သိုၵ်းမၢၼ်ႈလႄႈ သိုၵ်းၶၢင် ယိုဝ်းၵၼ်တီႈမိူင်းမိတ်ႈ ၸိုင်ႈတႆးပွတ်းႁွင်ႇ ၾၢႆႇသိုၵ်းမၢၼ်ႈ လူႉတၢႆ 1 ၵေႃႉ မၢတ်ႇၸဵပ်း 5 ၵေႃႉ ၽူႈၵွၼ်း ၸႄႈတွၼ်ႈမိူင်းမိတ်ႈၵေႃႈတၢႆ။

မိူဝ်ႈဝႃး ဝၼ်းတီႈ 10/7/2022 တႄႇဢဝ် ယၢမ်းၵၢင်ၼႂ်မွၵ်ႈ 5 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်း တပ်ႉၶလယ 276 တင်း 348 ႁူမ်ႈၵၼ် တင်းပလိၵ်ႈမၢၼ်ႈ ပဵၼ်ပၢင်တိုၵ်းၵၼ်တင်း သိုၵ်းၶၢင် KIA, PDF တီႈဝၢၼ်ႈဝဵင်းမႂ်ႇ၊ ဝၢၼ်ႈၸၢင်ႉၵၢင်ႇလႄႈ ၵဵၵ်ႉၵူတ်ႇထတ်း တီႈဝၢၼ်ႈၺွင်ႇပၢင်ႇၸွၵ်ႉ ၼႂ်းၸႄႈဝဵင်းမိူင်းမိတ်ႈ ၸိုင်ႈတႆး ပွတ်းႁွင်ႇ ၼႆယဝ်ႉ။

ၵူၼ်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းမိူဝ်ႈဝႃး တီႈမိူင်းမိတ်ႈၼႆႉ ၾၢႆႇသိုၵ်းမၢၼ်ႈ လူႉတၢႆ 1 ၵေႃႉ မၢတ်ႇ ၸဵပ်း 5 ၵေႃႉ။ ၽူႈၵွၼ်းၸႄႈတွၼ်ႈ မိူင်းမိတ်ႈၵေႃႈတၢႆ ။ ၾၢႆႇ PDF သမ်ႉ မၢတ်ႇၸဵပ်း 1 ၵေႃႉ”- ဝႃႈၼႆ။

ပၢင်တိုၵ်း တီႈဝဵင်းမိူင်းမိတ်ႈ မိူဝ်ႈဝႃး ဝၼ်းတီႈ 10 ၼႆႉ တီႈဝၢၼ်ႈၸၢင်ႉၵၢင်ႇ ဢဵၼ်ႁႅင်းသိုၵ်းမၢၼ်ႈမီး 35 ၵေႃႉ ၊ ၽိူမ်ႉ ႁႅင်းသိုၵ်းထႅင်ႈ 20 ၵေႃႉ။ တီႈဝၢၼ်ႈဝဵင်းမႂ်ႇ ဢဵၼ်ႁႅင်း 20 ၵေႃႉလႄႈ ပလိၵ်ႈမၢၼ်ႈ 10 ၵေႃႉ၊ တီႈၵဵၵ်ႉဝၢၼ်ႈၺွင်ႇပၢင်ႇၸွၵ်ႉ သမ်ႉ ဢဵၼ်ႁႅင်းၶဝ် 28 ၵေႃႉ ၼၼ်ႉတႄႉ မီး သိုၵ်းမၢၼ်ႈ၊ ပလိၵ်ႈ မၢၼ်ႈ လႄႈ ႁွင်ႈၵၢၼ်လူင်ပွင်ၸိုင်ႈ ၾၢႆႇတႂ်ႈသိုၵ်းမၢၼ်ႈ ၵုမ်းၵမ် ။

မိူဝ်ႈၼႆႉ ဝၼ်းတီႈ 11/7/2022 ယၢမ်းၵၢင်ၼႂ် မွၵ်ႈ 10 မူင်း ၾၢႆႇသိုၵ်း PDF ယူႇတီႈၵွင်းလွႆတိုင်းတဝ်ႇ ၾၢႆႇႁွင်ႇတပ်ႉပၢင်သဝ်းသိုၵ်းမၢၼ်ႈ တီႈဝၢၼ်ႈၸၢင်ႉၵၢင်ႇ ၸႄႈဝဵင်းမိူင်းမိတ်ႈ ယိုဝ်းၵွင်ႈၾၢႆႇလဵဝ် လွၵ်ႇသိုၵ်းမၢၼ်ႈ 3-4 ၵမ်း။ ၵူၺ်းၵႃႈ ၾၢႆႇ သိုၵ်းမၢၼ်ႈတႄႉ ပႆႇတုမ်ႉတွပ်ႇၶိုၼ်းသင် ဝႃႈၼႆ။

ယၢမ်းလဵဝ် သိုၵ်းမၢၼ်ႈတင်း သိုၵ်းၶၢင် KIA, PDF ၸိူဝ်းၼႆႉ ၶဵင်ႈၶႅင်ၵၢၼ်သိုၵ်းၵၼ် တၢင်းဝၢၼ်ႈၸၢင်ႉၵၢင်ႇဝႆႉ ဝႃႈၼႆ။

“တေႃႈလဵဝ် ၵူၼ်းဝၢၼ်ႈတႄႉ ဢွၼ်ၵၼ်ၶုတ်းလုၵ်းပဵမ်ႇၵၼ်ဝႆႉမူတ်းယဝ်ႉ။ ပေႃးဝႃႈၼႃႈႁိူၼ်းလဵၵ်ႉၼႆၵေႃႈ 3-4 လင် ႁူမ်ႈၵၼ် ၶုတ်း ဝႆႉ ၼိုင်ႈလုၵ်း။   ပေႃးငဝ်းလၢႆး ဢမ်ႇလီၵေႃႈ ဢွၼ်ၵၼ်ပၢႆႈမူၵ်းၼႂ်းလုၵ်းပဵမ်ႇ ၵၼ်ၶႃႈဢေႃႈ”- ၵူၼ်းၼုမ်ႇ မိူင်းမိတ်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။

  ၵူၼ်းဝၢၼ်ႈၸၢင်ႉၵၢင်ႇတင်း ဝၢၼ်ႈပၢင်ႇသႃးၸေး ၸိူဝ်းၼႆႉ ဢွၼ်ၵၼ်ၶုတ်းလုၵ်းပဵမ်ႇဝႆႉ တွၼ်ႈ တႃႇတေပၢႆႈမူၵ်းတၼ်းၶိုတ်းလႆႈ ပေႃးငဝ်းလၢႆးၵၢၼ်သိုၵ်း ဢမ်ႇလီ ဝႃႈၼႆ။

မိူဝ်ႈဝၼ်းတီႈ 1/7/2022 ဝၼ်းသုၵ်းၼၼ်ႉၵေႃႈ သိုၵ်းမၢၼ်ႈလႄႈ SSPP ယိုဝ်းၵၼ်ၼႂ်းၸႄႈဝဵင်းမိူင်းမိတ်ႈ သိုၵ်းမၢၼ်ႈတၢႆ 3 ၵေႃႉမၢတ်ႇ 5 ၵေႃႉ။ ၾၢႆႇ SSPP  တၢႆ 1 ၵေႃႉ မၢတ်ႇ 1 ၵေႃႉ။