ၵူၼ်းၵဵင်းတုင် ၽူႈၸၢႆး ၵေႃႉၼိုင်ႈ ႁေႃႈရူတ်ႉၶိူင်ႈဝႆးသေ ၽႃႇသႂ်ႇၵႃးလူင် 12 လေႃႉ ဢၼ်ၵိုတ်းဝႆႉႁိမ်းၶၢင်ႈတၢင်းၼၼ်ႉ လူႉ တၢႆ ထင်တီႈ ဝႃႈၼႆ။
မိူဝ်ႈဝႃး ဝၼ်းတီႈ 6/7/2022 ယၢမ်းၵၢင်ၼႂ်ၸဝ်ႉ ၽူႈၸၢႆး ၵေႃႉၼိုင်ႈ ႁေႃႈရူတ်ႉၶိူင်ႈဝႆးသေ ၽႃႇသႂ်ႇၵႃးလူင် 12 လေႃႉ ဢၼ် ၵိုတ်းဝႆႉ ႁိမ်းၶၢင်ႈတၢင်း ၼႃႈႁူင်းႁဵၼ်း ဝၢၼ်ႈပၢင်ႁုင်း ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း လႆႈမၢတ်ႇၸဵပ်းႁႅင်းသေ လူႉတၢႆထင်တီႈ။
ၵူၼ်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ ၵႃးလူင် 12 လေႃႉသမ်ႉ ၵိုတ်းဝႆႉႁိမ်းၶၢင်ႈတၢင်း ၽူႈၸၢႆးၵေႃႉၼိုင်ႈ ႁေႃႈရူတ်ႉၶိူင်ႈမႃးဝႆးသေ တမ်ႇသႂ်ႇၵႃးၼၼ်ႉ ၊ ၵူၼ်းႁေႃႈရူတ်ႉၶိူင်ႈ တၢႆထင်တီႈၼၼ်ႈၵမ်းလဵဝ်ၶႃႈ။ ပဵၼ်ယၢမ်းၵၢင်ၼႂ်ၸဝ်ႉၶႃႈဢေႃႈ။ လႅပ်ႈမၼ်းၸၢႆး တေႁေႃႈဝႆးသေ မႃးၽႃႇသႂ်ႇၶႃႈဢေႃႈ။ တေႃႇထိုင် မိူဝ်ႈလဵဝ် ၵေႃႉတၢႆၼၼ်ႉ ၸိုဝ်ႈဝႃႈႁိုဝ် ဢႃယုမီးၵႃႈႁိုဝ် ပဵၼ်ၵူၼ်းဝၢၼ်ႈတႄႉ ပႆႇႁူႉ ၶႃႈ”- ဝႃႈၼႆ။
ၸုမ်းၸွႆႈထႅမ် တူင်ႇဝူင်းၵူၼ်း ဝဵင်းၵဵင်းတုင် ၸွႆႈဢဝ် တူဝ်တၢႆ မၼ်းၸၢႆး မႃးဝႆႉတီႈ ႁူင်းယႃ ယဝ်ႉ ဝႃႈၼႆ။
မိူဝ်ႈဝၼ်းတီႈ 27/2/2022 ၼၼ်ႉၵေႃႈ ၵႃးၽႃႇသႂ်ႇ ရူတ်ႉၶိူင်ႈ ၼိူဝ်သဵၼ်ႈတၢင်းလူင် ၵၢင်ဝဵင်းတီႈပွၵ်ႉ 3 ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ၵူၼ်းႁေႃႈရူတ်ႉၶိူင်ႈ ၼၢင်းယိင်း ဢႃယု 30 ပၢႆ ၵေႃႉၼိုင်ႈလူႉ တၢႆထင်တီႈ။
