဝ်းမိၼ်။ ယၢမ်းလဵဝ် ၾၢႆႇသိုၵ်းမၢၼ်ႈသမ်ႉ ထႅမ် ႁႅင်းသိုၵ်းမႃးဝႆႉ တီႈ ဝၢၼ်ႈသၢႆးလႅင်ဝႆႉ။
ၽွင်းၵူၼ်းမိူင်း လူဝ်ႇႁဵတ်းၵၢၼ် လူဝ်ႇသွမ်ႈၼႃး သဵင် ၸၢၵ်ႈထႆၼႃးၵူၺ်းၵေႃႈ ယႃႇႁႂ်ႈဢွၵ်ႇၼႆ ႁဵတ်းႁႂ်ႈၵူၼ်းမိူင်း ဢွၼ်ၵၼ်ထူပ်းတၢင်းယၢပ်ႇၽိုတ်ႇၵိၼ်းၸႂ်။
ထႅင်ႈလွင်ႈၼိုင်ႈသမ်ႉ သိုၵ်းမၢၼ်ႈပလိၵ်ႈမၢၼ်ႈၵေႃႈ ပႂ်ႉၵူတ်ႇထတ်းၵူၼ်းမိူင်းပိုၼ်ႉတီႈ ၵႂႃႇမႃးႁၢဝ်ႈႁႅင်းထႅင်ႈ။ ၵွပ်ႈၼႆလႄႈ တႃႇၵူၼ်းမိူင်းပိုၼ်ႉတီႈတႄႉ ဢမ်ႇမီးလွင်ႈႁူမ်ႇလူမ်ႈသင်ယဝ်ႉ တေႃႈၼင်ႇ ၵၢင်ဝၼ်းၵူၺ်းၵေႃႈ ဢမ်ႇပေႃးႁတ်းၵႂႃႇတၢင်းလႂ် ၵၼ် ဢမ်ႇႁူႉဝႃႈ သဵင်ၵွင်ႈၼႆႉ တေတႅၵ်ႇထႅင်ႈတီႈလႂ် ၵူၼ်းမိူင်းမိတ်ႈလၢတ်ႈ။
