မိူဝ်ႈၼႆႉ ဝၼ်းတီႈ 11/7/2022 ယၢမ်းၵၢင်ၼႂ် 9 မူင်း မၢၵ်ႇတႅၵ်ႇ တီႈႁွင်ႈၵၢၼ်လူင်ပွင်ၸိုင်ႈမၢၼ်ႈ တႂ်ႈသိုၵ်းမၢၼ်ႈ ၵုမ်း ၵမ် တီႈဝၢၼ်ႈဝဵင်းမႂ်ႇ ၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ တႅၵ်ႇတိူဝ်ႉသႂ်ႇ ၽူႈႁၢပ်ႇၵၢၼ်လုမ်း ၼၢင်းယိင်း 3 ၵေႃႉ – တၢႆ 1 မၢတ်ႇၸဵပ်း 2 ။
ၵူၼ်းဝဵင်းမႂ်ႇ ဢမ်ႇၶႂ်ႈဢွၵ်ႇၸိုဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇတႅၵ်ႇ တီႈဝဵင်းမႂ်ႇ တိူဝ်ႉသႂ်ႇၽူႈၼင်ႈလုမ်းၶဝ် ၼၢင်းယိင်း 3 ၵေႃႉ။ ၼႂ်းၼၼ်ႉ တၢႆ 1 ၵေႃႉ မၢတ်ႇၸဵပ်း 2 ၵေႃႉ။ ယၢမ်းလဵဝ် ၵူၼ်းတၢႆမၢတ်ႇၸဵပ်းၼၼ်ႉ လႆႈဢဝ်သူင်ႇၵႂႃႇ ယူတ်းယႃ တီႈႁူင်းယႃသိုၵ်း ၼႂ်းဝဵင်းမိူင်းမိတ်ႈ ။ ၼၢင်းယိင်း 3 ၵေႃႉၼၼ်ႉ ၸိုဝ်ႈလႄႈ ဢႃယုတႄႉ ပႆႇႁူႉ”- ဝႃႈၼႆ။
လွင်ႈမၢၵ်ႇတႅၵ်ႇၼၼ်ႉ ပဵၼ်ၼမ်ႉမိုဝ်းၽႂ် ၸုမ်းလႂ် မႃးႁၢင်ႈၵၢင်ဝႆႉတႄႉ ဢမ်ႇႁူႉ ။
ဝၢႆးမၢၵ်ႇတႅၵ်ႇယဝ်ႉၼႆႉ သိုၵ်းမၢၼ်ႈတင်း ပလိၵ်ႈမၢၼ်ႈ ပႂ်ႉၵူတ်ႇထတ်း တၢင်းၶဝ်ႈ ဢွၵ်ႇဝဵင်းႁၢဝ်ႈႁႅင်း။ ၼႂ်းၾူၼ်း ၸိူဝ်းၼႆႉ ဢမ်ႇဝႆႉ ၵူတ်ႇထတ်းမူတ်း ဝႃႈၼႆ။
မိူဝ်ႈဝႃး ဝၼ်းတီႈ 10/7/2022 ယၢမ်းၵၢင်ၼႂ် သိုၵ်းမၢၼ်ႈ၊ ပလိၵ်ႈမၢၼ်ႈလႄႈ တင်း သိုၵ်းၶၢင် KIA, PDF ပဵၼ်ပၢင်တိုၵ်း တီႈဝၢၼ်ႈဝဵင်းမႂ်ႇၼႆႉသေ ၽူႈၵွၼ်းၸႄႈတွၼ်ႈမိူင်းမိတ်ႈ တိူဝ်ႉၺႃးမၢၵ်ႇၵွင်ႈ လူႉတၢႆ ၵေႃႉၼိုင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ