ၵူၼ်းမိူင်းၵျွၵ်ႉမႄး ၵႂႃႇႁႃၼေႃႇၼႂ်းထိူၼ်ႇမႃးၶၢႆၼႂ်းၵၢတ်ႇ လဵင်ႉၼႃႈႁိူၼ်း ၺႃးၸုမ်းယိပ်းၵွင်ႈဢမ်ႇႁူႉၸုမ်း ၸုမ်းၼိုင်ႈယွၼ်းၵဵပ်းၶွၼ်ႇ ၵူၼ်းပိုၼ်ႉတီႈဢမ်ႇၸၢင်ႈႁႃၵိၼ်လွတ်ႈလႅဝ်း။

တင်ႈတႄႇလိူၼ်ၵျုၼ်ႊပူၼ်ႉမႃး ၵူၼ်းဝၢၼ်ႈၼႂ်းဢိူင်ႇပုင်းလူင် ၸေႈဝဵင်းၵျွၵ်ႉမႄး ၵႂႃႇႁႃႁဵပ်းႁႃၼေႃႇမႃးၶၢႆ၊ မီးၵူၼ်းၸုမ်းၼိုင်ႈပႂ်ႉၵဵပ်းၶွၼ်ႇၵူၼ်းႁႃၼေႃႇ ယွၼ်းငိုၼ်းၶိုၼ်ႈၾႃႉၶိုၼ်ႈမွၵ်ႇ၊ မၢင်ၵေႃႉၺႃးယွၼ်းငိုၼ်းထိုင် 5-6 မိုၼ်ႇပျႃးၵေႃႈမီး ၵူၼ်းၵျွၵ်ႉမႄး ၶၢင်းပွင်ႉယၢပ်ႇၽိုတ်ႇ။

ၵူၼ်းၼုမ်ႇၵျွၵ်ႉမႄး ဢႃယု 23 ပီၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ၸုမ်းၶဝ်ယိပ်းၵွင်ႈသေဢေႃႈ  ပဵၼ်ၽႂ်ၸုမ်းလႂ်တႄႉဢမ်ႇႁူႉ ။ ႁဝ်းၶႃႈႁႃၼေႃႇတႃႇလဵင်ႉၼႃႈႁိူၼ်းၵူၺ်းၼႆၵေႃႈဢမ်ႇလႆႈ ယွၼ်းငိုၼ်းထိုင် 5-6 မိုၼ်ႇ။ ယၢမ်းလဵဝ်ႁႃၼေႃႇႁႃႁဵပ်းဢမ်ႇငၢႆႈသေဢိတ်းယဝ်ႉၶႃႈ ၊ မီးလွင်ႈယၢပ်ႇၽိုတ်ႇလၢႆလၢႆလွင်ႈၼႃႇ”- ဝႃႈၼႆ။

ၸုမ်းယိပ်းၵွင်ႈၼၼ်ႉပဵၼ်ၽႂ်ၸုမ်းလႂ်တႄႉ ၽႂ်ပႆႇၸၢင်ႈယိုၼ်ယၼ်လႆႈတႅတ်ႈတေႃး။

ယၢမ်းလဵဝ်ၼေႃႇဢၼ်တူမ်ႈသေၶၢႆၼႂ်းၵၢတ်ႇ ၼိုင်ႈမတ်ႉ မီးၵႃႈၶၼ်ၼႂ်းၵႄႈ 500 ထိုင် 1000 ၵူၺ်းလႄႈ ပေႃးမီးလွင်ႈယွၼ်းငိုၼ်းယွၼ်းၶွၼ်ႇၼပ်ႉႁူဝ်မိုၼ်ႇၸိူင်ႉၼၼ်တႄႉ ဢမ်ႇၶူပ်းငၢမ်ႇသေဢိတ်းယဝ်ႉ ၵူၼ်းဝၢၼ်ႈလၢတ်ႈၼင်ႇၼႆ။

ၼႂ်းပိုၼ်ႉတီႈတၢင်း ဢိူင်ႇပုင်းလူင်ၼႆႉ ယၢမ်ႈပဵၼ်ပိုၼ်ႉတီႈ ပၢင်တိုၵ်းသိုၵ်းသိူဝ်လႄႈ ၵူၼ်းဝၢၼ်ႈၸိူဝ်းယူႇၸွၵ်ႉႁႅင်းၽႅဝ်ၸိူဝ်းၼၼ်ႉ ဢွၼ်ၵၼ်ပၢႆႈၶဝ်ႈဝဵင်း ယူႇသဝ်းႁႃၵိၼ်လဵင်ႉတွင်ႉၽႂ်မၼ်း သမ်ႉပေႃးဢမ်ႇႁတ်းမိူဝ်း ဢမ်ႇၸၢင်ႈပွၵ်ႈၶိုၼ်းဝၢၼ်ႈၵဝ်ႇမိူင်းလင်။ မၢင်ဝၢၼ်ႈမီးယူႇလင်ႁိူၼ်း 2-3 လင်ၵူၺ်းယဝ်ႉၵူၼ်းၵျွၵ်ႉမႄးလၢတ်ႈၼင်ႇၼႆ။

“ၶၢဝ်းၼႆႉပဵၼ်ၶၢဝ်းႁႃၼေႃႇ ႁႃႁဵပ်းၶၢႆလႄႈ ၵူၼ်းဝၢၼ်ႈ လုၵ်ႈဢွၼ်ႇလႆႈၸႂ်ယႂ်ႇၵႂႃႇႁႃသိုဝ်ႉၼေႃႇမႃးၶၢႆၼႂ်းၵၢတ်ႇ။ ပေႃးလႆႈမႃးၶၢႆၼႆ လႆႈငိုၼ်းၼမ်တၢၼ်ႇတၢၼ်ႇ ။ လႆႈၸႂ်ယႂ်ႇတႃႇလဵင်ႉၼႃႈႁိူၼ်း။ ပေႃးၵႂႃႇၵိၼ်ၸၢင်ႈႁဵတ်းၵၢၼ်ပိူၼ်ႈၼႆ လႆႈဝၼ်း 5 ႁဵင်ပျႃးၵူၺ်းၼႃႇ။ ပေႃးဢမ်ႇသၢင်ႇထုၵ်ႇ ၵႂႃႇယဵပ်ႇၺႃးမၢၵ်ႇမႅင်းၾင်လိၼ်ၸွမ်းလႅၼ်ႁႆႈ လႅၼ်သူၼ်ၼႆ သမ်ႉတၢႆလၢႆလၢႆႁေ ၵေႃႈမီး ။ လႆႈၾၢင်ႉႁႅင်းၼႃႇၶႃႈႁဝ်းၶႃႈၵူၼ်းဝၢၼ်ႈတႄႉ ”- ဝႃႈၼႆ။

ဢိင်ၼိူဝ်တၢင်းယၢပ်ႇၸိူဝ်းၼႆႉသေလႄႈ ၸုမ်းယိပ်းၵွင်ႈဢၼ်ပႂ်ႉၵဵပ်းၶွၼ်ႇယွၼ်းငိုၼ်းတီႈၵူၼ်းဝၢၼ်ႈႁႃၵိၼ်ၼေႃႇႁႃၵိၼ်ႁဵပ်းၼၼ်ႉ ၶႅၼ်းတေႃႈႁႂ်ႈလူတ်းယွၼ်ႇပၼ် ယႃႇပႂ်ႉၵဵပ်းၶွၼ်ႇသေ ႁႂ်ႈပၼ်ၵူၼ်းဝၢၼ်ႈႁႃၼေႃႇ ႁႃႁဵပ်းၶၢႆ လွတ်ႈလွတ်ႈလႅဝ်းလႅဝ်းမိူၼ်ၵူႈပွၵ်ႈၶိုၼ်းသေၵမ်း ၵူၼ်းဝၢၼ်ႈတီႈၵျွၵ်ႉမႄးဢွၼ်ၵၼ်လၢတ်ႈၼင်ႇၼႆ။