သိုၵ်းမၢၼ်ႈ ပႆႇပူတ်းပႅတ်ႈ မၢႆမီႈႁၢမ်ႈဢွၵ်ႇၼွၵ်ႈႁိူၼ်းယေး (မႃႇသျႄႇလေႃး) တီႈဝဵင်းသီႇပေႃႉ ႁဵတ်းႁႂ်ႈၵူၼ်းႁႃၸဝ်ႉၵိၼ်ၶမ်ႈ ထူပ်းတၢင်းယၢပ်ႇၽိုတ်ႇႁႅင်း။
တႄႇဢဝ် ဝၼ်းတီႈ 8/6/2022 ၼၼ်ႉမႃး ထိုင်ယၢမ်းလဵဝ် ၽူႈၵွၼ်းၸႄႈဝဵင်း တႂ်ႈၶွင်ႇသီႇသိုၵ်းမၢၼ်ႈ ယိုတ်းမိူင်းၵုမ်းၵမ် ဢွၵ်ႇမၢႆမီႈ ႁၢမ်ႈဢွၵ်ႇၼွၵ်ႈႁိူၼ်းယေး တႄႇဢဝ် ၵၢင်ၶမ်ႈ 8 မူင်းထိုင် 4 မူင်း ၵၢင်ၼႂ်ၸဝ်ႉ မႃးၶၢဝ်းတၢင်းလိူၼ်ပၢႆယဝ်ႉ ၼႂ်း ၸႄႈဝဵင်းသီႇပေႃႉႁဵတ်းႁႂ်ႈၵူၼ်းမိူင်း/ ၵူၼ်းၶၢႆၵၢတ်ႇၶဝ် ဢွၼ်ၵၼ် ထူပ်းတၢင်းယၢပ်ႇ ၽိုတ်ႇႁႅင်း ။
ၵူၼ်းၶၢႆၶူဝ်းၼႂ်းၵၢတ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူင်းမၢၼ်ႈၼႆႉ ပိူၼ်ႈပေႃးဢမ်ႇမီးယဝ်ႉ ပိူင်မႃႇသျႄႇလေႃးၼႆႉ မီးဝဵင်း ႁဝ်းၼႆႉၵူၺ်း တိုၵ်ႉမီးမၢႆမီႈၼႆႉယူႇ။ မၼ်းႁဵတ်းႁႂ်ႈ ႁဝ်းၶႃႈ ၵူၼ်းၶၢႆၵၢတ်ႇ ယၢပ်ႇၽိုတ်ႇလိူဝ်ႁႅင်းထႅင်ႈၵူၺ်း။ မိူဝ်ႈၵူႈပွၵ်ႈ ႁဝ်းၶႃႈ လုၵ်ႉ 12 မူင်း 1 မူင်းၵၢင်ၶိုၼ်းသေ ၵႂႃႇႁၢင်ႈႁႅၼ်းႁၢင်ႈႁႅၼ်းသိုဝ်ႉၶူဝ်းတီႈၵၢတ်ႇ။ မွၵ်ႈ 2-3 မူင်းၼႆႉ ႁဝ်းၶႃႈ ဢွၵ်ႇပၼ်ၵႂႃႇၶၢႆ ၸွမ်းၼႂ်းမူႇဝၢၼ်ႈယဝ်ႉ။ ၸူဝ်ႈၶၢဝ်းဢွၵ်ႇမႃႇသျႄႇလေႃးၼႆႉမႃး ႁဵတ်းႁႂ်ႈႁဝ်းၶႃႈ ယၢပ်ႇၽိုတ်ႇႁႅင်းၶႃႈ” – ဝႃႈၼႆ။
ဢိင်ၼိူဝ် လွင်ႈမၢႆမီႈႁၢမ်ႈဢွၵ်ႇႁိူၼ်းယေးၼႆႉသေ ႁဵတ်းႁႂ်ႈၵူၼ်းမိူင်းပိုၼ်ႉတီႈ ထူပ်းတၢင်းယၢပ်ႇၽိုတ်ႇႁႅင်းထႅင်ႈလွင်ႈၼိုင်ႈ တႄႉ ၽွင်း ဢမ်ႇယူႇလီ တေၵႂႃႇႁူင်းယႃ/ ႁႃမေႃယႃ ယၢမ်းၵၢင်ၶမ်ႈ/ ၵၢင်ၶိုၼ်း ၸိူဝ်းၼႆႉ။
လိူဝ်ၼၼ်ႉ မိူၼ်ၼင်ႇ ႁၢၼ်ႉၶၢႆၶဝ်ႈၽၵ်း၊ ႁၢၼ်ႉၶၢႆၼိူဝ်ႉယၢင်ႈ/ မူႇယၢင်ႈ၊ ႁၢၼ်ႉၶၢႆ ၶွင်ၵိၼ်ယႅမ်ႉ ၼမ်ႉၼဵင်ႈၸဵမ်း ၸွမ်းၶၢင်ႈတၢင်း ၸိူဝ်းၼႆႉၵေႃႈ လႆႈပိၵ်ႉဢိုတ်းၵၼ်မႃး တင်းၼမ်သေ တုမ်ႉၵၢၼ်ႁႃၵိၼ်လဵင်ႉတွင်ႉ တႃႇၵူၼ်းမိူင်းတႄႉ ဝႃႈၼႆ။
ၵဵဝ်ႇလူၺ်ႈလွင်ႈ ဢွၵ်ႇမၢႆမီႈႁၢမ်ႈဢွၵ်ႇႁိူၼ်းယေး ယၢမ်းၵၢင်ၶမ်ႈ/ ၵၢင်းၶိုၼ်း ၸိူဝ်းၼႆၼႆႉ ၵူၺ်းၵႃႈ ႁၢၼ်ႉ KTV သမ်ႉ ပိုတ်ႇ တၢင်းၶမ်ႈ/ ၶိုၼ်း သဵင်ပၼ်းယူႇၵေႃႈ သိုၵ်းမၢၼ်ႈပလိၵ်ႈမၢၼ်ႈ ဢမ်ႇၶဝ်ႈၵူတ်ႇထတ်းတီႉၺွပ်းသင်။
ယဝ်ႉၵေႃႈ တီႈႁိမ်းဝၢၼ်ႈတႃႈပူၵ်ႇ ပွၵ်ႉဝၢၼ်ႈၸၢတ်ႈ ၸႄႈဝဵင်းသီႇပေႃႉၼႆႉ ပိုတ်ႇဝႆႉပၢင်တေႃႇလွင်း တၢင်းဝၼ်း/ ၶိုၼ်း မိူဝ်ႈႁူဝ် လိူၼ်ၵျုႊလၢႆႊၼႆႉသေ ၵူၼ်းပေႃးၵိုၼ်းၶွၼ်ႈလူင်ဝႆႉ တေႃႇလွင်းသုမ်းၵၼ် ၼိုင်ႈၶမ်ႈလႂ် ၼပ်ႉႁူဝ်သိပ်းသႅၼ်မၼ်း ၼၼ်ႉၵေႃႈ ဢမ်ႇၶဝ်ႈၵူတ်ႇထတ်းတီႉၺွပ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ