သိုၵ်း KIA, PDF ႁူမ်ႈၵၼ် ပိုတ်းယိုဝ်းသိုၵ်းမၢၼ်ႈတီႈဝဵင်းမိူင်းမိတ်ႈ ၾၢႆႇသိုၵ်းမၢၼ်ႈ မၢတ်ႇၸဵပ်းလူႉတၢႆ။
ဝၼ်းတီႈ 13/7/2022 ယၢမ်းၵၢင်ဝၼ်း 12:30 မူင်း မၢၵ်ႇတႅၵ်ႇထပ်းၵၼ် 2 လုၵ်ႈ တီႈတပ်ႉၶလယ 276, 348 လႄႈ ၶမယ 223 ဢၼ်ႁူမ်ႈၵၼ်ပၵ်းဝႆႉ တီႈဝၢၼ်ႈၽၵ်းတေႃးၼၼ်ႉ လုၵ်ႈၼိုင်ႈ။ တီႈႁူင်းပလိၵ်ႈမၢၼ်ႈ ပွၵ်ႉႁေႃၼၢင်း လုၵ်ႈၼိုင်ႈ ၼႂ်းၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ။
ၵူၼ်းမိူင်းမိတ်ႈ ၽူႈၸၢႆး ဢႃယု 50 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး မၢၵ်ႇတႅၵ်ႇ တီႈတပ်ႉမၢၼ်ႈ ဢၼ်ပၵ်း ဝႆႉဝၢၼ်ႈၽၵ်းတေႃး 1 လုၵ်ႈ။ တီႈႁူင်းပလိၵ်ႈမၢၼ်ႈ ပွၵ်ႉႁေႃၼၢင်း 1 လုၵ်ႈ။ ၾၢႆႇသိုၵ်းမၢၼ်ႈမီးလွင်ႈမၢတ်ႇၸဵပ်းလူႉတၢႆ ဢေႃႈ။ လၢႆၵေႃႉတႄႉၵေႃႈ ပႆႇႁူႉၶႃႈ”- ဝႃႈၼႆ။
လိူဝ်ၼၼ်ႉ ယၢမ်းႁူဝ်ၶမ်ႈ မွၵ်ႈ 5:20 မူင်း သိုၵ်းၶၢင် KIA, PDF ႁူမ်ႈၵၼ် ယိုဝ်းၵွင်ႈလူင် သႂ်ႇသိုၵ်းမၢၼ်ႈ တီႈဝၢၼ်ႈသၢႆးလႅင် ဢၼ်မီးတၢင်း ၸဵင်ႇႁွင်ႇဝၼ်းဢွၵ်ႇဝဵင်းမိူင်းမိတ်ႈၼၼ်ႉထႅင်ႈဢမ်ႇယွမ်း 10 လုၵ်ႈ ဝႃႈၼႆ။
“မိူဝ်ႈႁူဝ်ၶမ်ႈ 5 မူင်းပၢႆၼၼ်ႉ KIA, PDF ယိုဝ်းမၢၵ်ႇလူင်သႂ်ႇ သိုၵ်းမၢၼ်ႈ တီႈဝၢၼ်ႈသၢႆးလႅင် 10 လုၵ်ႈ ၾၢႆႇသိုၵ်းမၢၼ်ႈ တုမ်ႉ တွပ်ႇၶိုၼ်း 2 လုၵ်ႈ။ သိုၵ်းမၢၼ်ႈ မီးလွင်ႈလူႉတၢႆ 1 ၵေႃႉ မၢတ်ႇၸဵပ်းၼမ်ၶႃႈဢေႃႈ။ သိုၵ်းမၢၼ်ႈ ဢၼ်ပၵ်းဝႆႉ တီႈဝၢၼ်ႈ သၢႆးလႅင်ၼၼ်ႉ ပဵၼ်တပ်ႉၶမယ 276 တင်း 348 ၶဝ်ပဵၼ်ပၢင်တိုၵ်းၵၼ် ႁိုင် 15 မိၼိတ်ႉၼႆႉ။ ၾၢႆႇ KIA, PDF တႄႉ လွင်ႈလူႉတၢႆမၢတ်ႇ ၸဵပ်းတႄႉ ဢမ်ႇႁူႉၸွမ်းၶႃႈ”- ၵူၼ်းမိူင်းမိတ်ႈ သိုပ်ႇလၢတ်ႈၼႄၼင်ႇၼႆ။
ဝၢႆးသေ ပၢင်တိုၵ်းယဝ်ႉၼၼ်ႉ သိုၵ်းမၢၼ်ႈ ပႂ်ႉၵူတ်ႇထတ်း ႁၢဝ်ႈႁႅင်း တီႈၵဵၵ်ႉလၢၼ်ႇၶဝ် ဝၢၼ်ႈၺွင်ႇပၢင်ၸွၵ်ႉ။ သိုၵ်းမၢၼ်ႈၵူတ်ႇထတ်းၾူၼ်း၊ ၸုၵ်းထူင်/ထွင်း ၵူႈၵေႃႉ ၸဵမ်လုၵ်ႈဢွၼ်ႇ ၵူၼ်းလူင် ၵူၼ်းထဝ်ႈ၊ ၼၢင်းယိင်း ။ ယဝ်ႉၵေႃႈ ၸႅတ်ႈပႃးထႅင်ႈ တႂ်ႈၵွပ်းၼင်ႈရူတ်ႉၶိူင်ႈ ၼႂ်းၵႃး ၸိူဝ်းၼႆႉ။ ဢၼ်ၵူတ်ႇထတ်းႁႅင်း တီႈသုတ်းသမ်ႉ ပဵၼ်မၢႆၾၢင်လႄႈ ၾူၼ်း ။
ၼႂ်းလိူၼ်ၵျူႊလၢႆႊၼႆႉ သဵင်ၵွင်ႈသဵင်မၢၵ်ႇတႅၵ်ႇ တီႈမိူင်းမိတ်ႈၼႆႉ ၶႂ်ႈဝႃႈမီးၵူႈဝၼ်း။ ၵူၺ်းၵႃႈ ပဵၼ်တီႈတပ်ႉသိုၵ်းမၢၼ်ႈ ႁူင်းပ လိၵ်ႈလႄႈ ၵဵတ်ႉ/လၢၼ်ႇ ၵူႈႁွင်ႈၵၢၼ် တၢင်းၶဝ်ႈ ဝဵင်းမိူင်းမိတ်ႈၼၼ်ႉ လွၼ်ႉလွၼ်ႉ။
မိူဝ်ႈဝၼ်းတီႈ 1/7/2022 ၼၼ်ႉၵေႃႉ သိုၵ်း SSPP လႄႈသိုၵ်းမၢၼ်ႈယိုဝ်းၵၼ်တီႈမိူင်းမိတ်ႈ ။ သိုၵ်းမၢၼ်ႈတၢႆ 3 ၵေႃႉ မၢတ်ႇၸဵပ်း 5 ၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ