ဝၢႆးမၢၵ်ႇတႅၵ်ႇ တီႈသီႇယႅၵ်ႇၾႆးလႅင် ၵၢင်ဝဵင်းတူၼ်ႈတီးမႃးယဝ်ႉၼၼ်ႉ သိုၵ်းမၢၼ်ႈ ယိုတ်းမိူင်း ပႂ်ႉၵူတ်ႇထတ်း ႁႅင်းမႃးလိူဝ်ၵဝ်ႇ ။
မိူဝ်ႈၼႆႉ ဝၼ်းတီႈ 7/7/2022 ၼႆႉ တႄႇဢဝ် ယၢမ်းၵၢင်ၼႂ် 8 မူင်း ထိုင် 10 မူင်းၵၢင်ၶိုၼ်း ၶွင်ႇသီႇသိုၵ်းမၢၼ်ႈ ယိုတ်းမိူင်း ပႂ်ႉၵူတ်ႇထတ်း တၢင်း ၶဝ်ႈဢွၵ်ႇဝဵင်းလႄႈ ၸွမ်းၼႂ်းပွၵ်ႉယွမ်ႇ ၼႂ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း မႃးႁၢဝ်ႈႁႅင်း ယဝ်ႉၵေႃႈ ၵူတ်ႇထတ်းပႃး ဝႂ်ႁေႃႈရူတ်ႉ (ဝႂ်ၶပ်ႉၶီႇ) ၸိူဝ်းၼႆႉ။
ၵူၼ်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ -“တေႃႈလဵဝ် ၶဝ်ၵူတ်ႇထတ်းႁႅင်းၼႃႇ မိူဝ်ႈၼႆႉ ၶဝ်ၵူတ်ႇထတ်းၽႅဝ်ထိုင် ၸွမ်းၼႂ်းပွၵ်ႉယွမ်ႇထႅင်ႈလူး ၵွၼ်ႇ။ ယဝ်ႉၵေႃႈ တၢင်းၶဝ်ႈဢွၵ်ႇဝဵင်း ၸိူဝ်းၼႆႉ။ ဢၼ်ပႂ်ႉၵူတ်ႇထတ်းၼႆႉ ပဵၼ်တူဝ်သိုၵ်းမၢၼ်ႈၵမ်းလဵဝ်။ ၵူတ်ႇထတ်းပႃးဝႂ်ႁေႃႈရူတ်ႉ ၸိူင်ႉၼႆႉ ထႅင်ႈဢေႃႈ”- ဝႃႈၼႆ။
ၼႂ်း ဝဵင်းတူၼ်ႈတီးၵေႃႈ ပလိၵ်ႈၾၢႆႇၵုမ်းၵမ်ရူတ်ႉ (ယဉ်ထိန်းရဲ) ယိုင်ႈၶႅၼ်းၵူတ်ႇထတ်းႁႅင်း ၵူၼ်းမိူင်းၸိူဝ်း ၶီႇရူတ်ႉၶိူင်ႈ သေဢမ်ႇသႂ်ႇမၢၵ်ႇႁူဝ်ရူတ်ႉၶိူင်ႈ ၸိူဝ်းၼႆႉ။
“ၶဝ်ၵူတ်ႇထတ်း မူတ်းၶႃႈယဝ်ႉ။ ယၢမ်းလဵဝ် ၵူၼ်းၶီႇရူတ်ႉၶိူင်ႈ ဢမ်ႇသႂ်ႇမၢၵ်ႇႁူဝ်ရူတ်ႉၼႆ ယိုင်ႈၶႅၼ်းၵူတ်ႇထတ်းႁႅင်း။ ဝၢႆးသိုၵ်းမၢၼ်ႈ ယိုတ်း မိူင်းမႃးၼႆႉ ၶဝ်ၵူတ်ႇထတ်း ဢမ်ႇမီးပၵ်းမီးပိူင်သင်ၶႃႈ”- ၵူၼ်းတူၼ်ႈတီး သိုပ်ႇလၢတ်ႈၼႄ ၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 24/6/2022 ၼၼ်ႉ မၢၵ်ႇတႅၵ်ႇတီႈသီႇယႅၵ်ႈၾႆးလႅင် ၵၢင်ဝဵင်းတူၼ်ႈတီး လုၵ်ႈၼိုင်ႈသေ တိူဝ်ႉသႂ်ႇ ပလိၵ်ႈမၢၼ်ႈ မီး လွင်ႈမၢတ်ႇၸဵပ်းလူႉတၢႆ ဝၢႆးၼၼ်ႉမႃး သိုၵ်းမၢၼ်ႈ တႄႇၵူတ်ႇထတ်းမႃးႁၢဝ်ႈႁႅင်း ႁၢၼ်ႉတေႃႇထိုင် ယၢမ်းလဵဝ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ