မိူဝ်ႈၼႆႉ ဝၼ်းတီႈ 13/7/2022 ယၢမ်းၵၢင်ၼႂ် ထူပ်းႁၼ်မၢၵ်ႇ သႂ်ႇထူမ်လမ်သေ ႁၢင်ႈၵၢင်ဝႆႉ ၼႂ်းဝၢင်းမၢၵ်ႇၼင်လွမ်ႈ လင်ႁူင်းႁဵၼ်းၸၼ်ႉသုင်မၢႆ 2 ပွၵ်ႉၼိူဝ် ဝဵင်းမူႇၸေႊ ၸိုင်ႈတႆးပွတ်းႁွင်ႇ 3 လုၵ်ႈ တႃႇလုၵ်ႈၼိုင်ႈ ယူႇတီႈၽူႈမီးပုၼ်ႈၽွၼ်း ၾၢႆႇပလိၵ်ႈ/သိုၵ်းမၢၼ်ႈၶဝ် မႃးယႃႉတႅၵ်ႇပႅတ်ႈ ဝႃႈၼႆ။

ၵူၼ်းမူႇၸေႊ ၽူႈၸၢႆး ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းလဵၼ်ႈမၢၵ်ႇၼင်ၶဝ် ထူပ်းႁၼ် ထူင်လမ် တမ်းဝႆႉ ၼႂ်းဝၢင်းမၢၵ်ႇၼင်လွမ်ႈ ထၢင်ႇထိူမ်ဝႃႈမီးသေၸိူဝ်ႉသေလွင်ႈၼႆသေ ၵပ်းၾူၼ်းၸူး တီႈၽူႈမီးပုၼ်ႈၽွၼ်း ၽူႈၵွၼ်း ပွၵ်ႉၶဝ် မႃးတူၺ်း။ ၼႂ်းထူင်လမ်တင်း 3 ထူင်ၼၼ်ႉ ပဵၼ်မၢၵ်ႇတႅၵ်ႇသႂ်ႇဝႆႉ တင်းသၢမ်ထူင်။ တႃႇလုၵ်ႈၼိုင်ႈတႄႉ ယူႇတီႈၽူႈမီး ပလိၵ်ႈသိုၵ်းၶဝ် မႃးယႃႉတႅၵ်ႇပႅတ်ႈ ယၢမ်းၵၢင်ၼႂ် 8:40 မူင်း။ တႃႇသွင်လုၵ်ႈၼၼ်ႉတႄႉ တိုၵ်ႉယႃႉ ၽဵဝ်ႈယူႇ”- ဝႃႈၼႆ။

လွင်ႈၼႆႉ ပဵၼ်မၢၵ်ႇၽႂ် ၸုမ်းလႂ် မႃးႁၢင်ႈၵၢင်ဝႆႉဢၼ်ဝႃႉၼၼ်ႉ ၽႂ်ပႆႇၸၢင်ႈယိုၼ်ယၼ်။ ဢွင်ႈတီႈၼႂ်းဝၢင်းမၢၵ်ႇ ၼင်လွမ်ႈၼၼ်ႉ ၵမ်ႈၼမ် တေမီးသိုၵ်းမၢၼ်ႈလႄႈ ၸုမ်းပျီႇတူႉၸိတ်ႉၶဝ် ၵႆႉမႃးၼင်ႈလဵၼ်ႈလိုဝ်ႈႁိူဝ်ႉ ၽွင်းဢဝ်ႁူမ်ႇလူမ်ႈ တီႈႁူင်းႁဵၼ်း ၸၼ်ႉသုင်မၢႆ 2 ၼၼ်ႉ ဝႃႈၼႆ။

“ဢၼ်ၶဝ်ယႃႉတႅၵ်ႇမိူဝ်ႈၵႆႈ လုၵ်ႈၼိုင်ႈတႄႉ ဢမ်ႇမီးလွင်ႈတုမ်ႉတိူဝ်ႉၵူၼ်းမၢတ်ႇၸဵပ်းလူႉတၢႆသင်။ ဢွင်ႈတီႈၼၼ်ႈသမ်ႉ သိုၵ်း မၢၼ်ႈ ပျီႇတူႉၸိတ်ႉၶဝ် ဢၼ်ဢဝ်ႁူမ်ႇလူမ်ႈတီႈၵျွင်းၼၼ်ႉ ၵႆႉမႃးၼင်ႈလိုဝ်ႈႁိူဝ်ႉၵၼ် ႁဵတ်းၼၼ်ၶႃႈဢေႃႈ။ ၵွပ်ႈၼႆလႄႈ တေ မီးၵူၼ်းမႃးႁၢင်ႈၵၢင်သႂ်ႇၶဝ်ၵူၺ်း”- ၵူၼ်းမူႇၸေႊ သိုပ်ႇလၢတ်ႈၼႄၼင်ႇၼႆ။

မၢၵ်ႇ 3 လုၵ်ႈ ဢၼ်ႁၢင်ႈၵၢင်ဝႆႉၼႂ်းဝၢင်းမၢၵ်ႇၼင်လွမ်ႈ တီႈပွၵ်ႉၼိူဝ်ၼၼ်ႉ တႃႇလုၵ်ႈၼိုင်ႈ သႂ်ႇထူင်လမ်သေ ႁၢင်ႈၵၢင်ဝႆႉ တၢင်းၶဝ်ႈ/ဢွၵ်ႇၽၵ်းတူဝၢင်းမၢၵ်ႇၼင်၊ တႃႇသွင်လုၵ်ႈၼၼ်ႉတႄႉ သႂ်ႇထူင်လမ်သေ ႁွႆႈဝႆႉတီႈတူၼ်ႈမႆႉ ၼႂ်းဝၢင်းမၢၵ်ႇၼင် ၼၼ်ႉ ဝႃႈၼႆ။

ဝၢႆးသေ ထူပ်းႁၼ် လွင်ႈႁၢင်ႈၵၢင်ႇမၢၵ်ႇ တီႈၼႂ်းဝၢင်းမၢၵ်ႇၼင်လွမ်ႈ လင်ႁူင်းႁဵၼ်းၼႆႉယဝ်ႉ ယူႇတီႈ ပေႃႈမႄႈ လုၵ်ႈဢွၼ်ႇ ႁဵၼ်း ၼႅတ်ႈဢွၼ်ၵၼ်ၵႂႃႇႁပ်ႉလုၵ်ႈလၢင်းၽႂ်မၼ်း ပွၵ်ႈၶိုၼ်းႁိူၼ်းယေးၵၼ်မူတ်း။ ယဝ်ႉၵေႃႈ မိူဝ်ႈၼႆႉ ႁူင်းႁဵၼ်းၸၼ်ႉသုင် မၢႆ 2 ၼႆႉၵေႃႈ ထုၵ်ႇပိၵ်ႉဢိုတ်းဝႆႉ ပေႃႈလုၵ်ႈဢွၼ်ႇႁဵၼ်း မူႇၸေႊ ၵေႃႉၼိုင်ႈလၢတ်ႈ။