သိုၵ်းမၢၼ်ႈ ထႅမ်ႁႅင်းသိုၵ်း  ဢဝ်ႁူမ်ႇလူမ်ႈ တီႈႁူင်းႁဵၼ်း  ၼႂ်းၸႄႈဝဵင်းမူႇၸေႊ

မိူဝ်ႈၼႆႉ ဝၼ်းတီႈ 14/7/2022 ယၢမ်းၵၢင်ၼႂ် မွၵ်ႈ 7 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်း ထႅမ်ႁႅင်းသိုၵ်း ၵႂႃႇပႂ်ႉဢဝ်ႁူမ်ႇ လူမ်ႈ ၸွမ်းႁူင်းႁဵၼ်း  ၸၼ်ႉဢွၼ် (မူႇလ) ၊ ၸၼ်ႉၵၢင်လႄႈ ၸၼ်ႉသုင်ၶႂ်ႈဝႃႈၵူႈႁူင်းႁဵၼ်း ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။

ဢိင်ၼိူဝ်မီးၵူၼ်းမႃးႁၢင်ႈၵၢင်မၢၵ်ႇႁိမ်းႁူင်းႁဵၼ်းၸၼ်ႉသုင်မၢႆ 2 တီႈပွၵ်ႉၼိူဝ် တီႈမူႇၸေႊမိူဝ်ႈဝႃးသေ ထိုင်မႃးမိူဝ်ႈၼႆႉ သိုၵ်းမၢၼ်ႈသူင်ႇႁႅင်းသိုၵ်းဢဝ်ႁူမ်ႇလူမ်ႈ။

ၽူႈၸၢႆး ဢႃယု 40 ပၢႆ ၵူၼ်းမူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၵၢင်ၼႂ်မွၵ်ႈ 7 မူင်း ႁဝ်းၶႃႈလတ်း ၵႂႃႇ ၼႃႈႁူင်းႁဵၼ်းၸၼ်ႉၵၢင် တီႈပွၵ်ႉၵွင်းၼွင်ၼၼ်ႉ သိုၵ်းမၢၼ်ႈ  တင်းပျီႇတူႉၸိတ်ႉ  ထႅမ်ႁႅင်းသိုၵ်း မႃးပႂ်ႉ ၵႃး 3 လမ်း။ တၢင်ႇႁူင်းႁဵၼ်းၵေႃႈ ႁၼ်ၶဝ်ၵႂႃႇပႂ်ႉဝႆႉဢေႃႈ”- ဝႃႈၼႆ။

သိုၵ်းမၢၼ်ႈလႄႈပျီႇတူႉၸိတ်ႉၸိူဝ်းၼႆႉ ၵူႈပွၵ်ႈတႄႉ ၶဝ်ပႂ်ႉၸွမ်းၼွၵ်ႈႁူင်းႁဵၼ်းလႄႈ တၢင်းၶဝ်ႈ/ ဢွၵ်ႇ ၼိုင်ႈႁူင်းႁဵၼ်းလႂ် မွၵ်ႈ 2 ၵေႃႉၵူၺ်း။ ယၢမ်းလဵဝ် တႄႉ 1 ႁူင်းႁဵၼ်းၶဝ်ပႂ်ႉဝႆႉ မွၵ်ႈ 6-7  ၵေႃႉ၊ ၵႂႃႇပႂ်ႉဝႆႉၸဵမ်ၵၢင်ၼႂ်မိူင်းပႆႇလႅင်း။     

“ဢၼ်ၶဝ်ဝႃႈ မႃးပႂ်ႉဢဝ်ႁူမ်ႇလူမ်ႈၼႆၼၼ်ႉ ယူႇတီႈႁဝ်းၶႃႈတူၺ်းတႄႉ ဢမ်ႇႁၼ်လီၸွမ်းၶႃႈ။ မိူၼ်တင်းဢဝ်လုၵ်ႈဢွၼ်ႇ ပဵၼ်ၶိူင်ႈမိုဝ်းသေ ႁဵတ်းႁူဝ်ႉပၼ်ၶဝ်ၵူၺ်း။ ဢၼ်ပိူၼ်ႈမႃး ႁၢင်ႈၵၢင်မၢၵ်ႇမိူဝ်ႈဝႃး တီႈပွၵ်ႉၼိူဝ်ၼၼ်ႉ ပိူၼ်ႈဢမ်ႇမႃးႁၢင်ႈၵၢင် ႁဵတ်းႁၢႆႉတေႃႇလုၵ်ႈႁဵၼ်းၶႃႈလူး။ ပိူၼ်ႈတင်ႈၸႂ် မႃးႁဵတ်းႁၢႆႉတေႃႉၶဝ်ၶႃႈၼႃႇ။ သင်ၶဝ်ဢမ်ႇမႃးပႂ်ႉၼႆ ယိုင်ႈၶႅၼ်းလီ။  လုၵ်ႈ ဢွၼ်ႇၵေႃႈ တေမီးလွင်ႈလွတ်းၽေးႁူမ်ႇလူမ်ႈလိူဝ်သေ ၶဝ်မႃးပႂ်ႉၵွၼ်ႇၶႃႈဢေႃႈ – ” ၵူၼ်းမူႇၸေႊ သိုပ်ႇလၢတ်ႈၼႄၼင်ႇ ၼႆ။

ၸူဝ်ႈသိုၵ်းမၢၼ်ႈၸႂ်ႉပိုတ်ႇႁူင်းႁဵၼ်းၵူႈၸၼ်ႉၵူႈဝၼ်း တင်ႈတႄႇလိူၼ်ၵျုၼ်ႊဝၼ်းတီႈ 1 မႃးတေႃႇထိုင်ဝၼ်းမိူဝ်ႈၼႆႉ သိုၵ်းမၢၼ်ႈလႄႈပျီႇတူႉၸိတ်ႉ ၵႂႃႇပႂ်ႉတီႈၽၵ်းတူၶဝ်ႈႁူင်းႁဵၼ်း ၵူႈလင် ၵူႈဝၼ်း (ၼွၵ်ႈလိူဝ်ဝၼ်းသဝ် ဝၼ်းတိတ်ႉ)။

တႄႇဢဝ် ဝၼ်းတီႈ 1/6/2022 ၼၼ်ႉမႃး ယူႇတီႈ ၶွင်ႇသီႇသိုၵ်းမၢၼ်ႈ ယိုတ်းမိူင်း ပိုၼ်ၽၢဝ်ႇ ပိုတ်ႇႁူင်းႁဵၼ်းတႂ်ႈၶဝ် ၵုမ်း ၵမ်ၼၼ်ႉမႃး ၼႂ်းမိူင်းႁူမ်ႈတုမ်ပတ်းပိုၼ်ႉလႄႈ တီႈဝဵင်းမူႇၸေႊၵေႃႈ လႆႈပိုတ်ႇႁူင်းႁဵၼ်းမႃး။ ဢိင်ၼိူဝ်လုၵ်ႈဢွၼ်ႇ ဢမ်ႇလႆႈႁဵၼ်းလိၵ်ႈမႃးၶၢဝ်းတၢင်း 2 ပီယဝ်ႉသေ ပေႃႈမႄႈလုၵ်ႈဢွၼ်ႇၵူဝ်လုၵ်ႈလၢင်းၸဝ်ႈၵဝ်ႇပူၼ်ႉဢႃယုႁဵၼ်းလိၵ်ႈလႄႈ ဢမ်ႇၶႂ်ႈႁဵၼ်းလိၵ်ႈတီႈႁူင်းႁဵၼ်းလူင်ပွင်ၸိုင်ႈၵေႃႈဢမ်ႇၸၢင်ႈႁဵတ်းႁိုဝ် ၵမ်ႈၼမ် ၵႃႈလႆႈဢဝ်လုၵ်ႈၵႂႃႇ ႁဵၼ်းလိၵ်ႈၶိုၼ်း။