Friday, March 29, 2024

လုၵ်ႈယိင်းသၢဝ်ႁၢႆ ပေႃႈမႄႈၺႃး ၵူၼ်းဢမ်ႇႁူႉၾၢႆႇ သိုပ်ႇၾူၼ်းလွၵ်ႇၵိၼ်ငိုၼ်း

Must read

မီးၵူၼ်းဢမ်ႇႁူႉၾၢႆႇ သိုပ်ႇၾူၼ်း လွၵ်ႇၵိၼ်ငိုၼ်း တီႈပေႃႈမႄႈ ဢၼ်လုၵ်ႈယိင်းသၢဝ်ႁၢႆဝႆႉၼၼ်ႉ ႁႂ်ႈဢူၼ်းပၼ် 15 သႅၼ် ပေႃးဢမ်ႇဢူၼ်း တေ ယိုဝ်းလုၵ်ႈသၢဝ်ၶဝ်တၢႆပႅတ်ႈ ဝႃႈၼႆ။

ၼၢင်းၶမ်းဢွင်ႇ ဢႃယု 19 ပီ ၵူၼ်းသီႇပေႃႉ ဢၼ်ႁၢႆဝႆႉ

ႁူဝ်လိူၼ်ၵျုႊလၢႆႊၼႆႉ မီးၽူႈၸၢႆးၵေႃႉၼိုင်ႈ ဢမ်ႇႁူႉၾၢႆႇ သိုပ်ႇၾူၼ်းၸူး ပေႃႈမႄႈ ၼၢင်းၶမ်းဢွင်ႇ ဢႃယု 19 ပီ ဢၼ်ႁၢႆဝႆႉၼၼ်ႉသေ လၢတ်ႈဝႃႈ ပေႃးၶႂ်ႈလႆႈၼၢင်းၶမ်းဢွင်ႇၶိုၼ်း ႁႂ်ႈဢူၼ်းငိုၼ်းပၼ် 15 သႅၼ် ပျႃး၊ သင်ဢမ်ႇဢဝ်ၶိုၼ်း တေယိုဝ်းတၢႆပႅတ်ႈ ဝႃႈၼႆ။

- Subscription -

ၼွင်ႉဢွၼ်ႇ ၵေႃႉပဵၼ်ၼွင်ႉယိင်း ၼၢင်းၶမ်းဢွင်ႇ ဢၼ်ႁၢႆဝႆႉၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ -“ပူၼ်ႉမႃး 2-3 ဝၼ်းၼႆႉ ၽူႈၸၢႆးၵေႃႉၼိုင်ႈသိုပ်ႇၾူၼ်းမႃးၸူးဢူႈႁဝ်း ၊ မၼ်းလၢတ်ႈတင်းၵႂၢမ်းမၢၼ်ႈ ဝႃႈ ပေႃးၶႂ်ႈလႆႈလုၵ်ႈယိင်းၶိုၼ်းၵေႃႈ ႁႂ်ႈဢူၼ်းငိုၼ်းမႃးပၼ်ငိုၼ်း 15 သႅၼ်။ ပေႃးဢူၼ်းယဝ်ႉ ယႃႇပေသိုပ်ႇၾူၼ်းၸူးမၼ်းထႅင်ႈ ၼႆဝႃႇ။ ပေႃးဢမ်ႇဢူၼ်းငိုၼ်းပၼ်ၵေႃႈ တေယိုဝ်းတၢႆသေတေဢွႆႇမႃပႅတ်ႈ ၼႆၶႃႈဝႃႇၼႆႉ” – ဝႃႈၼႆ။

ၼၢင်းၶမ်းဢွင်ႇ ဢႃယု 19 ပီၼႆႉပဵၼ်လုၵ်ႈယိင်း လုင်းၸၢႆးဢွင်ႇလ – ပႃႈၼၢင်းၶမ်းဢိင်ႇ ယူႇဝၢၼ်ႈတဵတ်ႇၼႃးမူၼ်း ဢိူင်ႇဢုမ်မူႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်း ႁွင်ႇ။  တင်းမူတ်း မီးပီႈၼွင်ႉႁူမ်ႈၵၼ် 7 ၵေႃႉ မၼ်းၼၢင်း ပဵၼ်လုၵ်ႈယိင်း ၵေႃႉယႂ်ႇသုတ်း။

မၼ်းၼၢင်းႁၢႆတူဝ်ၵႂႃႇ ၸဵမ်မိူဝ်ႈဝၼ်းတီႈ 2/6/2022 တေႃႇထိုင်ယၢမ်းလဵဝ် ပႆႇႁၼ်တူဝ် ၶိုၼ်း မၼ်းၼၢင်းလၢတ်ႈဝႃႈ တေၵႂႃႇႁဵတ်းၵၢၼ် ၸွမ်းဢူၺ်းၵေႃႉ တီႈလႃႈသဵဝ်ႈၼႆသေ ႁၢႆတူဝ်ဝႆႉ တေႃႇထိုင်ယၢမ်းလဵဝ်။

ၽူႈၸၢႆးဢၼ်သိုပ်ႇၾူၼ်းမႃးၼၼ်ႉ ပၼ်မၢႆၾူၼ်းႁႂ်ႈသူင်ႇငိုၼ်းပၼ်တင်း ၶေႇပေး Kpay ။ တေလႆႈၵႂႃႇႁပ်ႉၼၢင်းၶမ်းဢွင်ႇတီႈလႂ် မိူဝ်ႈလႂ်သမ်ႉဢမ်ႇလၢတ်ႈပႃး ၊ ၸႂ်လမ်တေႃးသ သေႁိုတ်းႁၢတ်ႇလႃႇသႂ်ႇလိူင်းလိူင်းၸိူင်းၸိူင်းထႅင်ႈ။

 လုင်းၸၢႆးဢွင်ႇလ ၵေႃႉပဵၼ်ပေႃႈၼၢင်းၶမ်းဢွင်ႇဝႃႈ ဢမ်ႇႁၼ်လုၵ်ႈယိင်းမၼ်းလႄႈ ဢမ်ႇဢူၼ်းပၼ် ၼႆလႄႈ ၽူႈၸၢႆးဢၼ်သိုပ်ႇၾူၼ်းယွၼ်းငိုၼ်းၼၼ်ႉၵေႃႈ ၶိုၼ်းဢမ်ႇသိုပ်ႇမႃးၸူးထႅင်ႈသေ ယဵၼ်ၵႂႃႇယဝ်ႉ- ဝႃႈၼႆ။

“မိူဝ်ႈတႄႇမၼ်းတႄႉ ႁဝ်းၶႃႈ ယုမ်ႇဢေႃႈ ပီႈၼၢင်းႁဝ်းၶႃႈ ႁၢႆႁိုင်တၢၼ်ႇၼႆႉ ထၢင်ႇဝႃႈ ပဵၼ်လွင်ႈတႄႉၼႆ ။ ၵမ်းၼႆႉ ဢူၺ်းၵေႃႉ ၶႃႈ တၼ်းလၢတ်ႈၼႄႁဝ်းၶႃႈ ၶိုတ်းတၼ်း မၼ်းဢမ်ႇၸႂ်ႈလွင်ႈတႄႉ ပဵၼ်ၵူၼ်းလွၵ်ႇၵိၼ်ၵူၺ်း။ သင်ဝႃႈ မၼ်းဢဝ်ဢေးပီႈ သူဝႆႉ မၼ်းတေၶိၼ်းႁႂ်ႈၵႂႃႇဢဝ်တီႈၼၼ်ႈ တီႈၼႆႈ ဝၼ်းၼၼ်ႉ ယၢမ်းၼႆႉၼႆဢိူဝ်ႈ။ ယဝ်ႉၵေႃႈ ႁဝ်းတေလႆႈႁၼ်ပီႈသူ ၸင်ႇတေယုမ်ႇၵွၼ်ႇ ။ ဢၼ်ၶဝ်ထူဝ်းမႃးၸိူင်ႉၼႆ မၼ်းၽၢမ်းလွၵ်ႇၵိၼ်ၵူၺ်း- ၼႆလႄႈ ႁဝ်းၶႃႈ ဢမ်ႇဢူၼ်းပၼ်ၶႃႈ”- ၼွင်ႉဢွၼ်ႇ သိုပ်ႇ လၢတ်ႈၼႄၼင်ႇၼႆ။

ဢၼ် ၵူၼ်းဢမ်ႇႁူႉၾၢႆႇ ၵပ်းၾူၼ်းလွၵ်ႇငိုတ်ႈ ယွၼ်းငိုၼ်းမႃးၼႆႉ လႅပ်ႈပဵၼ်လူၺ်ႈ မၼ်းလႆႈမၢႆၾူၼ်းပေႃႈမႄႈ ၼၢင်းၶမ်းဢွင်ႇ တီႈၼိူဝ်ၾဵတ်ႉသ်ပုၵ်ႉၼၼ်ႉၵူၺ်း ဝႃႈၼႆ။

“ပီႈၼၢင်းႁဝ်းႁၢႆလႄႈ ႁဝ်းၶႃႈပိုၼ်ၽၢဝ်ႇတီႈၾဵတ်ႉသ်ပုၵ်ႉတီႈၼိူဝ်လႅင်းဝႃႈ ၽႂ်ႁၼ်ၸွႆႈလၢတ်ႈပၼ်တီႈမၢႆၾူၼ်းဢၼ်ၼႆႉ ၼႆသေ ပၼ်ဝႆႉပႃးမၢႆၾူၼ်းဢေႃႈ။ ၶဝ်လႅပ်ႈႁူႉၵႂႃႇတီႈၼၼ်ႉၶႃႈယူဝ်ႉ ” – ဝႃႈၼႆ။

မၢႆၾူၼ်း ၵူၼ်းဢမ်ႇႁူႉၾၢႆႇ ၵပ်းၾူၼ်းၸူး လွၵ်ႇငိုတ်ႈ ယွၼ်းငိုၼ်း တီႈပေႃႈမႄႈၼၢင်းၶမ်းဢွင်ႇၼၼ်ႉ ပဵၼ်မၢႆၾူၼ်း 09-949-135-168 ၊ သင်ဝႃႈမၢႆဢၼ်ၼႆႉၵပ်းၸူးၸိုင် ႁႂ်ႈၾၢင်ႉဝႆႉလီငၢမ်း-  ၼွင်ႉဢွၼ်ႇလၢတ်ႈၼင်ႇၼႆ။

ပီ 2022 ၼႆႉ ၵူၼ်းဝၢၼ်ႈၵွင်းၶႃး ၼႂ်းဢိူင်ႇဢုမ်မူႉၼႆႉၵူၺ်း ၼင်ႇၵဝ်ႇ ၺႃးၵူၼ်းဢမ်ႇႁူႉၾၢႆႇ ၵပ်းၾူၼ်းၸူး လွၵ်ႇငိုတ်ႈ ယွၼ်းငိုၼ်း 8 သႅၼ်ဢဝ်ၵႂႃႇလၢႆလၢႆ ဢမ်ႇလႆႈၶိုၼ်းငိုၼ်း ဢမ်ႇလႆႈၶိုၼ်းလုၵ်ႈသၢဝ်။ ယူႇတီႈပေႃႈမႄႈ ပီႈၼွင်ႉဢွၼ်ၵၼ် ၵႂႃႇၸွမ်း ၶႆႈႁႃတူဝ် တီႈဝဵင်းမူႇၸေႊသေ ထူပ်းႁၼ်တူဝ်ယိင်းသၢဝ်ဢွၼ်ႇၵေႃႉၼၼ်ႉၶိုၼ်း၊ မၼ်းၼၢင်းၺႃးသမ်းၶဵမ်သင်ဝႆႉဢမ်ႇႁူႉ ယၢမ်းလဵဝ် မိူၼ်ႇမိူၼ်ႇငဝ်ငဝ် မိူၼ်ပဵၼ်ၵူၼ်းဢမ်ႇတွင်းသင်ပႅတ်ႈ လႆႈႁူႉၼင်ႇၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း